WARA'AMI 115 - Biblía Axweesantá Hhohho' ar Mungú 2004

Munguú ló' a wak Kilós

¹ A ateneeká, AAKOÓ MUNGÚ, a ateneeká, ala kuúng kilók na xirfuút, as sla'aarirók ar warqawaaká nee inkihhimuwók.

² Múk xoordaá hatlá' misti yaahamiis, tawa kaahi, «Munguúhúng i amá?»

³ Munguúrén i gawaá doori, umuúqo gár i slai gan tleehh.

⁴ Munguii'ín kina tleéhh ar peésa, muqsla nee sahaábu, a gadiyér dabaá muu.

⁵ I afér koná' ala i axweesiaaká, i ilaá koná' ala i xumiisiaaká.

⁶ I iaá koná' ala i axamiisiaaká, i dungér koná' ala i tsa'amina'aaká.

⁷ I dabaá koná' ala i kwatimiitiaká, ya'a'ngi mak koná' ala i hii'imitiaaká. Ilawatsa ngi baloó aslay'aaká.

⁸ Kudaádá' ngi tlehhahhitá' a slaqás nee inooín, sleeme nee kudá' sleémeero ngi harahhifa'a.

⁹ Kuungá' múk Israeli AAKOÓ MUNGÚ harahhifaak, Inós nu alee/iimiis nee nu baqamín.

¹⁰ Múk guruú doó Aroni harahhifo qaasaak dír AAKOÓ MUNGÚ. Inós nu alee/iimiis nee nu baqamín.

¹¹ Kuungaásingá' AAKOÓ MUNGÚ ngu ilaiwawaa/á', AAKOÓ MUNGÚ harahhifaak. Inós an kudá' kuungá' nu alee/iimiís nee an baqmorhúng.

¹² AAKOÓ MUNGÚ atén ti inslasláy, nee tin tsuuq. Múk Israeli gun tsuuq, nee xwaylár Aroni sleeme gan tsuuq,

¹³ Kudá' inós ngu ilaiwawaa/á' gin tsuuq, múk urén nee na/iiwo gin tsuuq.

¹⁴ AAKOÓ MUNGÚ nu na/ií haniisi, kuungá' nee na/iihunge!

¹⁵ AAKOÓ MUNGÚ nu tsuuqi, oo doori nee yaamu gaa tleehh.

¹⁶ Doori awa AAKOÓ MUNGÚ, ala yaamu gina haniís dír muu.

¹⁷ AAKOÓ MUNGÚ ku xirfayeemamisiiká nee tu'u, ku xirfayeemisiiká nee heé aa /eet baraá gi'í alé.

¹⁸ Ala atén AAKOÓ MUNGÚ un diidi'iimisaán, iimír hamí ay kureeraá kureér. AAKOÓ MUNGÚ xirfayeemisaak!