Tlehhema'aá ya/Abuuse 9 - Biblía Axweesantá Hhohho' ar Mungú 2004

Hhu'u'úngw Saulo

¹ Qoomaadae Saulo iri kumiít eeharuusér Aako ngiwa dae tlaaqi, nee adór ngir tsu/i gari leelehhiít. Iri daqáy dír kaahamusmoó úr oo Mungú.

² Barwadaá i huwi baraá gixsár Damasko, awa taa gooín amór maraá saaliingw, giri firín, as múk loohír Mungú gaa eehar oo aa sláy nguwa tsegiiti, nee nguwa huwi baraá Yerusalemu, ta hhawaate laqaá /ameena.

³ Qoomár iwa aa'aá kay, iwa nakaá/ Damasko, naxes gwa/aateemaá gawaá dooraá dahhá' nguri adaá i gwa/aatiyé' bihhe sleémeerowo.

⁴ Saulo iri yaamií huú', afo gari axaás ar inós gwa beer, «Saúlo, Saúlo, ahaá waáy, án mis slahh'eemís?»

⁵ Saulo iri oó', «Kuúng a heemá, Aáko?» Heedaádá' iri oó', «Aníng an Yésuudá' kuúng ta slahh'eemis.

⁶ Ala kuúng na sihhiít, baraá gixsa i daheek, nee adór kuúng wa hariim tleehhamooro kingi kuúng i oó'.»

⁷ Nee mukdá' nee Saulo ti alkoomá' tana sihhtanoórí xosl'omiít, asma afo ka axamiis, ala hee ku ga/ayká.

⁸ Saulo niwa yaamuú wa tláy, iwa qaytsiít, naxés ilaawós i xumiisiaaká. Mukdá' nee inós ti alkoomá' guri dawa óh, guri huúw ay Damasko.

⁹ Iri iwiwiít deelo tám, i xumaamisiiká, slám i /ayayinká laqaá i wahahanká.

¹⁰ Ala baraá Damaskowo eeharusmoko i deer, umuuwós a Anania. Aako iri oó' dír Anania ar baraá iigu'utu, «Ananía.» Anania iri oó', «Aníng a diirí, Aáko.»

¹¹ Aako guri báy, «Sihhiít, tláw ay dír loohidá' ta bay Loohír aa gana'. Heé ta bay Saulo, oo yaamaá Tarso, na yaahaaseek dír doó Yudá wa ale. Inós haandá' hamí i firiirín.

¹² Inós heé umuuwós ta bay Anania gwa ár ar baraá iigu'utu, iwa baraadií darahi as nguwa dabií qaasi, ilaawós iwa malé xumsór i ki/iya'.»

¹³ Ala Anania iri oó', «Aáko, kángw heesíng aníng ugwa axmamiís dír múk yaariire, adór heewí muruú tlákw ngura tlehhahhiít dír mukók oo hhohhó' oo baraá Yerusalemuro.

¹⁴ Slám ayaawihe hara'aya ga kón ar amór kaahamusér uren ar Mungú daahh, ar mukdá' sleémeero umuuwók ateetimá' nguwa tsegiiti.»

¹⁵ Ala Aako iri oó', «Kuúng tláw, asma heesíng a xooslmoó aníng naa tsawaár as umuueé' nguwa alki/iiti dír xoorduuwo nee dír waawitá nee dír múk Israeliwo.

¹⁶ Aníng adór slahha'amaayér yaariir ir inós wa hariín sleemuuwo as aníng a dirósí laqaám.»

¹⁷ Anania iri tláy, iri baraá do'dí dáh. Saulo guri dabií qaás, iri oó', «Hhiyaaeé' Saúlo, Aako Yesu, kudá' taa dirógí geehhooees baraá loohidá' nira hardati aníng iga ya/aáw, as ilaawók niwa male qaytsitiya', nee tuwa hatsisi Qeeruú hhoohhoó' oo Munguhe.»

¹⁸ Hamtidár kilae muruú adór qafo ina baraá ilaawós wa paáhh, iri qaytsiít, iri sihhiít, kuri baatiís.

¹⁹ Alaá iwa /ayín, /uuru guri sláy. Saulo iri Damaskór wa hoót deelór hhaawaakahe dinkwa nee eeharuuseedár amoodá'.

Saulo iwa baraá Damaskór wa alki/iít

²⁰ Kángw Yesu guri alki/iít baraá maraá saaliingo iwa kaahi, «Inós a Garmoó Mungú.»

²¹ Nee múk kaangwí gwa axaas sleémeero tari waa/oo/amín tari káh, «Heewí a kudá' mukduú Mungú oo umuuwí gu ateetiím gwa slahh'emiísiíke baraá Yerusalemuro. Nee gár nisa diirí hardáh aqo kaangwí, ngiwa tsegiiti nee ngiwa huwi amór kaahamuusér uren ar Mungú.»

