WARA'AMI 122 - Biblía Axweesantá Hhohho' ar Mungú 2004

Xirfuú Yerusalemu

(Daa'ángw aa'aá deelór ur ar qwal/amaaye)

¹ Ana qwalaá/ tiwa báy, «Góh amór DOÓ AAKOÓ MUNGÚ.»

² Aá Yerusalému, atén aga sihhitaán baraá guruú Do'ók.

³ Aá Yerusalému, kiíng taa tleéhh adór gixsár taa nigihhiitís.

⁴ Tlahh'ii ni amoorógí tsa/aná', tlahh'aá AAKOÓ MUNGÚ, as umuú AAKOÓ MUNGÚ nguwa sluufisiya', adoodá' AAKO ngira oó' dír Israeli.

⁵ Diirí an didaádá' kiteeraá sakwasleema ki qaás, an kiteeraá waawituú tlahhoó Daudi.

⁶ Yerusalemu aleefiririmaak i waydúr hot. «Mukdá' sleémeero kiíng i slaá' ta hooti ar amohhooa.

⁷ Wayda i deeruuti baraá slumtá koo/ír gixsaroge, Amohhooa i deerut baraá maraá geeraharuuseroge.»

⁸ As daanduú hhaee'eé' nee mar'eefoeene, aníng an oo' dír Yerusalemu, «Wayda masók i baraawók!»

⁹ As Doó AAKOÓ MUNGÚ, Munguúrén, iwa baraawók i dirii'i, aníng a firiím as tawa hot ar amohhooa.