WARA'AMI 107 - Biblía Axweesantá Hhohho' ar Mungú 2004

KITAÁBUÚ KOOÁN ( War 107—150 ) Munguú hhooeemaá koóm i xirfuuti

¹ «AAKOÓ MUNGÚ sluufmisaak, asma ku hhoó', asma sla'aarirós ar warqawaaká i kumamít ay alhhe'eesáy wasle.»

² Mukdá' AAKOÓ MUNGÚ aa ba/amís sluufaywí ngu ooiye', kudá' aa tuú/ baraá dabaá wakuusér wa ale.

³ Mukdá' aa burumbuúr baraá yaamu sleémeero wa ale, da/aáw nee /uwawo, /iya nee basko.

⁴ Bahh'alé nina baraá darmuú wa harweerariné', loohír tar hardihi baraá gixsár tawa hooti kaa slayká.

⁵ Tana qwariít nee tana waxiít, tari mune sií'.

⁶ Baraá slahh'amuine AAKOÓ MUNGÚ kuri i /aa/amín, inós giri ba/amís baraá slahh'amaayer'ine.

⁷ Gina geerahaár ar baraá loohír ganaa', tari hardáh ay dír gixsár ta hooti.

⁸ AAKOÓ MUNGÚ ngu sluufmisiye', asma sla'aarirós ar warqawaaká, asma muruú waa/oo/amo oo aa múkií tlehhiít.

⁹ Inós kudá' waxiitá' gin waxe tse'ees. Awa qwariitá' gin aaxiis muruú hhoe.

¹⁰ Bahh'alé tana hoót ar deewa'ame nee baraá wa/ángw giíw, kina slahh'eemiís ar tsegmuú muqsla.

¹¹ Asma axweesantá Mungú ngina si'iyé', gurbu'úngw Munguú Gáwtí dirií' nguna si'iyé'.

¹² Mungú giri slahh'eemiís ar gadiyér gawit as ngiwa naanaaqi, niwa diqiya' tsatiitiyé', heé gi aleeáw iri qwaár.

¹³ Baraá slahh'amuine AAKOÓ MUNGÚ kuri i /aá/, inós giri ba/amís baraá slahh'amuú wa ale.

¹⁴ Giri duúx baraá deewa'ameero nee baraá giwtiro, nee muqsladá' kira tsegiít gari giqáy.

¹⁵ AAKOÓ MUNGÚ ngu sluufmiisiye' asma sla'aarirós ar warqawaaká, asma muruú waa/oo/amo oo aa dir'ín i tlehhiít.

¹⁶ Inós afkú doó muqslír sirdaa/aat gu aleesláy nguwa geeqay, nee muqsladá' tira tsegiít ngiwa tlaaqi.

¹⁷ Bahh'alé tana daktu'umiít asma dee/aanuín, niri slahhahhaiyé' as tlakweemaaín.

¹⁸ Muruú /ayma dir'ine /etaangw gway sií', qatlo kay i nakaá/.

¹⁹ Baraá slahh'amuine AAKOÓ MUNGÚ kuna i /aá/, inós giri ba/amís baraá slahh'amuine.

²⁰ Giri hungu/uús ar axweesantós, giri ba/amís baraá qwanaywo.

²¹ AAKOÓ MUNGÚ ngu sluufmiisiye' asma sla'aarirós ar warqawaaká, asma muruuduú waa/oo/amo aa dir'ín i tleéhh.

²² Inooín ngu sluufisiye' ar ilahhooár muruú ta tsu/i, nee tlehhmi'iiwós ki alki/iiti ar daa'ángw qwala/.

²³ Bahh'alé baraaine tana aa'aá káy ar meéli daanduú tlawtár ale, halaanu'uuma ngina tleehhiyé' ar hi'iitanór baraá tlabeemaá uren.

²⁴ Tlehhmi'iidá' uren awa AAKOÓ MUNGÚ aa tleéhh ngaa ariyé', tlehhmi'iiwós kudaá waa/oo/amo aa tlehhiít baraá tlawtá wa ale.

²⁵ Ina ilawaáts, bambaao niri hardát, gwaanduú ma'aay iri sihhiít.

²⁶ Meélir'ín kana gáwtí kwaáhh nee gwaanduú ma'aay, kingiri ki/ís ay baraá guruú ma'aay, gur'ér muu ma'aay ngay niiqiyé' de'eero.

²⁷ Kina baraadá' wa kwaakwaáhh nari ta/maamitiyé' adór múk aa oonimiit, fuqurangw'ín oo hi'iitanór baraá ma'aay iri faák.

²⁸ Baraá slahh'amuuine AAKOÓ MUNGÚ kuri i /aá/, inós giri ba/amís baraá slahh'amuuine.

²⁹ Bambaaór baraá tlawi gari xasltís, gwaanduduú ma'aay sleeme oo xaraásl guri xasltís.

³⁰ Inooín tari qwalaá/ tlawi iwa xaslít, giri hardahaás didár yaamaá kaahaar ar ta kay.

³¹ AAKOÓ MUNGÚ ngu sluufmiisiye', asma sla'aarirós ar warqawaaká, asma muruuduú waa/oo/amo aa dir'ín i tleéhh.

³² Ku diidi'iimisi nee múk dinkwár i dirií', ku diidi'iimisi nee dinku'uumár bariise.

³³ Mungú yau gina warqeés nay xaanxaay tleehhitiyé', kutli gari kahaás,

³⁴ yaamaá xawuú koomá' giri warqeés tari hhapér diwi, asma múk tlákw oo baraadá' hoót.

³⁵ Xaanxaay guna warqeés tari xatstá ma'aay, nee yaamaá kaahaar tawa kutlitá ma'aay.

³⁶ Múk qwariít guri baraadí huúw, inooín gixsár ta hooti kari tleéhh.

³⁷ Qamu kina doósl, sabiíbu kuri dahaás, bu'úngw úr kuri sláy.

³⁸ Mukós guri tsuúq, tari ló'wa laqwaál, muruu'ín oo de'eengw iri tleemaá'.

³⁹ Qoomár niwa /aaruyé', niri niinawuyé', asma kiwa baraamaanuús, nee kiwa slahh'eemiís nee gurhaami.

⁴⁰ Mungú wakuuser'ín gari waaqaqaá', gari harweertamamiís baraá xaanxoó loohi wásl.

⁴¹ Ala narkuute gana ba/amís baraá slahh'amuuine, mar'eefooín giri doók adór daqtá bee/aangw.

⁴² Múk hota ganaá' adoorí gan tsatsahhán, nee i qwalalaa/, ala múk tlákw sleémeero kwa xasltís.

⁴³ Múk sagalooár koóm muruuwí ku alqaytsiti, nee kawa tsaahhi sla'aarír warqawaaká ar AAKOÓ MUNGÚ.