²² Saulo ina kumiít ar pihh'uuma axweesantá Mungú alki/ituuwo, múk Yahudi oo Damaskórí dirií', gurir baá/, ngiwa laqaqan adór, ‹Yesu tar Kristo.›

²³ Deelór yaariir iwa waaráhh, múk Yahudi tari al'axweés kuwa gaasi.

²⁴ Ala Saulo ador'ín tidá' gari tsaáhh. Inós kuri gigidín dír afér gixsár wa ale xweera nee tlaatla/aango, as kuwa gaasi.

²⁵ Ala eeharuuseerós xweeraawo guri dúx guri qás baraá lakwaanti, guri aweerís ar pa/ángw gawaá koo/ír taa harweér ar gixsa.

Saulo iwa baraá Yerusalemu

²⁶ Qoomár Saulo iwa hardáh Yerusalemu, iri haragwaá' dír eeharuuse, ala eeharuuseedá' sleémeero inós guri da'ayumít, asma kwa haratlinti'iiká adór inós tar eeharusmo.

²⁷ Ala Barnaba Saulo guri huúw amór ya/abuuse. Kaangwí guri dir'ín i alki/iít adór Saulo Aako ngura ár loohiro, nee adór Aako ira axweés nee Saulo, nee Saulo Ya/abtór hho' adór ngira alki/iít ar pihh'uuma baraá Damaskoro ar umuú Aako.

²⁸ Saulo nee inooín tari alhoót baraá Yerusalemuro Ya/abtór hho' gari alki/iít ar umuú Aako, ar pihh'uuma.

²⁹ Iri axweés nee tiri tlaampa'amisiyé' nee múk Yahudi, kudá' tsifrír Yunanír ar axweesá'. Ala inooín adór kur gaasi kari axweés.

³⁰ Qoomár hhae lama ngiwa slayé', Saulo kurir tláy, kuri haydohiís ay Kaisarea, as iwa kumiiti ay gixsár Tarso.

³¹ Múk kríshaanáy amohhooa gari sláy baraá yaamaá Yudeawo nee Galilayaro, nee yaamaá Samaria. Tari gawdúy gawaá loohír Aakoowo, Aako kuri ilaiwawaá/, Qeeruú hhoohhoó' oo Mungú gina gurkwa/amís, nee faaror'ín iri doogigiín.

Enea kuwa hungu/uús

³² Petro haratlintauuse gari alhi'iimiít, iri aweér ay amór múk hhohhó' oo Mungú kuduú baraá yaamaá Lida.

³³ Baraá yaamuudae heeko guna ár, umuuwós a Enea. Heewí a heé aa sol'omiit, i gawaá faltá hotaatín kureeri dakaát.

³⁴ Petro guri báy, «Enéa, Yesu Kristo kuúng u hungu/uus. Tláw, faltók amohhe'eeseek.» Qoomaadár kilae iri tláy.

³⁵ Nee muu sleémeero oo baraá yaamaá Lidárí dirií' nee Saroni, Enea kuwa ár, Aako kuri haratlintií'.

Dorkasi kawa waaslee/atís

³⁶ Nee eeharuso'orka wák i deer baraá gixsár Yopa, umuuwós a Tabita, tsifrír grikiro a Dorkasi (gídaabárós a tlaaqati). /Ameenirí tlehhma'aá hho' awa yaariir gaa tlehhaahhít, nee ilahhooa ga hanmaamís dír múk i alé.

³⁷ /Ameenirí deeloodae tiqti gana ót, iri gwá'. Nee hamaatlaro kawa hhe'eés, kari qaás gawaá qoroófa.

³⁸ Gixsár Lida ka tseew dír Yoparo. Eeharuuse gari axás adór Petro ir amoodií dirií'. Múk tsár guna amoorósí ya/áp. Petro kuri harhheehhe'eés, kuri báy, «Qwaláng ar gaanslaay.»

³⁹ Petro iri tláy, nee inooín tiri koné'. Iwa hardáh, kuna tsa/aás gawaá qoroófa. /Ameenár kwaeeli sleémeero ina bihhiiwós i sihhít, ta /aa/amín, kuri inqwaruú i laqaqán, nee hiyi'i, kudá' Dorkasi aa hirít qoomár iwa slaf.

⁴⁰ Petro muu sleémeero guna tsee/ií duúx. Iri tumbarara'aát, iri firín. Iri amór tuuaárí warqáy iri oó', «Tabita, tlawáng.» Iri qaytsít, nee Petro nguwa aán iri tleér, iri iwít.

⁴¹ Gari dawa óh, gari sihhitís. Múk Mungú nee /ameenár kwaeeli giri ateét, /ameenidá' gana geeraaín i qaás ka saxamaar.

⁴² Kaangwí ina xu'utiít baraá gixsár Yopa sleémeero. Múk yaariír Aako guri haratlintií'.

⁴³ Petro deelór hhaawaaká gana hhe'eés baraá Yopár wa ale dír doó heeko ta bay Simonú kadaá tlehhahhiít.