WARA'AMI 106 - Biblía Axweesantá Hhohho' ar Mungú 2004

Hhooeemaá Mungú dír mukós

¹ AAKOÓ MUNGÚ xirfayeemisaak! AAKOÓ MUNGÚ sluufmisaak asma ku hhoó', asma sla'aarirós ar warqawaaká i baloó fakká!

² Muruudá' urén sleémeero oo AAKOÓ MUNGÚ aa tleéhh heé uingo gu aleesláw a heemá? Heé xirfuuwós alki/ituuwo gu aleesláw a heemá.

³ Múk amohhoó' a kudá' sakwasleemár ganaa' ngi boo/eemiisá', kudá' umuú daqto muruú qoóm gu tlehhiít.

⁴ Aníng inslawáng, AAKOÓ MUNGÚ, mukók bur hhooeemaawógí tlehhít, alee/iisáng qoomár bar mukók ba/amiimís.

⁵ As kahhó' amohhooár mukók ngiwa ar, as kahhó' qwal/uú xooroorók nguwa saqwalalaa/, as kahhó' án nee mukók tawa alxirfuutaan.

⁶ Atén nee xwayliiteérene tlakweema iga tleehhaán, iringeé aga tleehhaán, atén aga dakuusaán.

⁷ Taati'iirén qoomár iwa baraá Misri, waa/oo/amoodá' Mungú aa tlehhiít kaa gaárí xuiiká. Yaareemaá sla'aarirók ar warqawaaká ngaa inslay'iiká. Ala Munguúdá' úr ngway aahhiyé' tawa afaá tlawtá Shamu dirii'i.

⁸ Ala tam adoorihe gina ba/amís as umuuwós, as aleesleemuuwós oo úr nguwa laqan.

⁹ Tlawtá Shamu gana iigahhaát iri kát, giri tla/angwdár waarahhaás adór yaamaá xaanxaay.

¹⁰ Gina ba/amís gawaá dabaá mukduú wakuusér wa ale, giri hingeés dír /uuruú wakusmooine.

¹¹ Wakuuser'ín kari guú/ nee tlawi, tam panmo aa meetiiká.

¹² Mukós axweesantós gay haratlintií', daa'ángw kur xirfayeemisi kuri daá'.

¹³ Ala gadiyeédár Mungú ngari gaanslár gunqareesiyé', tam gurbu'ungós ngwa dani'iiká.

¹⁴ Ilatleeri giri eér tawa baraá darma, Mungú nguri iiara'ariyé' baraá xaanxáy wa ale.

¹⁵ Giri qáy tidá' na firni'i, ala tiqtír tlaakw gari dir'ín i huúw.

¹⁶ Baraá xafaywo muu Mose guri da/itá wa ár, tam Aroni, kudá' hhoohhoó' oo AAKOÓ MUNGÚ.

¹⁷ Qoomaadae yaamu nari gweeritiyé', Datani nguri gu/iyé', Abiramu nee daqtose ngway fooliyé'.

¹⁸ Eeharuuser'ín asla giri i /ét, mukdá' tlákw asla guri /ák.

¹⁹ Damár sahaábu kana tleéhh amór Horebu, murslaaqatuú taa tleéhh nguri sluufmisuú ayé'.

²⁰ Xirfuú Mungú kuri warqeés, ar murslaaqatuú adór damár gitsór /aay.

²¹ Munguúdá' gaa ba/amis ngwa gunqareesiyé', kudá' muruú waa/oo/amo gwa tleehh baraá Misrír wa ale,

²² gadiyér waa/oo/amo ar aa tleéhh baraá yaamaá Hamu wa ale, nee muruú dae tlaáq oo aa tleéhh dír tlawtá Shamu wa ale.

²³ Mungú iri oó', «Mukwí u hhaamiís.» Ala Mose kilós sagadiyusmoowós kudá' aa tsawaár, ina tla/angwdií sihhiít as Mungú nguwa har'oohi kahhó' mingiwa hhaamiís.

²⁴ Yaamuudá' hhoohhoo' ngiri waaqaaiyé', asma al'axweesantá Mungú nga haratlinti'ii'iiká.

