WARA'AMI 18 - Biblía Axweesantá Hhohho' ar Mungú 2004

Daa'ángw arba/ti

(Wara'amtá Daudi, sagadiyusmoó Mungú. Wara'amtí gana Mungúí daá' qoomár nguwa ba/amiís baraá dabaá Saulo nee wakuuseerós ar hatlae)

¹ AAKOÓ MUNGÚ, án kuúng u slaá'. Kuúng a /uuruueé'.

² AAKOÓ MUNGÚ an baqmor'eé', nee ba/amusmooeé', an Munguúeé' oo ni i gogoow. Inós aníng in baaq adór gaambór wa ale, in aleekalaa/ iri ba/amis, aníng ti saxmaár dirose.

³ AAKOÓ MUNGÚ u ateét, kudá' hariím xirfayeemisuwo. Adoorihe án i tuu/ dír wakuuser'eene.

⁴ Tsaxwaá gwa'ara ina /amatseegiyé' bihhe sleémeero. Hhituru'uuma ina dae tsát adór alwuo.

⁵ Tsaxwaá niwa /eet baraá gi'i ina /amatseegiyé', tsaaxweelír gwa'ara ina hara ganá'.

⁶ Baraá slahh'amueene AAKOÓ MUNGÚ una ateét, una ateét Munguúeé' as iwa alee/iisi. Afor'eé' gari axaás amór do'ós wa ale. /Aa/ee'eé' nay baraá iaawós i hardihiyé'.

⁷ AAKOÓ MUNGÚ iwa buúhh, yaamu nina dingitiyé' nari daraaxatiyé'. Iihhafiirír tlom'i iri dingít.

⁸ Quuír baraá duungawós daahh iri gáwtí tsa/aán. Asla ina baraá afkós wa ti'ít, nee gil'o adór tsángw asla.

⁹ Doori gina kiís iri aweér, iri sihhiít gawaá tlaftá huunkír iiloo'.

¹⁰ Iri tsa/án gawaá hhampa'aá keruúbi, ina fuuruú' ar /uuruú fur'a.

¹¹ Tina untsuús ar giwti, huunkoó iló' oo tluwoó koóm guna tuuntuúk.

¹² Baraá gwa/aatemaayedár dír geeraawose huunkoó urén ina waaraáhh, nee tluwoó tlaa/ee nee mankari ina waaráhh.

¹³ AAKOÓ MUNGÚ ina ilawaáts adór kwarara/a gawaá doorií wa ale, Inósuuduú Gawa afoorós nay ilawáts, ar tluwoó tlaa/ee nee mankari.

¹⁴ Maheeriwós gina tlaquút, wakuuseerós gari diyaá/. Kár ee, gari diyaá/ ar mankarór yaariir.

¹⁵ AAKOÓ MUNGÚ, wakuuseerók kawa iigahhát, kawa dae tsát ar buhhtaawók, iloodaá tlawi niri geehhouyé', iihhafiirír yaamu iri geehhoouúr.

¹⁶ AAKOÓ MUNGÚ dakós nguna gáwtá wa tleereés aníng iri taataáhh, iri baraá ma'aá yaariír wa duúx.

¹⁷ Ina ba/amís dír wakuuser'eé' tidá' /uuruú kooma. Ina ba/amís dír kudá' aníng iga aahhi'i, asma inooín iga harslaaqaát arba/ato.

¹⁸ Ina /amaatseegiyé' bál slahh'amueene, ala aníng AAKOÓ MUNGÚ ina baáq.

¹⁹ Ina ba/amís iri qaás dír wayduú koom, asma inós una sla'atís.

²⁰ AAKOÓ MUNGÚ ina gár hhoó' i tleéhh asma aníng niwa ganaa', nee ina tsuúq as dabahhohhoaarir'eé'.

²¹ Aníng loohirós ana eehár, nee Munguúeé' ugwa geexawiiká.

²² Kaahirós sleémeero aga óh, nee hara'ayaarós aga si'iiká.

²³ Dír geeraawose a dakuúsár koomaaká, nee taa harmagaáhh tlakweemaawo.

²⁴ AAKOÓ MUNGÚ tidá' hariim ngina aníng i tleéhh asma niwa ganaa', asma dabaaeé' kiwa hhohhó' geeraawose.

