WARA'AMI 149 - Biblía Axweesantá Hhohho' ar Mungú 2004

Daa'ángw xirif

¹ AAKOÓ MUNGÚ xirfayeesaak! AAKOÓ MUNGÚ daa'ángw /abén i daa'aak, Xirfuuwós i baraá dinku'uumár múk inkihhím dír Munguhe.

² Israeli tleehharusmooín ngu saqwalaala/iye', na/aá Siyoni Waawutmooín ngu sa baraa/iye'.

³ Umuuwós ngu xirfayeesiye' ar ni/ima, nee kuwa i daai ar mitingiri nee gidaandoori.

⁴ Asma AAKOÓ MUNGÚ mukós gu sa qwalalaa/. Múk tsaén gun parootuus ar arba/ati.

⁵ Múk inkihhím AAKOÓ MUNGÚ ngu sa baraa/iye' ar xirif, ta daai ar afór ur baraá qateenooine.

⁶ Xirfuú úr oo Mungú masók i baraá afer'ín waa ti'imiit. Nee paángár xaraasl ar afe tsár masók i baraá dabaaín.

⁷ As li/aay kuwa bui dír xoordu, nee xoordaá hatlá' muxta ngi slaye'.

⁸ Waawitaáín ku tseegi ar muqsla, nee geeraharuuser'ín kawa tseegi ar qutúr.

⁹ Sakwasleemadá' taa inooín i gooín kawa tleehhi. Gaarí an tlehhmuú mukós gu xirfuú i sláw. AAKOÓ MUNGÚ xirfayeemisaak!