WARA'AMI 105 - Biblía Axweesantá Hhohho' ar Mungú 2004

Mungú nee mukós

¹ AAKOÓ MUNGÚ sluufmisaak, inós firiirimaak, adoodá' aa /imiís alki/iitaak dír xoordu sleémeero!

² I daa'aak, xirfuú Mungú daa'aak. Alki/iitaak waa/oo/amoodá' sleémeero aa tleéhh!

³ Umuuwós kudá' xiríf saqwalala/aak. Awa AAKOÓ MUNGÚ leelehhiitá' ta baraa/i.

⁴ AAKOÓ MUNGÚ leeleehhaak nee /uuruuwose. Adór inós kuwa tseéw umuú daqto dirhunge na leelehhiitaak.

⁵ Inslawaagáy tlehhmi'iidá' waa/oo/amo inós aa tleéhh, waa/oo/amoorós nee kwasleemadá' aa tlaáq,

⁶ kuungá' xwaylár Abrahamu sagadiyusmoowós, kuungaásingaá xwaylár Yakobo kudá' aa tsawaár.

⁷ AAKO inós a Munguúrén. Kwasleemarós i /uuruú koón baraá yaamu sleémeerowo.

⁸ Inós alqadoorós ga baloó gunqaresiiká ay kureeraá kureér, hara'ayaarós tidá' aa oó' gan boo/eemaamiis umuúqo qarto.

⁹ Alqadoorós tidá' aa oó' dír Abrahamu gana boo/eés. Nee tidá' aa Isakí báy aqo gana boo/eés.

¹⁰ Kaahirós gana gawdeés dír Yakobo, gay oó', adór alqadoorós ir alhhe'eesoó koondaaká.

¹¹ Giri báy, «Yaamaá Kana'ani ngi haniís tari yaamuuhúng awa ta ala'.»

¹² Qoomár múk Mungú kuwa ureeká, tawa dahaaye baraá yaamaá Kana'aniro,

¹³ nina harweerariné' baraá yaamaá dimbadimbé wa ale, nee baraá waawituú ayeemaá dimbadimbé.

¹⁴ Ala Mungú aa ya/aniká kiwa muruú tlákw i tlehhiiti, waawitá guna iigahhaát asma inooín.

¹⁵ Aakoó Mungú iri oó', «Sagadiyuuser'eé' ar hhohho' ma kwatiitara', aaruuser'eé' ma gár tlaákw i tleehhara'!»

¹⁶ Mungú giyeé gari tleés ayaaín i alé, muruú /aymar'ín sleémeero guri hhitín.

¹⁷ Ala heeko guna geerií ya/aáw, Yosefu, kudá' taa weeriís baraá lawaali'iima.

¹⁸ Kuna ya'a' tseék ar minyororo, isa kari tseék ar himuú muqsli,

¹⁹ ay dír qoomaadá' aa aarír wa oó' iwa bó/, axweesantá AAKOÓ MUNGÚ iri looeema tleehhít.

²⁰ Waawutmoó Misri iri oó', «Gweeraak.» Waawutmoó xoordu guri geemáy.

²¹ Kuri heé úr oo doó waawutmo tleéhh, nee daanduú daqaari'iimarós sleémeero.

²² Geeraharuuse gana geeraharahár ar adór ngir slai, bariise gari intsaahhatimís sagalooaro.

²³ An qoomár múk Israeli iwa dáh Misri, Yakobo tari dahaaymo baraá yaamaá Hamuwo.

²⁴ AAKOÓ MUNGÚ mukós guna tsuúq tari ló'wa laqwaál, giri /uurií haniís ta wakuuser'ine.

²⁵ Múk Misri guri wakuusér múk Israeli tleéhh, adór qoomaaká kay tleéhh dír sagadiyuuseerós.

²⁶ Aluuwo lawaalmoowós Mose guri ya/aáw, nee Aronidá' aa tsawaár guri ya/aáw.

²⁷ Laydaá Mungú kiri tlehhiít baraá Misrír wa ale, tlehhema'aá waa/oo/amo kiri tleéhh baraá yaamaá múk Hamuwo.

²⁸ Mungú giwti gari huúw baraá Misri, yaamu niri giwiyé', ala múk Misri axweesantós kaa iialooeesiiká.

²⁹ Ya'aá yaamuudá' giri warqeés tawa tseere, siyoóín sleémeero guri tsuú/.

³⁰ Aamaxupa yaamuuín giri dalá/, iri tsiníq ay baraá kutwír waawutmo.

³¹ Mungú ina ilawaáts, ba'aruú yaariír yaamaá Misri giri áy, nee itina yaamaá Misri giri alnitsitsi'ít.

³² Tluwoó tlaa/e guna haniís, nee mankari yaamuuín sleémeero gina gwa/atís.

³³ Sabiíbuuín gway hhitín nee xaa'aá /aantsír'ín, xaaii'ín sleémeero gina giqáy.

³⁴ Mungú iri ilawaáts, ingigi niri ti'ít, nee saparuú kumér faaroro ta aslayká.

³⁵ Umuúqo gár na ti'iti gari /ák sleémeero, balángw yaamuuín guri xús sleémeero.

³⁶ Daaqaay sleémeero guri tsuú/, kuduú baris oo múk Misri.

³⁷ Aakoó Mungú múk Israeli guri geerahaár tawa ti'iiti baraá yaamudae, nay tlayé', i peésár koná' nee sahaábu, sleémeero ki slaqo hho', i /uuruú koná'.

³⁸ Múk Misri tari qwalaá/ tawa tlatlay, asma inooín taa ló' wa da'ayuút asma múk Israeli.

³⁹ Mungú mukós guna tuuntuúk ar huunkáy, nee asla xweeraawo giri i gwa/át.

⁴⁰ Qoomár iwa fu'unaá slaiyá' giri xooyángw i huúw, giri /aymiís ar mikaátér yaariir ar gawaá dooraá daahh.

⁴¹ Tlaa/a gana ka'aás, ma'aay nay baraadá' wa ti'itiyé', ma'aay nina adór yaaér wa wa/iyé' baraá yaamaá xaanxaay.

⁴² Asma al'axweesantós ar hhoohhoo' gana insláy, tidá' aa oó' dír Abrahamu sagadiyusmoowós.

⁴³ Mukós guri duúx ar bara/, mukós oo aa tsawaár guri duúx ar daa'ángw qwala/.

⁴⁴ Yaamaá xoordaá hatlá' gay haniís gadiyér muu kari aál,

⁴⁵ as kaahirós kawa oohi, nee dabeerós kawa eehari. AAKOÓ MUNGÚ xirfayeemisaak!