WARA'AMI 118 - Biblía Axweesantá Hhohho' ar Mungú 2004

Sluufaay as arba/ati

¹ AAKOÓ MUNGÚ xirfayeemisaak, asma ku hhoó', sla'aarirós ar warqawaaká i kumamít kureerisleém!

² Múk Israeli ta ooi, «Sla'aarirós ar warqawaaká i kumamít kureerisleém.»

³ Na/aá Aroni ta ooi, «Sla'aarirós ar warqawaaká i kumamít kureerisleém.»

⁴ Kudá' AAKOÓ MUNGÚ ngwa haratlintii'iye' ta ooi, «Sla'aarirós ar warqawaaká i kumamít kureerisleém.»

⁵ Baraá slahh'amueene AAKOÓ MUNGÚ una i /aá/, inós iri iiárií qaás, iri amohhooári haniís.

⁶ AAKOÓ MUNGÚ i bartaeé', heé ni da'ayuumiit a heemá? Hee aníng mi /iis?

⁷ AAKOÓ MUNGÚ i barte'eé', i alee/iimiis, aníng wakuuser'eé' an ár adór ngira arbaá/.

⁸ A gár hhoo' AAKOÓ MUNGÚ kuwa haragop, ta hee kuwa harahhifa.

⁹ A gár hhoo' AAKOÓ MUNGÚ kuwa haragop, ta geeraharuusér yaamu kawa harahhifa.

¹⁰ Múk xoordu ina harweér, ala ar /uuruú AAKOÓ MUNGUHE ngiri baál!

¹¹ Tina harweér umuú barto, ala ar /uuruú AAKOÓ MUNGUHE ngiri baál.

¹² Ina /amatseegiyé' adór ba'arír wa ale, ala kiri hhaamiís adór xwaansloó baraá asla, ar /uuruú AAKOÓ MUNGUHE ngiri baál.

¹³ Tina /amatseék ló'wa ale, tay lak baál, ala AAKOÓ MUNGÚ ina alee/iís.

¹⁴ AAKOÓ MUNGÚ an /uuruueé' nee daa'angw'eé', inós ina ba/amís.

¹⁵ Iiárií qaasaak, afór qwala/ ar múk naa baalin, baraá heemaduudaá múk ganaa'a, «AAKOÓ MUNGÚ ar /uuruwose muruú waa/oo/amo gwaa tleéhh!

¹⁶ /Uuruú AAKOÓ MUNGÚ ugwa ar baalimaán! AAKOÓ MUNGÚ ar /uuruwose muruú waa/oo/amo gwaa tleéhh!»

¹⁷ Aníng a gwaa'aaká ala an slaáf, nee tlehhma'aá AAKOÓ MUNGÚ ngay alki/iít.

¹⁸ AAKOÓ MUNGÚ iga ló'wa slahh'eés, ala iga mayká niwa gwaa'.

¹⁹ Afkú Doó Mungú dir'eéní gweerang, as niwa dah, AAKOÓ MUNGÚ nguri sluufmiís!

²⁰ Afkú Doó Mungú kwí an kudá' múk ganaá' ir oohi.

²¹ AAKOÓ MUNGÚ án kuúng u sluufiís, asma iga iiárií qás, nee iri ba/amís.

²² Tlaa/ár qwatsiiruuse aa sí', aa tlaa/ár ur tleehhít ar do' ir gawduy.

²³ Gaarí an tidá' AAKOÓ MUNGÚ aa tleéhh, a gár ló'wa waa/oo/amo dír ilaarene.

²⁴ Baalaarí an tidá' AAKOÓ MUNGÚ aa tleéhh. Gimsé', baraa/aré' nee qwalaala/aaré'.

²⁵ Atén ti ba/amis, AAKOÓ MUNGÚ, u firimaán, ti ba/amis! AAKOÓ MUNGÚ, na'amamís arba/ti haniisang!

²⁶ AAKOÓ MUNGÚ ngu tsuuqi kudá' hardáh ar umuuwós. Tsuuqa slawaak, kudá' amór doó AAKOÓ MUNGÚ dahhá'.

²⁷ AAKOÓ MUNGÚ inós an Mungú, inós atén taa diihhooatís. Haleemo oohare', bara/ iimu/uumare', ti koomakoonde' ay dír kitángw ilahhooa kawa hanmamisi.

²⁸ Kuúng a Munguúeé', u sluufmiís, u diidi'iimiís, Munguúeé' a kuúng.

²⁹ AAKOÓ MUNGÚ sluufmiisaak asma ku hhoó', asma sla'aarirós ar warqawaaká i kumamít kureerisleém.