WARA'AMI 17 - Biblía Axweesantá Hhohho' ar Mungú 2004

Firór heé dakuús wásl

(Firór Daudi)

¹ AAKOÓ MUNGÚ, firor'eé' iiárií qaaseek as sakwasleemár ganaa' ngiwa slaw. /Aa/ee'eé' iiárií qaaseek, firor'eé' ar tsáp ilaooheek.

² Adór aníng tir dakuús wásl waahheek, asma kuúng gár ganaa' a xú'.

³ Kuúng iga haraxeér xweeraawo, iri tsee/aariín, muunaáeé' kuri xuuxu'uún. Kuúng ina iiát, ala gár tlaakw ar taa aán i káhh baraaeene. Aníng gár tlaakw aga ooiiká afkwe'eene.

⁴ Muruú tlákw u axweesaaká adór múk hatlá' wa ale. Hara'ayarók a ilaiwawaá/. Loohír tlakuuse a eeharaaká.

⁵ Aníng loohirók ana eeharahár, tam aga baloó nikiitsiiká.

⁶ Mungú, án kuúng u fiririím, asma tawa axamis, iiárií qaasáng, axweesanay'eé' axaaseek.

⁷ Sla'aarirók ar warqawaaká laqaamang ar tlehhma'aá waa/oo/amo. Kudá' naa amoorók i guwiye' ba/amiseek dír wakuuser'ine.

⁸ Án de'eemáng adór maamár iltá wa ale, lu/áng baraá mahhtuú hhaampi'iiwók,

⁹ as múk tlákw kudá' aníng i baramaanuús, nee as wakuusér tsu/uut ar aníng iga harwet.

¹⁰ I gurtleemuú kon'aaká, ki mune gawden. Baraá afer'ine gár haats a /ayma'aá daara/aangw.

¹¹ Daxta aníng iga harweeriyé'. I haramaamahhamiitiyá' tiwa yaamúr slahhi.

¹² I feehhamisuú wa slaiyá' adór diraangw, nee adór na/oó diraangw oo gigidiím bir slakaat.

¹³ AAKOÓ MUNGÚ, sihhiít, harahi'iiteek as kiwa dahh. Án ba/amisáng dír heé tlaakwe ar paángarók.

¹⁴ AAKOÓ MUNGÚ, ar /uuruuwoge án ba/amisáng dír muko. Nee dír múk gur'er'ín gaa amór muruú /ayma kilós xu'us. Masók slafingw'ín in haats slahh'amaayeedá' taa qasi as inooín. Na/ii'ín ni aaxiye' nee ngi na/aá nangw'ín i geexaye'.

¹⁵ Ala aníng kuúng u ár, asma gár naa dakuús i káhh. Qoomár binda tláw an haáts qwal/uwo, asma a dinkwa nee kuúng.