WARA'AMI 104 - Biblía Axweesantá Hhohho' ar Mungú 2004

Tleehharusmo kuwa xirfayeemisi

¹ Muunaáeé', AAKOÓ MUNGÚ diidi'iimiseek! AAKOÓ Munguúeé', kuúng tu ló' wa úr! Xirif nee aleesleemuwo ugwa tuuntukiyé'.

² Gwa/aateema ina tsít adór hiyáy wa ale. Doori ina intlát adór inqwaarír wa ale.

³ Dír hotaangók ana tléhh daanduú ma'aydaá gawaá doori. Huunkáy un gaárirók tléhh, kuúng an fur'ár hi'iimít.

⁴ Fur'a an ya/abusmoowók tléhh. Asla nee tsaangose an sagadiyuuseerók.

⁵ Yaamu ina gawdés gawaá iihhafiiri, as mindiwa baloó dingitiyé'.

⁶ Yaamu ina tuuntúk ar tlawi adór inqwaari. Tlom'aá tlet kiri guú/ nee ma'aay.

⁷ Tawa gahhát, ma'aay nay gowiyé'. Afoorók ar kwarara/a ngiwa axaasiyé' nay kulala'atiyé' ti'ingo.

⁸ Nina wa/iyé' gawaá tlom'ií wa ale nay hardihiyá' baraá xatsa, ay didadá' ta amohhe'és as inooín.

⁹ Aluuwo ma'aydá' kiri digimí tléhh as mindiwa malé ki/iyé' yaamu mingiwa tuuntukiyé'.

¹⁰ Kutli ana tléhh niwa ti'it baraá xatstá wa ale, nee luhuuín nina tleehharuutiyé' ar baraá tsirxadaá tlom'i,

¹¹ as makaá sla/a ma'aay ngiwa slaya', daketuú baraá sla/a waxer'ín ngiwa gaasi.

¹² Tsir/o maray'ín giri tléhh gawaá xaa'aá didí diriiá', iri gawaá haleemí wa dá'.

¹³ Tluwaay ngun gawaá doorií wa hanmís iwa gawaá tlom'ií tluwi, yaamu sleémeero iga aaxís ar tsuuqaawók.

¹⁴ Gitso ngin tit'iimís asma makaay, nee balaangw as muruú /aymár muu, as hee muruú /aymarós nguwa slay baraá hhapér wa ale.

¹⁵ Nee difaáír muunaáwós gu qwala/aas, di/tá gitsee/awós ngir soohhayesi, nee fa/ár /uuru ngur slay.

¹⁶ Xaa'aá uren awa AAKOÓ MUNGÚ kaa eemiís ar ma'aá bu'uutá', nee xaa'aá ta bay miereésír Lebanoni ar aa dahaás.

¹⁷ Tsir/o maray'ín gin gawaadí tléhh, diingo gawaadá' gin hót baraá xaa'aá ta babay sunobaári.

¹⁸ Tsagni gawaá tlom'aá tlet gin hót. Nee kia'aay wa/ángw i nahhmiiti gway baraá tlaa/ár wa sláy.

¹⁹ Slahhaangw una tléhh qoomaadu ngiwa partliti. Tsee/amá qoomár dahamuuwós ga xuu'.

²⁰ Kuúng giwti an tléhh, xweera niri hardihiyá', makaay sleémeero awa sla/a nay ti'iitiyá'.

²¹ Na/aá diraangw i /orootliyá' i muruú /aymár slaiyá', muruú /aymar'ín ngun daamaraná' amór Mungú i ale.

²² Tsee/amá bir naa gwa/aát in amór hotangw'ín i ki/iyá', nay baraá mar'or'ín i qatuú ayá'.

²³ An qoomár hee niwa tlay iri gadiyeérós áy, iri gadiyumamiis ay tsiindo.

²⁴ AAKOÓ MUNGÚ, muruú kuúng taa tléhh ku ló'wa yaariír. Mura' sleémero una qoomés ar sagalooa, yaamu naa hatsiyé' muruú kuúng taa tlehhi!

²⁵ Amorqá' saawe tlawtá ur i deer, nee ka iintlaaxw, baraawose makaá yaariir in hootiyá' awa faarooro ta aleeslayká, makaá slafá' awa uren nee awa ninakwe.

²⁶ Meélír aa'aá kakaw ar daanduú ma'aay i deer, Lewiatani, kudá' taa tléhh in baraadá' wa neet.

²⁷ Kuká' sleémeero kuúng u harahhifá', muruú /aymar'ín nguwa slaya' ar qoomár hariim.

²⁸ Umuúqo gár kuúng ki hanís, ngin ilaoohiyá'. Dakók bar gaa ga haniís, inooín nin aaxiyá' muruú hhoe.

²⁹ Bira alaá xu'ús nin deewaiyá'. Hiinsluuín bura hiingés, tan qaatl, tay kii/ baraá hhapeedá' i dahhiya'.

³⁰ Kuúng hiinsluuwók bura hanís niri tleehharuutiyá'. Kuúng yaamu in /abeemií ki/imís.

³¹ Xirfuú AAKOÓ MUNGÚ i kumiit oo kureerisleém. AAKOÓ MUNGÚ ku qwal/asi nee gadiyeérós.

³² Mungú yaamu birnga i qaytsiít, nin daaraxatiyá'. Tlom'i birnga kwatiít, nay quuiyá'!

³³ AAKOÓ MUNGÚ barsa hoót un i daá'. Barsa slaáf, Munguúeé' un xirfayeemiís.

³⁴ Munguúeé' ku qwal/asi nee inslaway'eé'. Asma qwal/amaayer'eé' sleémeero amór i dahh a amór AAKOÓ MUNGÚ.

³⁵ Tlakuuse sleémeero ka hhaamisi baraá yaamuwo. Nee tlakuuse miwa male hót. Hhiintluueé', AAKOÓ MUNGÚ diidi'iimiseek! AAKOÓ MUNGÚ xirfayeemiseek!