WARA'AMI 137 - Biblía Axweesantá Hhohho' ar Mungú 2004

Tsuunqumisuú baraá yaamaá dahaayu'uuma

¹ Ana iwiitaán afaá ya'aá Babuloni, Siyoni kawa iinslawaán ana /aa/amiimaán.

² Gidaandoorayrén una tarereaán, gawaá xaa'aá baraá Babuloni.

³ Asma kudá' atén taa lawaale tleehhiye', kana slaá' kiwa i daa'aan. Nee kudá' taa slahh'eemisiye', kana slaá' kiwa qwal/atisaan. Tawa kaahi, «Daa'angwdú baraá Siyoni bahh daa'aare'.»

⁴ Ahaá, adór daa'ángw AAKOÓ MUNGÚ ngur daa'aan, baraá yaamaá dahi'iimaro?

⁵ Aá Yerusalému, án kiíng bira gunqareés, daqaní dakw'eé' oo /iyáy i kongooi.

⁶ Afkwe'eé' i tawaraaki, án kiíng bira gunqareés, bar Yerusalemu aga uráy haniisiiká, ta ak qwal/uueé' kudá' ure.

⁷ AAKOÓ MUNGÚ, múk Edomu iinslaweek, adoodá' bál gixsár Yerusalemu kara hayóh, kudá' naa kaahiye', «Fee/aak, fee/aak, iihhafiirirós.»

⁸ Kiíng Babuloni, aga naká/ huuamaawo, heé amohhoó' a kudá' i li/áy buú', as adoodá' atén tira slahh'eemís.

⁹ Heé amohhoó' a kudá' na/iiwók gi ohiím, nee gi naasúw gawaá daanduú tlaa/a.