WARA'AMI 2 - Biblía Axweesantá Hhohho' ar Mungú 2004

Waawutmoó taa tsawaár nee Mungú

¹ Ahaá waáy, xoordu misinda barti'ín ayé' as nguwa geewaqaatiya'? Ahaá waáy, tlahh'ii sleémeero gár i qoomeemeesiya' mas muruú tawo?

² Waawituú daanduú yaamu ti amohhe'emiis as tawa haratlay, nee geeraharuuse taa kaahi sleér daanduú AAKOÓ MUNGUHE, nee daanduú kudaádá' inós aa tsawaár as tawa waawutmo, tawa kaahi,

³ «Waawuti'iimar'ín an siaán, nee baalir'ín kari siaán amór saáwí alé.»

⁴ AAKOÓ MUNGÚ kudá' gawaá doorií wa baaliliím gi waqaseesén, nee tidá' i tlehhiitiya' gan niqimis.

⁵ AAKOÓ MUNGÚ giri naanaáq ar buhhta, giri dae tlaáq ar buhhtaawós awa xaraaslá', iwa kaahi,

⁶ «Án waawutmooeé' ngwa qaás gawaá Siyoni, tloomar'eé' tidá' hhoohhoo'.»

⁷ Waawutmo i kaahi, «Aníng hara'ayaadá' AAKOÓ MUNGÚ naa oó' an alki/iít. Inós ina báy, ‹Kuúng an garmaaeé', án laarí kuúng ugwa laqwaál.

⁸ Án firiimáng, daqaní aníng xoordu ngi kuúngí haniís. Nee yaamu sleémeero ngi kuúngí haniís tawa daqaari'iimaarók.

⁹ In naasuúr ar hhartá muqsli, kiri parhhamís adór xooslmoó tleei.› »

¹⁰ Daxta kuungá' waawitá, fuquriimé', kuungaásingá waawituú yaamu, gurbu'utí iiárií qaasaak.

¹¹ AAKOÓ MUNGÚ sagadiyuusaak ar ilaiwa/ame, i tumbarara'ataak ar daaraxaay,

¹² as miwa buúhh, kuungá' tay qwadá' baraá loohi, asma buhhtaawós ni hardihiyá' ar gaanslaay. Kudá' sleémeero ngwa i guwiye' ki amohhoo'.