²⁵ Tana qununu/umamiít baraá heemaduú wa ale, tam AAKOÓ MUNGÚ ngwa iiárií qaasi'iiká.

²⁶ Mungú dakós guri tleés giri iigahhaát, lo'o gari /aáy iri oó', «I baraá xaanxáy i qwaareés.»

²⁷ Na/ii'ín awa ta laqwaali, in tsiyayaáx baraá yaamaá múk xoordaá hatlá', ngiri diyaá/ baraá yaamu sleémeero.

²⁸ Aluuwo niri haragwaaiyé' dír múk Ba'ali gu sluufmiís baraá yaamaá Peoriro, fu'unaá ilahhooár muruú taa tsuú/ dír gi'i ngiri /ayiyé'.

²⁹ AAKOÓ MUNGÚ nguri buhhtisiyé' ló'wa ale ar tlehhmi'ii'ín. Tiqtír pu/i iri /ét baraá tla/angw'ín.

³⁰ Ala Finehasi ina sihhiít, muu nee Mungú giri haraki/ís, Mungú tiqtidá' gari hingeés.

³¹ Tí kan inslasláy as ilaiwa/ameerós, iimír qoomaadá' nee qooma sleémeero.

³² Mungú kuna buhhtís dír ma'aá Meribár wa ale. Mose slahh'amu guri sláy as inooín.

³³ Mose nguri buhhtisiyé' ló'wa ale, iri axweés ar sagawasle.

³⁴ Múk xoordaá hatlá' ngwaa tsu/ii'iiká, adoodá' Mungú inooín ngira hara'ayín,

³⁵ ala tina haragwaiyé' nee múk xoordaá hatlá', kiri dawaqaás nee múk xoordaá hatlá' tlehhmi'ii'ine.

³⁶ Slaqsa'aá mungui ngiri sluufmisuú ayé', tlehhmuuwí iri tsaaxweeli tleehhiít dir'ine.

³⁷ Daaqay'ín nee dasuuín ngiri tsu/iyé', as kiwa ilahhooár wa hanmiisi dír neetlaame.

³⁸ Tseerér múk dakuús wásl kana tawo ku'uús, tseerér daaqay'ín nee dasuuín, kudá' taa ilahhoár wa tsuú/ dír slaqsa'aá munguaá múk Kana'ani, yaamu kiri tsixitúr áy.

³⁹ Gawaá adoorihe nari daba' tlakweemiisiyé' as tlehhmi'ii'ín, inooín naa inkihhimu wasleesiyé' dír Munguhe nari fuquusiyé'.

⁴⁰ AAKOÓ MUNGÚ iri qa/iít buhhtaawo gawaá mukós, kuri ló'wa mune duúx nee mukduú aalirós.

⁴¹ Giri afaweeriís dír xoordaá hatlá', as kahhó' kiwa sawaawuti'in nee wakuuser'ín.

⁴² kiri baramaanuús nee wakuuser'ín, gadiyér /uuruú koom ngiri tleehhiyé'.

⁴³ Mungú mukós guna ba/amís daqtá yaariire, ala inooín gár naa tsawaariyé' a Mungú nguwa si'iya', niri ak hhané' baraá tlakweema.

⁴⁴ Ala tam adoorihe Mungú slahh'amuuín guna gaárí xuú', qoomár /aa/eeín ngiwa axaás,

⁴⁵ alqadoorós gana insláy as inooín, muneerós gari guú/, asma yaareemaá sla'aarirós ar warqawaaká.

⁴⁶ Kudá' sleémeero inooín ngaa oohine' haasaáng wa ale, ngiri gurtlayé'.

⁴⁷ Ti ba/amis, AAKOÓ MUNGÚ, Munguúrén, ti dinkwárí ki/is baraá múk xoordaá hatlae. Daqaní kuúng un sluufisaán as umuuwók kudá' hhoohhoó', atén tay xirfuutaán as xirfuuwók.

⁴⁸ I xirfuuti AAKOÓ MUNGÚ, Munguú Israeli, iimír iimu/uungw wasle ay alhhe'eesay wasle! Muu sleémeero i ooi, «Amin!» AAKOÓ MUNGÚ xirfayeemisaak!