WARA'AMI 135 - Biblía Axweesantá Hhohho' ar Mungú 2004

Daa'ángw xirif as Mungú

¹ AAKOÓ MUNGÚ xirfayeemisaak, umuú AAKOÓ MUNGÚ xirfayeemisaak, kuungaásingaá sagadiyuuseerós, AAKOÓ MUNGÚ xirfayeemisaak.

² Kuungásingá' AAKOÓ MUNGÚ sagadiyuusá', AAKOÓ MUNGÚ xirfayeemisaak, nee awa baraá matla/ángw doó Munguúrén i diriiá'.

³ AAKO MUNGÚ xirfayeemisaak, asma inós ku hhoó'. Umuuwós sadaa'aak asma i sla'atimis.

⁴ Asma AAKOÓ MUNGUÚ Yakobo guna tsawaár tawa kós, múk Israeli guna tsawaár as nguwa mukós tleehhi.

⁵ Aníng a xuú' adór AAKOÓ MUNGÚ kur úr. AAKOORÉN munguaá hatlá' gi baa/ sleémeero.

⁶ AAKOÓ MUNGÚ tidá' inós gwa sla'atis ga tleehh gawaá dooriwo, nee baraá yaamuwo, baraá tlawi nee iloowós sleémeero.

⁷ Inós an kudá' huunkáy gu tlehhiít baraá yaamuú wa ale. Tluwoó mankarór koóm guri tleéhh, fur'a sleeme ngi huuw iimír didá' aa amohhe'eés wa ale.

⁸ Na/aá baris awa baraá yaamaá Misri gina tsuú/, awa muu nee awa makaywo.

⁹ Layu gina tlehhiít nee muruú waa/oo/amór koóm baraá tla/ángw yaamaá Misri wa ale, gawaá Farao nee sagadiyuuseerós sleémeero.

¹⁰ Xoordaá yaariir gina muúx, nee waawituú /uuremaá koóm guna tsuú/.

¹¹ Sihoni, waawutmoó yaamaá Amori, nee Ogu, waawutmoó yaamaá Bashani, nee waawitá sleémeero oo baraá yaamaá Kana'ani.

¹² Yaamuuín gina haniís as kiwa aali, aalír mukós Israeli.

¹³ AAKOÓ MUNGÚ, umuuwók i alhhe'eesoó konká. AAKOÓ MUNGÚ, kuúng tu alki/aa/iit nee qari sleémeero.

¹⁴ Asma AAKOÓ MUNGÚ mukós gu aleekalaa/, sagadiyuuseerós ga gurtláy.

¹⁵ Munguaá xoordu kina tleéhh ar peésa nee sahaábu, inooín a gadiyér dabaá muu.

¹⁶ I afér koná', ala i axweesiaaká. I ilaá koná', ala i xumisiaaká.

¹⁷ I iaá koná', ala i axamisiaaká, tam hiinsla i kaahh gawaá afer'ine.

¹⁸ Kudá' munguikaá lama ngi tlehhiitá' a slaqmís nee inooín, nee umuúqo heé gi harahhifa sleeme.

¹⁹ Kuungá' múk Israeli, AAKOÓ MUNGÚ diidi'iisaak, kuungá' múk doó Aroni, AAKOÓ MUNGÚ diidi'iisaak.

²⁰ Kuungá' múk doó Laáwi, AAKOÓ MUNGÚ diidi'iisaak, kuungaádá' AAKOÓ MUNGÚ ngu ilaiwawaa/á', AAKOÓ MUNGÚ na diidi'iisaak.

²¹ AAKOÓ MUNGÚ i xirfuuti iimír Siyonír wa ale, inósudá' hoót Yerusalemúr wa ale. AAKOÓ MUNGÚ xirfayeesaak!