WARA'AMI 132 - Biblía Axweesantá Hhohho' ar Mungú 2004

Daa'ángw xirif as Doó Mungú

(Daa'ángw ta daa'a'ati tawa Siyonír i tsa/a/an)

¹ AAKOÓ MUNGÚ, Daudi inslaweek, baraá slahh'amaayeerós tidá' aa saqiqtlini.

² Adoodá' lo'o ngira /aáy as AAKOÓ MUNGÚ, inós lo'o gana /aáy as kudá' Aleesleemuú koóm oo Yakobo.

³ Ina oó', «Aníng a dahaaká baraá dooeé', tam sleeme a tsa/amaaká gawaá qatanir'eé'.

⁴ Aníng gu'ute i otká, tam a mafisaaká,

⁵ ay dír hotaá AAKOÓ MUNGÚ ngay slaw, dír hotaá Kudá' /Uuruú koóm oo Yakobo.»

⁶ Qaytsiít, kaangós una axaasaán baraá gixsár Efrata wa ale. Una araán baraá qamaá Yearimuro.

⁷ «Gusé', a dahaán baraá do'ós kudá' i hooti. A tumbararaa'ataán dír kitángw ya'aawós ngi qamaamin!»

⁸ AAKOÓ MUNGÚ, sihhiitáng qwaláng amór do'ók kuduú hungu/umaawók, kuúng nee sandakmoó alqado, kuduú /uuruuwók gu laqaám.

⁹ Kaahamuuseerók ka tuuntuuki ar gan'amu. Mukók kudá' hhohhó' i baraa/ ar qwala/.

¹⁰ As daanduú sagadiyusmoowók Daudiwo, waawutmoodá' kuúng taa iimbaláx ar di/i mu siaar.

¹¹ AAKOÓ MUNGÚ Daudi guna al'axweesantá ló' i oó', slám i alií ki/iiká al'axweesantadá' ngiwa warqeesi, iwa kaahi, «Baraá daaqaywoge garmoó wák u iwiitiís gawaá kitaangók oo waawuti'iima.

¹² Daaqaywók barnaxés alqador'eé' nee axweesante'eé', tidá' naa intsaahhatís ngaa iialooeesiyé', daqaní daaqay'ín sleeme i iwiit gawaá kitaangók oo waawuti'iima ay alhhe'eesay wasle.»

¹³ Asma AAKOÓ MUNGÚ yaamaá Siyoni gaa tsawaár, as iwa baraadií hotaá ay,

¹⁴ «Diirí an dir'eé' ar amohhoo' ar alhhe'eesoó koomaaká. Diirí an hoót asma aga waatlakweés.

¹⁵ Muruú /aymaarós sleémeero oo baraadá' u tsuúq, narkuuteerós a aaxiís.

¹⁶ Kaahamuuserós ka tuuntuuk ar ba/ama. Nee mukós kudá' hhohhó' iri baraa/ ar qwala/.

¹⁷ Baraadae oo wák baraá xwaylár Daudiwo un waawutmoó úr tleéhh, tsaa'asi a amohhe'eés as kwe'eé' kwí naa iimbalaáx.

¹⁸ Wakuuseerós an tuuntuúk ar mureekesaay, ala Daudi un slamángw waawuti'iimárií dahaás.»