WARA'AMI 19 - Biblía Axweesantá Hhohho' ar Mungú 2004

Mura' sleémeero i xirfuú Mungú laqaaqán

(Wara'amtá Daudi)

¹ Doori i xirfuú Mungú geehhooatimisiyá', nee sleeme i gadiyér dabaá Mungú dahareemisiyá'.

² Tlaatla/aangw i tlaatla/ángw hardáh i axwees, xweera i xweeraá hatlá' xu'utimisiyá'.

³ Tsifri i káhh, laqaá axweesani, tam afór ta axamiisi i káhh.

⁴ Tam nee adoosinge afor'ín aa tsiyaayaxát umuú dii baraá yaamuwo. Axweesantaín aa hardát alhhe'eesoó yaamuwo. Mungú looa gaa do' i tleéhh gawaá dooriwo.

⁵ Matlaatleero in ti'imít ar qwala/, adór garmoó duuxuxuúm, adór heé pihhusmo oo taa amohhe'ees qwaatlór ti'iingo.

⁶ In bihhaá wák wa tleér, nee iri harweeriín bihhaá hatlá' i alé, tam gár tsee/amaawós wa nahhaat i káhh.

Dabér AAKOÓ MUNGÚ

⁷ Dabér AAKOÓ MUNGÚ i qoón, hee gu /uurií hanís. Axweesantá AAKOÓ MUNGÚ a ló', sagalooa ga hanmís dír kudá' ngi kooma'aaká.

⁸ Dabér AAKOÓ MUNGÚ i ganá', muuná gu qwal/atimís, hara'ayár AAKOÓ MUNGÚ i ganá', hee gu daharés.

⁹ Ilaiwa/amér AAKOÓ MUNGÚ ka hhoohhoo', i kumít ay kureeraá kureér. Kaahír AAKOÓ MUNGÚ a looeema, sleémeero i ganá'.

¹⁰ Tam kari waatlakwés ta sahaábuwo, ta sahaábuú ló' wa hhoohhooe. Nee i nuqnúq ta xaaramtá danuhe, ta danuú /aamiro.

¹¹ Aníng sagadiyusmoowók ti intsaahhatimis nee dabér AAKOÓ MUNGÚ, dabeerós bara iialooeés, qeemuú úr u sláw.

¹² Ala heé dakuúsarós tsaahharo ga asláw a heemá? AAKOÓ MUNGÚ, tlakweemaá tsaahharo ni aslawaakahe gurtlawáng.

¹³ Anuú sagadiyusmoowók baqáng baraá tlakweemaá fahhariro, as aníng tlakweema miwa baaliyé'. Daqaní aníng a heé ganaá', tam dakuúsár ur aga tleehhiiká.

¹⁴ AAKOÓ MUNGÚ, axweesanoó afkwe'eé' nee inslawoó muunaáeé', ya/aám ngi slay diroge. AAKOÓ MUNGÚ, kuúng an baqmor'eé' nee ba/amusmooeé'!