WARA'AMI 140 - Biblía Axweesantá Hhohho' ar Mungú 2004

Firo as baqmoó

(Wara'amtá Daudi)

¹ AAKOÓ MUNGÚ, án tu/áng dír múk tlakwe. /Iisáng dír múk xaraasla,

² kudá' muruú tlákw ngu qoomeemesá', inooín umuúqo daqto tlaahhi ngi qaminá'.

³ Tsifreeri'ine in tsu/uutiyá' adór dayshamoó qarkuú koóm, Baraá afer'ine gár ti'iimiit a qarkuú dayshe.

⁴ AAKOÓ MUNGÚ, án de'eemáng gawaá dabaá múk tlakwe. /Iisáng dír kudá' xaraasla'a, kudá' ado ngaa qoomeesiye' ar aníng iwa dahhiya'.

⁵ Múk tlákw ina tsaaxweelírí qaasiyé' ngiri lu/iyé', nee him'e ngaa qaasiyé' adór baratsufaay wa aleeró, tsaaxweeli ngaa qaasiyé' ngiri lu/iyé' afaá loohi, as tiwa oohár wa slai.

⁶ AAKOÓ MUNGÚ una báw, «Kuúng an Munguúeé'.» Kuúng AAKOÓ MUNGÚ, afór firor'eé' iiárií qaaseek.

⁷ AAKOÓ MUNGÚ, kuúng an Munguúeé', kuúng an ba/amusmooeé' oo úr. Sagw'eé' una báq qoomár slaqwaraaro.

⁸ AAKOÓ MUNGÚ, heé tlakusmo tidá' i slai ma haniisaar, nee tidá' tlakw ta qoomeemesi ma ya/aamaar iwa tleehharut.

⁹ Kudá' aníng i harwediitá' nee i baliitá', muruudá' tlákw afer'ine i aaina' inooín ngi inki/i.

¹⁰ Gil'ór asla ngi i ku'ut, ki kwahhi baraá bohóngw iwa baloó ti'iitiaaká.

¹¹ Foolusmo gár hhoo' mingiwa sláy baraaká' yaamuwo. Heé tlaákw ku giiri nee muruú tlákw as kuwa dahhi.

¹² A xuú' AAKOÓ MUNGÚ hee gun sakwasleemár ganaá' i tleehh. Nee múk liitlakwén gun hariímar'ínií sláy.

¹³ Múk gan'amú koóm umuuwók gun xirfayemiis. Múk hotangw'ín ganaá' tan hoot dinkwa nee kuúng.