WARA'AMI 102 - Biblía Axweesantá Hhohho' ar Mungú 2004

Firór heé baraá slahh'amaaye

¹ AAKOÓ MUNGÚ, firor'eé' iiárií qaaseek, afór /aa/ee'eé' u i hardat.

² Bar baraá slahh'ámkwí dirií' mi sanahhaataar. Iiárií qaasáng bur fiririím mu/aywatsáng ar gaanslaay.

³ Deelor'eé' in waaráhh adór quui, fadueé' nin tsi/iyá' adór muqslír baraá asla.

⁴ Aníng ana xoslo'oót adór gitsór taa tsaát, nee muruú /aymar'eé' ugwa gunqareés /aymaro.

⁵ An /iíf ar afo, gár gawaá slaqwte'eene aa met a fadu kilooín.

⁶ Aníng a adór gwareesír baraá xaanxaay, a adór harkoonkír baraá taangu.

⁷ Bara qaát, gu'ute a ilií qaasaaká, a adór tsir/ír daanduú dó' wa deewawaa'.

⁸ Wakuuser'eé' in looárí dahás kaantiingo. Múk aníng i niqiím lo'o kan huwaahuuw ar umuueé'.

⁹ Asma da/ara an /aáy adór muruú /aymár wa ale. Umuúqo gár ni waha, an hhirhheeraá haraawáh.

¹⁰ Asma kuúng ana qa/ít buhhtaawo, ina dafít iri amorqá' saáw i kwáhh.

¹¹ Slafingw'eé' i waaraahh adór geehhantmoó tsiindo wa ale. Aníng ana káh adór gitsór wa ale.

¹² Ala kuúng AAKOÓ MUNGÚ, kuúng an waawutmo kureeri sleémeero. Umuuwók kun inslasláy umuúqo qarto.

¹³ Kuúng an sihhít gixsár Siyoni kay gurtleér. Asma qoomár gurtleemuwós aa xeér. Eeít, qoomaadá' taa ó' an tí.

¹⁴ Sagadiyuuseerók Siyoni ga slá', Inós handá' tam tangwaá taworo. Gur'er'ín gaa tlés, tam aa ló' wa hhitiruuti.

¹⁵ Xoordu sleémeero AAKOÓ MUNGÚ ngu da'ayutiyá', Waawitá sleémeero baraá yaamuwo xirfuuwók ngu da'ayutiyá'.

¹⁶ AAKOÓ MUNGÚ gixsár Siyoni birnga male tleéhh, daqaní xirfuuwós i geehhooúy.

¹⁷ Múk aa haleeleeiit gu iiárií qaas, nee firor'ín ga si'iiká.

¹⁸ Tí gooimaak asma qartá xaw, as múk ta aluú wa laqwaali AAKOÓ MUNGÚ nguwa xirfayemisi.

¹⁹ AAKOÓ MUNGÚ nin gawaá doorií wa qaytsiit dirós tidá' hhoohhoo' wa ale, yaamu gin xuuxuu' gawaá doori wa ale.

²⁰ Wa/aa/ír mukdá' taa tsegiít gan iiárií qaas, mukdá' geera taa sakwasleemuút kiwa tsu/i gin gweer.

²¹ Umuú AAKOÓ MUNGÚ ku alki/iiti baraá Siyoniro. Xirfuuwós ku alki/iiti Yerusalemuwo,

²² qoomár xoordu bar taa dinkwár i burumburiít, AAKOÓ MUNGÚ kuri sluufmiís nee waawitá sleémeero.

²³ AAKOÓ MUNGÚ /uuruueé' gwa /aareés. Deelór slafingw'eé' gaa hartsaát.

²⁴ Aníng AAKOÓ MUNGÚ u firiím, Aáko, aníng mi duwe hingeesaar. Kuúng an kumamít kureerisleém.

²⁵ Iihhafiirír yaamu aáng ana tléhh. Doori an gadiyér dabaawók.

²⁶ Inooín i hhitiruutiyá', ala kuúng a kumamít. Inooín i qaruyá' adór inqwaruú wa ale, kuúng in adór tlabaá wá warqés, nay slaxaruutiyá'.

²⁷ Ala kuúng aqo kudá', kureeriwók sleeme i harki/oó kon'aaká.

²⁸ Na/aá mukók kudá' u sagadiyuús amohhooa ngin ar hootiyá'. Na/aá i laqwaaliya' nin saxareemár kumiitiyá' geraawoge.