WARA'AMI 11 - Biblía Axweesantá Hhohho' ar Mungú 2004

Mungú a harahhifor'eé'

(Wara'amtá Daudi)

¹ AAKOÓ MUNGÚ an dír guway'eé'! Adór kar qitla' aníng iwa beera', «/Akuút adór tsir/ír wa ale ay gawaá tlooma.

² Ga/aaweek adór tlakuuse ga/alduín ngira uuruxiyé', maheeri kaa qaás gawaá ga/aldu, as kudá' mune ganaa'á' kiwa tlaquuti baraá giwtír wa ale.

³ Barnaxes kángw yaamaá eemeét bira warqáy, heé gan'amúr hoót adór i laqi?»

⁴ AAKOÓ MUNGÚ i baraá Do'ós kudá' hhoohhoó'. Kitángw AAKOÓ MUNGÚ i gawaá doori. Muu gu ga/áy ilaawose. Umuúqo gár muu i tlehhiiti ga xuu'.

⁵ AAKOÓ MUNGÚ múk hhó' nee tlakuuseero gin alqaytsimiit. Múk dabér eeharaharaaká gun ahhiit.

⁶ Tlakuuse gan gil'ór ásltií ku'uus nee tsángw aslto. Fur'ár dooraá kaahaar an slahhta'ín.

⁷ AAKOÓ MUNGÚ i gan'amuú kón nee hotaá ganaa'á' gi slaa'. Múk ganaá' inós ngu ariyá'.