WARA'AMI 148 - Biblía Axweesantá Hhohho' ar Mungú 2004

Mungú ku xirfayeesi nee mura' sleémeero

¹ AAKOÓ MUNGÚ xirfayeemisaak! Iimír gawaá dooriwo xirfayeemisaak! Baraá gáwtá saawe inós xirfayeesaak!

² Malaykeerós sleémeero, inós xirfayeesaak! Slawemowós sleémeero awa gawaá doori, inós xirfayeesaak!

³ Looa nee slahhaangw, inós xirfayeesaak! Tsetse/ sleémeero kudá' gwa/aát, inós xirfayeesaak!

⁴ Dooraá saawá', inós xirfayeesaak! Nee kuungaá ma'aay awa gawaá doorií diriiá'!

⁵ Umuú AAKOÓ MUNGÚ ngu xirfayeemisiye'! Asma inós /aymu guna oó' inooín niri tleehharuutiyé'.

⁶ Umuú gaaro gana digmuuwósi haniís oo daqisleém, giri hara'ayári haniís ar i baloó warqeesiaaká.

⁷ AAKOÓ MUNGÚ xirfayeemisaak iimír yaamuú wa ale, kuungá' makaá uren awa baraá ma'aá hootá', nee kuungá' iloodaá baraá tlawi sleémeero, AAKOÓ MUNGÚ xirfayeemisaak,

⁸ AAKOÓ MUNGÚ xirfayeesaak, kuungá' asla nee tluwoó tlaa/e, theluji nee tlaangú, fur'ár bambaao ar fukukuu', tidaádá' hara'ayaarós gaa boo/es.

⁹ Kuungá' tlom'i nee dindirma' sleémeero, xaa'aá mamaá koomá' nee sahhta sleémeero! AAKOÓ MUNGÚ xirfayeesaak!

¹⁰ Kuungaá makaá sla/a nee makaá de'eengo, muruú gur'ér ar hi'imiita nee tsir/ór gáwtí tlatlaw!

¹¹ Kuungá' waawituú baraá yaamu nee muu sleémeero, geeraharuuse nee baaluuse sleémeero baraá yaamuwo!

¹² Kuungaá masoombár daaqaay, nee ar dasu, bariise nee na/ii!

¹³ Kuká' sleémeero umuú AAKOÓ MUNGÚ ngu xirfayeesiye', asma umuuwós kun ak úr ta umér hatlae, xirfuuwós yaamu gaa waaraáhh nee dooriwo.

¹⁴ /Uuruú mukós ngwa bariilooeés, xirif gwa mukós oo hhohhó' i haniís, mukós Israeli, múk tseéw dirós i alé. AAKOÓ MUNGÚ xirfayeemisaak!