WARA'AMI 31 - Biblía Axweesantá Hhohho' ar Mungú 2004

Firo as slahh'amaaye

(Wara'amtá Daudi)

¹ AAKOÓ MUNGÚ, án naa dirók i goów, as mitiwa baloó mureekeés ay alhhe'eesay wasle. Ar gan'amuuwoge án ba/amisáng.

² Án iiárií qaasáng, ba/amisáng ar gaanslaay. Kuúng masók an adór tlaa/ár aníng i baaq, nee koo/ír gawit ar aníng i ba/amis.

³ Kuúng a tlaa/ár án i baaq nee koo/ír gawit. Aníng kuúng in geerahát nee in de'eén ar adoodá' ngira ó'.

⁴ Án duuxáng baraá baraatsufaywí tira naaqo oohi. Asma kuúng a dír guway'eé' ar amohhoo'.

⁵ Qeerueé' ngu gawaá dabaawógí saayiím, kuúnguduú AAKOÓ MUNGÚ inkihhím, asma aníng iga ba/amís.

⁶ Kuúng mukdá' slaqsa'aá munguaá hatlá' gi haratlintatií' un ahhít. Ala aníng AAKOÓ MUNGÚ un harahhiíf.

⁷ Aníng a baraá/ nee a qwalalaá/ as sla'aarirók ar warqawaaká, asma baramaanir'eé' kuúng aga aán, nee slahh'amuueé' kuúng u xú'.

⁸ Kuúng wakuuser'eé' aga pa/ángwií haniská oo iwa ot, iri qás dír wayduú koom.

⁹ AAKOÓ MUNGÚ, án gurtlawáng, asma aníng a baraá slahh'amu. Ilaaeé' naa giwiyé' as /aa/e, tam muunaáeé' nee slaqwtaeene i baraá slahh'amaaye.

¹⁰ Baraá slafingw'eene ana hoót ar gurhaami, nee kureerieé' nina waarahhiyé' ar baraá qununu/aay. Slahh'amaaye ina neehuúr, niri fadu tleehhiít.

¹¹ Kudá' i baramaanuusá' ina gár niqaay tleehhiyé', dír inslaaway'eene tay gár dae tlaaq. Aníng a adór gár ta waki dír mulqer'eene, muu án bira ár baraá loohiro in gogoow.

¹² Aníng taa gunqaareés adór heé aa qaroó kahhuut, aníng a adór xooslmoó aa gwaa'.

¹³ Múk yaariír i saasahhán daanduueene, tsaxwa iga harweeriyé' bihhe sleémeero. Taa geewaaqaát tiwa oohi, ta loohír tlehhiit ar tir gaasi.

¹⁴ Ala aníng kuúng un harahhiíf, AAKOÓ MUNGÚ, «Kuúng a Munguúeé'.»

¹⁵ Slafingw'eé' sleémeero i gawaá dabaawógí dirii', án tu/áng dír waakuuser'eene, kudá' aníng i /aytima'a!

¹⁶ Anuú sagadiyusmoowók ila'aráng, sla'aarirók ar warqawaakahe án ba/amisáng.

¹⁷ AAKOÓ MUNGÚ, án mitiwa mureekeés, asma án kuúng ugwa ateét, tlakuuse mureekeeseek, i xasliitiye' baraá gi'ií alé.

¹⁸ Lamuuse afe xasltiseek. Asma inooín múk ganaá' ngun /ayma'aá sagegawdeemaá babayá' ar daara/aangw nee ar waaqaqa'.

¹⁹ Hhooeemaawók adór kir úr, kudá' taa qás as mukdá' kuúng u ilaiwawaá/, kudá' taa tléhh dír mukdá' kuúng u i gogoowa, dír geeraá muko.

²⁰ Kuúng inooín in lú/ dír folú muko, didá' kuúng tawa deér, nee in lú/ baraá heémarók í alé, as axweesanoó múk tlákw.

²¹ AAKOÓ MUNGÚ i xirfuuti, asma iga muruú waa/oo/amór koóm i tleéhh ar sla'aarirós ar warqawaaká, qoomár tiwa /amatseék adór gixsár ta i haratláy kari harweér nee wakuuse.

²² Aníng ana gaanslár oó', «Aníng iga sí'.» Ala kuúng afór firor'eé' aga iiárií qás, qoomár uwa i /aá/ baraá firor'eene.

²³ AAKOÓ MUNGÚ sla'aak, kuungaásingá' sleémeero awa mukós oo hhohhó'. AAKOÓ MUNGÚ mukdá' inkihhimuú koom gun amohhe'emiis. Ala kudá' sagegawden gin doohhiis ar qoomoó hariímar'ín.

²⁴ Ilakaahareesé', mune hhe'eesé', kuungásingá' sleémeero awa AAKOÓ MUNGÚ harahhifá'.