WARA'AMI 30 - Biblía Axweesantá Hhohho' ar Mungú 2004

Ilahhooa

(Wara'amtá Daudi. Daa'ángw taa daá' qoomár Doó Mungú kuwa aldafín)

¹ AAKOÓ MUNGÚ, án kuúng u xirfayeemiís, asma iga ki/ís afkú bohóngw wa ale, nee wakuuser'eé' aga ya/aandiiká iwa qwalaala/ daandueene.

² AAKOÓ Munguúeé', án kuúng una i /aa/amiím, nee iga hungu/ús.

³ AAKOÓ MUNGÚ, án kuúng iga dúx baraá gi'iwo. Án niwa afkwaá bohóngw i nakaá/ kuúng ina slafíngwí ki/ís.

⁴ AAKOÓ MUNGÚ i daa'aak, kuungá' mukós kudá' inkihhím, umuuwós oo hhoohhoó' diidi'iimisaak.

⁵ Asma buhhtaawós awa qoomár niina, ala gurhhooarós ar slafiingw sleémeero. Tam xweeraawo /aa/e i daya'a, ala matlaatleero qwala/ iqo deer.

⁶ Qoomár umuú gaaro iwa qoón ana gurií oó', aníng ti baloó dingitisiiká.

⁷ AAKOÓ MUNGÚ, kuúng gurhhooaroge aníng ina tlaa/a tléhh. Ala kuúng tari ilaaeé' wá qwát, án niri amoqwaqwadiím.

⁸ AAKOÓ MUNGÚ, án kuúng una i /aa/amiím, uri fiririím alee/isaywo.

⁹ Án bara gwaá' kuúng gár ta sleer a milá? Án bara /eét baraá gi'i kuúng gár ta sleer a milá? Gi'i kuúng u sluufmisiía? Gi'i inkihhimuuwók ngu alki/iitiía?

¹⁰ AAKOÓ MUNGÚ, án iiárií qaasáng, gurtlawáng, AAKOÓ MUNGÚ, kuúng án tu/áng.

¹¹ Kuúng niwa hardát tsuunqumisueé' una warqés tari bara/. Inqwaruú tsuunqumis una dúx iri qwal/atís.

¹² Daxta án kuúng u diidi'iimiís ar muunaáeé' sleémeero, slám a baloó xasliitaaká. AAKOÓ MUNGÚ, án kuúng un sluufmiís ay kureeraá kureér.