WARA'AMI 12 - Biblía Axweesantá Hhohho' ar Mungú 2004

Firo as alee/isaay

(Wara'amtá Daudi)

¹ AAKOÓ MUNGÚ, gaansluutáng, ti ba/amis, asma awa hota ganaa'á' i kahhiyá', asma baraá muko múk inkihhím i kaahh.

² Sleémeero axweesanay'ín a axweesanoó lama. Afer'ine a waaqoduuse nee baraá muner'ine a al/aymuuse.

³ AAKOÓ MUNGÚ waaqoduuse ngi xasltisi, nee afér daar/uuse ngi tseegi,

⁴ kudá' kaahá', «Atén arba/ati a slawaán ar axweesantarén. Afeerén tin alee/ís, heé ti arbaá/ a heemá?»

⁵ AAKOÓ MUNGÚ i kaahi, «Asma liitlakuuse kawa baraamaanusi nee narkuute iwa wa/aa/us, aníng daxta ni hardáh, aníng kudá' i harahhiifá' i amohhooárií haniís.»

⁶ Al'axweesantá AAKOÓ MUNGÚ a ló', nee i ganá'. Ka hhohho' adór muqslír /awaak ar taa kwahhuút ar baraá asla, adór muqslír /awaak ar taa kwahho hhe'eés sagaá wa faanqw.

⁷ AAKOÓ MUNGÚ, atén ti de'een, nee ti baq dír qartihe.

⁸ Tlakuuse i harweeririín umuúqo diiro. Umuúqo heewo i tlakweemaá xirfayeemiis tla/ángw múk wa ale.