²⁵ AAKOÓ MUNGÚ, kuúng tu inkihhím dír kudá' inkihhimuú kooma'a diroge. A ganá' dír kudá' hota ganaa'a.

²⁶ Dír kudá' hhohhoe kuúng tin laqaán tuwa hhoohhoó'. Dír kudá' xaraasla'a tin laqaán tawa xarasl.

²⁷ Asma kuúng i ba/amís kudá' tsaen, ala kudá' daara/aamá' in dáhh.

²⁸ AAKOÓ MUNGÚ, kuúng an kudá' tsaa'aste'eé' ngi oohiís. Munguúeé', kuúng giwtir'eé' an tsaa'ás.

²⁹ Ar alee/isaywoge slawtá múk slaqwara a guús, ar alee/isoó Munguúeene baqmór wakusmo an wa /akuút.

³⁰ Loohír Mungú i qoón, al'axweesantós i haratlintaaór wa hariín, kudá' sleémeero dirós i gogoowa'a inós a baqmoó.

³¹ Mungú a heemá, aqo har AAKOÓ MUNGÚHEÉKE? Baqmoórén a heemá, aqo har Munguúréneéke?

³² Mungú an kudá' aníng i /uurií hanmamiís, inós an kudá' hotaeé' ngi gan'aás.

³³ Ya'aaeé' gina adór kuqaá tlaaqati tleéhh, iri sihhitís ar amohhooa gawaá tloomárí ale.

³⁴ Inós án ina intsaahhatís slaqwaraaro, as dabaaeé' ga/alér muqslír sirdaa/aat uuruuxaro ngiwa aleeslaya'.

³⁵ AAKOÓ MUNGÚ, án kuúng ina báq nee iri ba/amís, amohhe'eemisuuwók aníng ina ureés, nee ina gawdés ar /uuruuwók.

³⁶ Loohir'eé' ana intlaaxwés dír geeraaeene, tam ya'aaeé' iga tunqalaa/iiká nikiitsaawo.

³⁷ Wakuuser'eé' an gusisiím ay dír ngay ohiim. Nee a alií ki/aaká ay dír ngay hhaamiis.

³⁸ In muxaxiím ay dír sihhtano ngay harslaaqatiya'. Niri dír ya'aaeé' i huuhu'uná'.

³⁹ Án kuúng i qeér /uuruú slaqwaraaro, nee wakuuser'eé' ngiri daáhh yaamu.

⁴⁰ Wakuuser'eé' kuúng ana gús dir'eene, nee kudá' aníng i ahhiitá' ngay hhaamiís.

⁴¹ Nina mak uuiyé', ala heé gaa /iis i kaahh. AAKOÓ MUNGÚ nguna mak i /aa/iyé', ala gaa iiárií qaasiiká.

⁴² Ina naasúw, tari adór teerír fur'a ir tlatleer. Aníng i kal/a/aám adór baa/ír baraá loohi.

⁴³ Iga ba/amís dír mukdá' aa dee/aanuuti. Iri waawutmoó xoordu tléhh, múk ni xuaaká iri sagadiyuús.

⁴⁴ Kangw'eé' kuwa axaás tari iialooeés, dahaaye nari amor'eéní hardát iri i tumbarara'atiyé'.

⁴⁵ Pihhoó dahaaye iri qwaár, nina ti'iitiyé' baraá slumooín wa ale, nay dir'eéní hardihiyé' ar daaraxaay.

⁴⁶ AAKOÓ MUNGÚ an kudá' slaáf, i xirfuuti kuduú baqmór'eé'. Diidi'iimisaak Munguúduú ba/amar'eé'.

⁴⁷ Inós an kudá' arba/ati ngi hanmiís dír wakuuser'eene, xoordu ngina baráy qaás dir'eene.

⁴⁸ Ina ba/amís dír wakuuser'eene, AAKOÓ MUNGÚ, kuúng arba/ati ngina hanís dír kudá' aníng i tlaampa'amisa'a, iri báq dír kudá' xaraasla.

⁴⁹ Gawaá adoorihe, AAKOÓ MUNGÚ, án kuúng u xirfayeemiís dír geeraá xoorduú wa ale, án kuúng u daa'ángw xirfií daá'.

⁵⁰ Mungú waawutmoowós gu arba/atír úr i hanmiis, heewós kudá' aa tsawaár gun sla'aarirós i laqán, eeít, gan laqán dír Daudi nee xwaylarós ay kureeraá kureér.