WARA'AMI 16 - Biblía Axweesantá Hhohho' ar Mungú 2004

Mungú an harahhifor'eé'

(Wara'amtá Daudi)

¹ Na'ás Mungú, aníng de'eemáng, asma kuúng an dír guway'eé'.

² AAKOÓ MUNGÚ una báw, «Kuúng an AAKOOEÉ', aníng gár hhoo' ni koom i káhh, aqo har kuúng.»

³ Múk hhohhó' oo baraakaá yaamu an múk afhhamít, inooín aníng i sla'atimisiyá'.

⁴ Ala kudá' munguaá hatlá' eeharahará', gurhaamir'ín in doogiín, ilahhooar'ín ar tseere an tsirxiisaaká, tam umér munguii'ín ka axaasiiká afkwe'eene.

⁵ AAKOÓ MUNGÚ, kuúng an aalir'eé', kuúng muruú aníng ni slaa' ngun hanmís sleémeero. Slafingw'eé' i baraá dabaawók.

⁶ Aníng iga dír hhoó' i qasís, eeít, aalidá' hhoo' aga sláw.

⁷ Aníng AAKOÓ MUNGÚ un diidi'iimiís, kudá' aníng i hara'ayiyiím. Tam xweeraawo inós in intsaahhatimis baraá muunaáeene.

⁸ AAKOÓ MUNGÚ i geeraaeé' umuú qoomaaro. Aníng ti baloó dingitisiiká, asma inós iwa dakw'eé' oo doó /iyáy i dirii'i.

⁹ Gawaá adoorihe daxta muunaáeé' i qwalalaa/, nee aníng a baraá/, slám slaqwtaeé' ka saxmaár.

¹⁰ Asma, AAKOÓ MUNGÚ, kuúng aníng i baloó meeraaká baraá gi'ií alé, a ya/aandaaká heewók oo hhoohhoó' iwa hhitiruuti.

¹¹ Kuúng aníng i loohír slafíngw i geehhoatís. Dír geeraawoge qwala/ ku yaariír, nee baraá dakók kuduú doó /iyayhe hhooeemaá alhhe'eesay wasl i dayá'.