WARA'AMI 112 - Biblía Axweesantá Hhohho' ar Mungú 2004

Qwal/amaayér heé hhoó'

¹ AAKOÓ MUNGÚ xirfayeemisaak. Heé amohhoó' a kudá' AAKOÓ MUNGÚ gu ilaiwawaá/, kudá' hara'ayaarós ga sa qwalalaá/.

² Na/iiwós i diihhe'eesiyá' baraá yaamuwo, xwaylár múk hhohhó' ka tsuuq.

³ Dooine daqaari'iima i deer, nee muruú yaariír. Gan'amuuín i kumamiit ay kureerisleém.

⁴ Heé hhoó' gwa/aateema ngun i gwa/aatiyá' baraá giwtírí alé, inós i gurtleemuú kón nee gurhhooa nee gan'amu.

⁵ Heé hhoó' a kudá' múk dahi'iimiís, nee muu i kirkiti, kudá' muruuwós gu qoomeemeés ar adór ganaa'.

⁶ Heé tlehhmi'i hhó' gár gur baa/ i káhh. A heé ta inslaslay umuúqo daqto.

⁷ Gár tlaakw binga axaás i da'ayuumiitiiká, muunaáwós i kwareeiiká, AAKOÓ MUNGÚ gwaa harahhifoorós i qaás.

⁸ Baraawose i kwislmiitiiká, slám i da'ayuumiitiiká. Ga xuu' kángw kilá' wa ale adór wakuuseerós ngir ba/i.

⁹ Muu gun qaqáy ar muunuú /awaák, narkuute gan qaqáy tawó ale. Gurhhooarós i baloó fakaká. Heewí ku aleesleemuú i haniis nee slám ku ilaiwawaa/.

¹⁰ Múk tlákw kaangwí bur ngwa ár tan buuhh. Inooín ngun /atlií /ayiyá' asma adoodá' kawa sií' ala nari ilaá wá qwaariyá'. Harahhifór heé tlaákw i payshút.