WARA'AMI 145 - Biblía Axweesantá Hhohho' ar Mungú 2004

Daa'ángw xirif

(Daa'ángw xirif oo Daudi)

¹ Aá Munguúeé', kuúng an waawutmooeé', án kuúng u iiatleés. Umuuwók un diidi'iimaamiís ay alhhe'eesay wasle.

² Umuú deelooro un diidi'iimiís. Umuuwók un xirfayeemiís ay alhhe'eesay wasle.

³ AAKOÓ MUNGÚ kun úr, masók kun ló'wa xirfayeemiis, nee uraywós heé tsaahharo gu asláw i kaahh.

⁴ Qari nee tidá' aluú wa iitlaw, xirfuú tlehhmi'iiwoge tiri ádbabayé', tlehhmi'iiwók kudaádá' /uuruuwók ngu laqaaqamá', kin alki/iit.

⁵ Nguri axweesiyá' xirfuuwók nee uroó waawuti'iimaroge, nee aníng tlehhmi'iiwók kudaádá' waa/oo/amór koomá' i aldakuút.

⁶ Muu tlehhmi'iiwók kudá' dae tlaaqá' kiri kah, nee án kángw uraywók u alki/iít.

⁷ Tidaádá' baraá iinslawáy dirii' kari dahareemiis, nee kángw gan'amuuwók kuri daa'.

⁸ AAKOÓ MUNGÚ ku gurhhoó' nee i gurtleemuú kón. Muneero ku inslahheeká, inós in haats sla'aarír warqawaakahe.

⁹ AAKOÓ MUNGÚ ku hhoó' dír muu sleémeero. Nee gurtleemuwós i gawaá umuúqo gár aa tleehhi.

¹⁰ Aá AAKOÓ MUNGÚ, muruudá' sleémeero kuúng taa tléhh u sluufmiis. Nee mukók kudá' hhohhó' kuúng u diidi'iimiis.

¹¹ Xirfuú waawuti'iimarók kuri kah, kángw aleesleemuuwók kuri alki/iit,

¹² as muu kuwa xu'utisi daanduú tlehhmi'iiwók kudaádá' uren, nee xirfuú waawuti'iimarók.

¹³ Waawuti'iimarók i alhhe'eesoó koondaaká, nee baalirók in kumít qari sleémeero. AAKOÓ MUNGÚ ar aa oó' sleémeero ga hardahaas. Nee ku gurhhoó' baraá tidaádá' sleémeero i tlehhiiti.

¹⁴ AAKOÓ MUNGÚ kudaádá' sleémeero naa huuiye' gin gáwtí oh, kudaádá' sleémeero gurhaamutá' gin gurkwa/as.

¹⁵ Muruú slaáf sleémeero kuúng un ga/áy ar harahhifo. Nee kuúng un muruú /aymár i hanmís qoomár hariima.

¹⁶ Tsa/aywók bura kís, gurhhooaro umuú gár slafa an aaxís ar gadaádá' /aymaaro i sla'a.

¹⁷ AAKOÓ MUNGÚ i gan'amaayér kón baraá lohuwós sleémeero, nee ku hhoó' baraá umuúqo gár i /imiisi.

¹⁸ AAKOÓ MUNGÚ ku tseéw dír kudaádá' sleémeero ngu ateetima'a, kudaádá' sleémeero ngu ateetimá' ar looeema.

¹⁹ Kudaádá' ngu ilaiwawa/á' gi qáy tidaádá' i slaiia, /aa/eeín gi axaas giri ba/amiis.

²⁰ AAKOÓ MUNGÚ kudaádá' sleémeero ngu sla'á' gin amohhe'eemiis, ala tlakuuse sleémeero gan qwaarees.

²¹ Afkwe'eene xirfuú AAKOÓ MUNGÚ u alki/iít. Kudá' hiinslá' sleémeero umuuwós kudaádá' hhoohhoó' ngu diidi'iimisiye' ay kureeraá kureér.