WARA'AMI 25 - Biblía Axweesantá Hhohho' ar Mungú 2004

Firo as geerahara nee baqmoó

(Wara'amtá Daudi)

¹ AAKOÓ MUNGÚ, aníng kuúng u fiririím.

² Aá Munguúeé', án kuúng una harahhiíf, mitiwa mureekeés. Wakuuser'eé' miwa arbá/.

³ Ar ló', kudá' kuúng u harahhifá' tumu wák mukuwa mureekeés, ala kudá' al/aymár tlehhiitá' tawó alé i muruutiye'.

⁴ Aá AAKOÓ MUNGÚ, án xu'utisáng lohduwoge, án intsaahhatisáng tsirxadaá nir waaraahha.

⁵ Án geeraharáng ar looeemawók nee intsaahhatisáng. Asma kuúng an Munguú ba/amar'eé', án kuúng un harahhiíf umuú daqto.

⁶ AAKOÓ MUNGÚ, gurtleemuuwók nee sla'aarirók inslaweek, asma iga qaroó geehhooés iimír aange.

⁷ Tlakweemaeé' nee dee/aanuueé' awa iimír án tawa masoomo mi inslawaar, aá AAKOÓ MUNGÚ, án inslawáng ar har qoomoó sla'aarirók ar warqawaaká asma hhooeemawók.

⁸ AAKOÓ MUNGÚ ku hhoó', nee inós i gan'amuú kón, gawaá adoorihe tlakuuse ga intsaahhatis loohirose.

⁹ Múk tsaén Mungú gu geerahaar baraá hotaá ganaa'a'a, múk tsaén gu intsaahhatis loohirose.

¹⁰ AAKOÓ MUNGÚ mukdá' alqadoorós ga ohiím nee axweesantose, gun geeraharahaar ar sla'aarirós ar warqawaaká nee inkihhimuwose.

¹¹ Aá AAKOÓ MUNGÚ, tlakweemaaeé' gurtlaweek as umuuwók, asma tlakweemaaeé' ki yaariir.

¹² Heé AAKOÓ MUNGÚ gu ilaiwawaá/ a heemá? Mungú inós gu intsaahhatis loohír i tsawaari.

¹³ Heé adoorí i hoot, iri yaandahhe'ees, xwaylarós yaamu giri ál.

¹⁴ AAKOÓ MUNGÚ a mulqumoó mukdá' inós gu ilaiwawaá/, nee inós giri intsaahhatimis dabér alqaduuwose.

¹⁵ Ilaaeé' i amór AAKOÓ MUNGÚ ga/ayá' siiwa sleémeero as iwa alee/iisi, inós ya'aaeé' gin duux baraá baratsufaywo.

¹⁶ Án i warqawáng nee gurtlawáng, asma aníng a baraá deewa'ame nee baraá slahh'amaaye.

¹⁷ Án ba/amisáng baraá daawitimér muunaáeene, nee iwa tu/ baraá slahh'amaayer'eene.

¹⁸ Slahh'amaayer'eé' nee baraamaanir'eé' i qaytsiteek, tlakweemaeé' sleémeero gurtlaweek.

¹⁹ Qaytsiít adór wakuuser'eé' kar yaariír, nee adór án ir ahhiitiyá' ar aahhír tlakw.

²⁰ Án de'eemáng nee ba/amiisáng. Mitiwa mureekeés asma aníng nina dirók i goów.

²¹ Hhooeema nee gan'amu masók aníng in de'ená', asma aníng kuúng un harahhiíf.

²² Na'ás Mungú, kuúng múk Israeli gweereek baraá slahh'amaayer'ín sleémeerowo.