WARA'AMI 26 - Biblía Axweesantá Hhohho' ar Mungú 2004

Firór heé hhoó'

(Wara'amtá Daudi)

¹ Aá AAKOÓ MUNGÚ, án aleekalaa/áng, asma aníng baraá hotangw'eene ti daba' hhohhó', nee aníng AAKOÓ MUNGÚ una harahhiíf ar xure wasle.

² AAKOÓ MUNGÚ, án alqaytáng nee xuuxuáng, muunaáeé' nee fuqurangw'eé' tsee/ariimeek.

³ Asma sla'aarirók ar warqawaaká i dír geeraaeé' i dirí', nee aníng an hoót as inkihhimuuwók.

⁴ Aníng a iwiwiitaaká dinkwa nee al/aymuuse, slám a dinku'uumisaaká nee hhaahhafuuse.

⁵ Dinku'uumár múk tlakweemá tlehhahhiít aga aáhh, slám a iwiwiitaaká dinkwa nee múk tlakuuse.

⁶ AAKOÓ MUNGÚ, aníng dabaaeé' in hamaátl as niwa dakuúsár koomaaká, nee dír ilahhooa kuwa hanmamisi ngiwa harweer.

⁷ Daa'ángw ilahhooa un daá', nee gadiyeérók sleémeero ar waa/oo/amo an alki/iít.

⁸ AAKOÓ MUNGÚ, aníng Do'ók kudá' ta hot u slaá', didár xirfuuwók i dirii'i.

⁹ Aníng mi qwaareesaar dinkwa nee tlakuuse, laqaá slafingw'eé' mu harahuwaar dinkwa nee mukdá' tseerdaá ku'umaamiís.

¹⁰ Inooín umuúqo daqto tlehhimi'ii'ín ki tlakw, nee hotangw'ín gár iwa haáts a slukmadu.

¹¹ Ala aníng ti daba' hhohhó' baraá hotaaeene, án gurtlawáng nee ba/amisáng.

¹² Aníng aga sihhiít dír amohhoo', AAKOÓ MUNGÚ u diidi'iimiís baraá dinku'uumár yaariire.