WARA'AMI 146 - Biblía Axweesantá Hhohho' ar Mungú 2004

Xirif as Mungú ba/amusmo

¹ AAKOÓ MUNGÚ xirfayeemisaak! Aá hhiintlueé', AAKOÓ MUNGÚ xirfayeeseek!

² AAKOÓ MUNGÚ u xirfayeemiís qoomár niwa hoot, Munguúeé' un i daá' qoomár niwa slaaf.

³ Geeraharuusér muu ma harahhifaara', hee mu harahhifaara' asma dír heewo ba/ama i káhh.

⁴ Hiinsluú hee in ti'iit iri kii/ baraá hhape, baldae muruudá' sleémeero aa qoomaameés in qwaar.

⁵ Heé amohhoó' a kudá' alee/isaay gu harahhiíf dír Munguú Yakobo, nee harahhifoorós i dír AAKOÓ Munguúwós.

⁶ Kuduú tleehharusmoó doori nee yaamu, tlawi nee mura' sleémeero kudá' baraaíní diriia, tidá' sleémeero aa oó' gan boo/ees ay alhhe'eesay wasle.

⁷ Mukdá' taa barqantuús guri sakwasleemár ganaá' i tleehh, kudá' qwariitá' giri muruú /aymár i haniis. Kudá' taa tsegiít AAKOÓ MUNGÚ gay gweer.

⁸ AAKOÓ MUNGÚ taampu giri ila' qaytsitis, AAKOÓ MUNGÚ kudá' ta slahh'eemisi gin alee/iis, AAKOÓ MUNGÚ múk hota ganaá' gu slaa'.

⁹ AAKOÓ MUNGÚ dahaaye ga amohhe'eemiis, panaay nee kwaeeli gin /uurií qamín. Ala múk gana'aaká gun qwaarees.

¹⁰ AAKOÓ MUNGÚ i baalín ay alhhe'eesay wasle. Aá múk Siyóni, Munguúhúng an waawutmoó qari sleémeero. AAKOÓ MUNGÚ xirfayeemisaak!