WARA'AMI 143 - Biblía Axweesantá Hhohho' ar Mungú 2004

Firo as alee/isaay

(Wara'amtá Daudi)

¹ AAKOÓ MUNGÚ, firor'eé' iiárií qaaseek. /aa/ee'eé' axaaseek. Ar baraá inkihhimuuwók nee gan'amuuwoge án mu/aywatsáng,

² Án a lawaalmoowók, mi baraá kwasleemár i huwaar. Asma baraá múk slafa heé ganaá' i kaahh diroge.

³ Heé wakusmo án i aluú wa alkón, án iga dalaá/ ar yaamu, iga óh, iri tseék baraá giwtírí ale, adór mukdaádá' aa qaatl iimír qarooro.

⁴ Gawaá adoorihe muunaáeé' aa wanana'aát nay diqay tsatiít baraaeene. Daxta harahhifor'eé' aa qwát.

⁵ Deelór aa waarahh ar qaro aga insláw. An aldakuút tidaádá' sleémeero taa tléhh. Ar kuúng taa tléhh ar dabaawók an gurií axweemamiís.

⁶ Dabaaeé' iga tleés amoorók i ale, an firiiriím. Muunaáeé' kuúng una sa waxiít, adór yaamaá naa xawslitiye'.

⁷ Áx AAKOÓ MUNGÚ, gaansluutáng, án mu/aywatsáng, aga mune sií'. Aníng mi alaá xu'usar, mawa /eét adór kudá' /e/etimá' baraá gi'ií ale.

⁸ Umuú matlaatleero gurhhooarók ngi ár, asma harahhifor'eé' aga gawaawók i qaás. Axáy loohír nir oh laqaamang, asma aníng muunaáeé' ngwa amoorók xu'ús uwa fiririim.

⁹ AAKOÓ MUNGÚ, án alee/iisáng dabaá wakuuseero! Án naa goów amoorók asma kuúng an dír guway'eé' as iwa baq.

¹⁰ Kuúng a Munguúeé'. Intsaahhatisáng ar kuúng ta sla' ngiwa tleehh. Qeeruuwók kudá' hhoó' án i geerahari, ar baraá loohír qoom!

¹¹ AÁKO waáy, án alee/iisáng ar adoodaádá' kuúng kara ó', ar gan'amuuwoge án tu/áng baraá slahh'amuuwo.

¹² Asma án kuúng iga slá', ar sla'aarír warqawaaká, wakuuser'eé' qwaareeseek, nee kudaádá' aníng iga baramaanuusiye' hhaamiseek, asma án a sagadiyusmoowók.