WARA'AMI 139 - Biblía Axweesantá Hhohho' ar Mungú 2004

Xu'utír Mungú nee geerahartós

(Wara'amtá Daudi)

¹ AAKOÓ MUNGÚ, aníng kuúng iga tsee/ariín iri xú'.

² Bar iwiwiít nee bar sihhimiít, kuúng aníng i xú'. Iinslaway'eé' ugwa tsáhh amór saáw wa ale.

³ Aníng kuúng i tsee/ariín bar hi'iimiít laqaá bara qaát, nee lohduueé' sleémeero i xú'.

⁴ AAKOÓ MUNGÚ, tam dír nira ilawatsiiká kuúng /aymuú ni ooár wa slaa' u qaroó xú' kángw kilá' wa ale.

⁵ Aníng kuúng ina harwét alu nee geeraawo, dakók ugwa gawaaeé' qás as iwa baq.

⁶ Xu'utiirók i waa/oo/amór koón, aníng tsaahharo a aleeslawaaká, ka ló' wa ur.

⁷ Amór ni nahhaat a amoomá ar qeeruuwók iwa ariiká? Amór ni goow a amoomá ar kuúng uwa ilagoow?

⁸ Bara tsa/ám gawaá doori, kuúng a deer! Bara /eét baraá gi'i kuúng a deer!

⁹ Tam bar tlawa ar hhampe'eeri ay amoodá' looa iwa tsirarihh, tam bara hotaá awi ay alhhe'eesoó tlawi,

¹⁰ tam amorqae dakók i geerahaar. Dakók oo doó /iyáy aníng i oh.

¹¹ Bara oó', «Giwti aníng i tuuntuk, nee gwa/aateemadá' aníng i harweditá' i xweera tleehhitiye',»

¹² ala giwti gár i lu/ i káhh diroge, xweera i gwa/aatiyá' adór tlaatla/aangw, asma giwti nee gwa/aateema diroge a gár wák.

¹³ Asma kuúng slaqwtaeé' sleémeero ana tléhh, ina tléhh baraá guruú aayor'eéní alé.

¹⁴ Aníng kuúng u xirfayeemiís, asma iga tléhh ar adór waa/oo/amór koom nee ar dae tlaaq, tlehhmi'iiwók i waa/oo/amór koná'! Kuúng aníng i xú' ló' wa ale.

¹⁵ Fadueé' ki geetlakweeká diroge, qoomár án tiwa tleéhh ar sufa, án ina aán tiwa haragaás ar adór qoom baraá guruú aayor'eene.

¹⁶ Tam qoomár aníng tiwa laqwaliiká, ilaawók ina ariyé'. Deelór hotaeé' aga qoomés gooiro baraá kitaábuuwók i ale, dír aníng tira laqwaaliiká.

¹⁷ Mungú, inslawaywók ku ló'wa úr dir'eene, tsaahharo u aleeslawaaká. Ku ló'wa yaariír, tam faaroro i ya/anká!

¹⁸ Geera alók bur faarór awa ku ló'wa úr hhasaangw ba/a. Binda daarkiít naxés aníng nee kuúng aqo dinkwa.

¹⁹ Mungú, alók múk tlákw masók un qwaarés. Múk tseerdaá ku'umamiís masók ni quutliyá' dir'eene.

²⁰ Asma inooín muruú tlákw nguna daanduwók i axweesiyé', wakuuseerók umuuwók gu tawo muruú tlákw i kát.

²¹ Aá AAKOÓ MUNGÚ, mukdá' kuúng ugwa aahh aníng gár ngus aahhaaká? Nee kudá' aníng i buhhabuhhá' gár ngis i buhhaaká?

²² Ala aníng in kángw kilá' wa aáhh ar aahhír bo/, asma a wakuuse dir'eene.

²³ Mungú, aníng tsee/ariimáng, muunaáeé' xueek! Iiaaráng, iinslaway'eé' xueek!

²⁴ Áx tsee/aarimáng baraaeene, adór nir hoot i qoónda? Aníng geerahaaráng amór loohidá' amoorók kaw.