WARA'AMI 142 - Biblía Axweesantá Hhohho' ar Mungú 2004

Firo as alee/isaay

(Wara'amtá intsaahhatimis ar Daudi, qoomár iwa baraá mar'i. Firo)

¹ Án ar afor'eene AAKOÓ MUNGÚ un ateetiím, un fiririím as iwa /iisi.

² Aníng an dirósí qununuú/, slahh'amueé' sleémeero un dirósí oiím.

³ Qoomár diqyaá ya'aaeé' birna tsatiitiyé', adór án ni laaq inós ga xuu'. Baraá loohidaádá' án niwa hi'iimiita, tlakuuse án iga tsaaxweelír i qás gari lú/.

⁴ Bara qaytsiít bihhieé' awa doó /iyáy, heé án i /iís i kaahh, nee oo án xuúm i kaahh, amór ni goow i káhh.

⁵ AAKOÓ MUNGÚ, án kuúng u ateetiím, kuúng an dír guway'eé' ar saxmaar. Kuúng una gurií baá/ ta umuú gaaro baraá slafingw'eene.

⁶ /Aa/ee'eé' iiárií qaaseek, asma aníng taa ló'wa waaqaá'! Baraá dabaá baramaanuuseero tu/áng, asma i /uuruú koná' ta aninge.

⁷ Baraá tsegmuuwihe gweeráng, daqaní án kuúng u sluufiís, nee múk hota ganaá' aníng iri harweer, asma kuúng iga hhooeemaá i tléhh.