WARA'AMI 14 - Biblía Axweesantá Hhohho' ar Mungú 2004

Tlakweemaá muu

(Wara'amtá Daudi)

¹ Daktana i baraá muner'ín i kat, «Mungú i kaahh.» Inooín sleémeero taa hhitiruumiít. Heé hhooeemaá tlehhiít i kaahh.

² AAKOÓ MUNGÚ muu gun i qaytsimiit gawaá doorií wa ale as ngiwa ari, axáy, i deéro heé sagalooár koóm, oo Munguú leelehhiít?

³ Muu sleémeero aa paásl baraá loohír Munguhe. Sleémeero naa hhitiruutiyé'. Heé hota ganaá' i kaahh tumu wák.

⁴ Xáy, múk tlakweemaá tlehhiít ku tsuwá xu'uti wásle? Ahaá, masta hoot ar muruú muk'eé' kuwa hayohin ar /uuru. Slám inooín AAKOÓ MUNGÚ ngu firirina'aaká.

⁵ Inooín tari da'ayuut, tay daaraax, asma Mungú iwa dinkwa nee múk hota ganaá'.

⁶ Múk tlakuuse i kángw heé liitlaákw amoqwaareemiis. Ala AAKOÓ MUNGÚ an dír guwaywós.

⁷ Masók ba/amár múk Israeli ni Siyonír dáhh! AAKOÓ MUNGÚ hariímár mukós birnga ki/ís, múk Israeli iri qwalalaa/, xwaylár Yakobo iri bará/.