WARA'AMI 147 - Biblía Axweesantá Hhohho' ar Mungú 2004

Xirif as Munguú Aleesleemusmo

¹ AAKOÓ MUNGÚ xirfayeemisaak! Asma ka hhoo' Munguúrén kuwa i daa'aan. Asma inós ku gurhhoó', nee kuwa xirfayeemisaan i ganá'.

² AAKOÓ MUNGÚ gixsár Yerusalemu gan tlehhiit. Múk Israeli, kudá' aa diyaa/aat gun burumburín.

³ Kudaádá' naa mune si'iye' gin hungu/umiis, inkahhi'ii'ín gin tsegiit ar warqama'.

⁴ Tsatse/ gun faaro xuu'. Umuú tsatsee/iro gan umií tsaat.

⁵ AAKOÓ Munguúrén ku úr, nee /uuruuwós ku yaariír, xu'utiirós i qoomoó koondaaká.

⁶ AAKOÓ MUNGÚ múk ti niinaweemiís gun gáwtí oh, ala kudaádá' sagegawden gin naasúy yaamií ale.

⁷ AAKOÓ MUNGÚ daa'ángw sluufaay ti dae', Munguúrén i daa'aak ar gidaandoori!

⁸ Doori gin tuntukaakín ar huunkáy, yaamu gin tluuwáy i huuw, gawaá dindirmawo gitso gan titi'imiis.

⁹ Makaay gin muruú /aymár i slaasláy, na/aá xwa'aaro awa /aa/amiimá' sleeme.

¹⁰ Ku qwal/amiisiiká nee /uuruú faras, laqaá /uuruú miguuse gu sa qwalaala/iiká.

¹¹ Ala AAKOÓ MUNGÚ múk i saqwalaala/i a kudaádá' inós gu ilaiwawaá/, kudaádá' sla'aarirós ar warqawaaká ngi harahhifá'.

¹² Yerusalému, kiíng AAKOÓ MUNGÚ xirfayeeseek! Munguúwók xirfayeeseek, kiíng Siyoni!

¹³ Asma inós nahha ga gawdees tseegamooro, daaqoó baraá do'ók gu tsuuq.

¹⁴ Inós wayda gu sagesihhimiit baraá digmuú ayaawoge. Nun aaxamiis muruú /aymár hhoe.

¹⁵ Hara'ayaarós gan oo' baraá yaamií ale, nee /aymuú aa oó' iri gaanslár hardah.

¹⁶ Inós tluwoó tlaa/e ngun huuw yaamu nay /awaakuyá', hara' gun tsaafiis adór da/ara.

¹⁷ Tla/aá tluwaay ngin tlaquut adór /are'eeraá fa/ár wa ale. Heé sihhitano ga aleesláw a heemá baraá daqtamoó tlaa/eedaá tluwaywo?

¹⁸ /Aymuuwós ngun oo' tlaa/aá tluwaay giri weeqatis. Fur'aarós gan fukuku'uus ma'aay niri wa/iyá'.

¹⁹ Axweesantós gan alki/iit dír múk Israeli, kaahirós nee sakwasleemaro gari dir'ín i alki/iit.

²⁰ Muruuwí gwa tleehhiiká dír xoorór hatlae, Xoordaá hatlá' kaahirós ngi xuiaaká. AAKOÓ MUNGÚ xirfayeemisaak!