WARA'AMI 109 - Biblía Axweesantá Hhohho' ar Mungú 2004

Qununu/oó heé baraá slahh'amaaye

(Wara'amtá Daudi. Daa'aangw)

¹ Aníng a kuúng xirfayeemiís, Mungú, ma xasliitaar!

² Múk tlákw nee oo al/aymuuse ta aníngí slaaqw, lama ngin daandueé' kaahiyá'.

³ Muruú tlákw ngun gawaaeé' kaahiyá', in i slaqwiyá' tawó alé.

⁴ Handá' aníng inooín ina mak slaá', ala ina sakwasleemuutiyé', tam adoorihe ina aleefiririím.

⁵ Hhooeemaeé' kin tlakweemaaín ar bu'ún, nee sla'aarir'eé' kan aahhir'ín ar bu'ún.

⁶ Heé tlaákw qaaseek kwasleemár wakusmooeé' wa ale, wakuusmooeé' ku sakwasleemuti nee heé nee inós ti waká'.

⁷ Burkwa sakwasleemuút ku tlakusmoó wa tsaahhi. Qoomár bar ti aleekalaa/án ku tlakweemá hatlá' i tsa/aasi.

⁸ Deelór slafiingós ka niinaweesi, heé hatlá' gadiyeérós ngi hayohi!

⁹ Na/iiwós ngi panaay geexay, nee hareerós i kwaali'it!

¹⁰ Na/iiwós i haleleeitiye' nee i pasltár hi'iimitiye', ki gusiisin baraá taangwaá maray'ín wa ale!

¹¹ Heé gu gár wá iinuús umuú gár i kona ngi hayoohi, muruudá' sleémeero aa hamér wa xiínts, dahaaye ngur tleer!

¹² Heé gu gurtláw masók i kaahh, laqaá tam oo na/iiwós kudá' panaay gi amohhe'eemiís i qwaari.

¹³ Xwaylarós sleémeero i qororo'ot, umuuwós ku gunqareesi nee qartá itlaw.

¹⁴ AAKOÓ MUNGÚ tlakweemaá taati'iiwós ngi inslay, tlakweemaá aayírós mikiwa baloó gurtláy!

¹⁵ AAKOÓ MUNGÚ tlakweemaaín ngi inslaslay umuú daqto, ala inooíná kilá' ki gunqareesi baraá yaamuwo.

¹⁶ Asma tlakusmoowí gurtleemu gu baloó gaárí xuiiká, aqo narkuute gan hara/untsín gay tsuu/, múk gár koomaaká nee múk aa diqay tsatiit.

¹⁷ Muu gun lu'umamis, gimáy, lo'o inós kilós ngu /ak. Ga slaiiká múk hatlá' tsuuqa ngiwa slay, gimáy, tsuuqa mingiwa sláy.

¹⁸ Dirose lo'o a adór tlawú tsitaay, ala lo'o ngu i dat adór ma'aá wahángw wa ale, i dat baraá waeemaá faduuwós adór di/tá wa ale.

¹⁹ Lo'o ngu untsus adór tlabaá wa ale. Nee ngu tsek adór siinootáy wa ale.

²⁰ AAKOÓ MUNGÚ mukdaádá' aníng i sakwasleemuút tí ngi slaye', mukdaádá' muruú tlákw gu aaiím daandueene.

²¹ Kuúng Aakoó Mungú, Aakooeé', tidá' kuúng ta sla' aníngí tleehhang ar hhooeemaá sla'aarirók ar warqawaakahe aníng tu/áng.

²² Aníng a narkutmo nee oo gaa wásl, taa slahh'eés ay baraá muunaáeé'.

²³ Ana ilaá wa qwaár adór geehhantmoó tsiindo wa ale, tina kwaáhh adór tsaxwaay.

²⁴ Gurungeeri'eé' naa wanana'atiyé' as niwa gwaawawiím, gár aa met a fadu nee kaahari.

²⁵ Aga gár niqaay tleehhiít dír muko, bir taa ár, sager'ín kan mumukumiis ar waaqa'ama.

²⁶ Alee/iisáng AAKOÓ MUNGÚ, Munguúeé'. Ba/amisáng ar sla'aarirók ar warqawaaká.

²⁷ Wakuuser'eé' xu'utiseek adór gaarí tar dakók oo aníng iga ba/amis. Tí ngi tsaahhiye' adór kuúng kara tléhh.

²⁸ Muu maweek i lu'umisi, ala kuúng aníng na tsuuqáng, kudá' amor'eéni slaqwá' ki mureekeesi. Anuú sagadiyusmoowók ni qwalaá/.

²⁹ Wakuuser'eé' ka tsi'isi, mure ngi tsiitiye' adór tlawú wa ale.

³⁰ AAKOÓ MUNGÚ un ló' wa sluufmiís ar afkwe'eé'. U xirfayeemiís tla/ángw múk yaariír wa ale.

³¹ Asma inós heé gaa wásl gun aleekal/án, as nguwa tu/i dír mukdá' gwaa sakwasleemár gwa'arár i tsati.