Tlehhema'aá ya/Abuuse 8 - Biblía Axweesantá Hhohho' ar Mungú 2004

¹ Nee Saulo gaasadá' gari sa qwalalaá/. Baldá' gusisíngw úr oo múk kríshaanáy iri iimu/ún baraá Yerusalemuro, sleémeero tari diyaa/aát baraá yaamaá Yudearo nee Samariaro, ala aqo har ya/abuuse kilós ina mét.

Saulo iwa kríshaanoó slahh'eemisi

² Múk Munguú ilaiwawaá/ Stefano guri foól, kuri sa tsuunqumiís ló'wa ale.

³ Ala Saulo múk kríshaanáy guri gusiisín. Iri daráh baraá umuúqo do'o, hhawaate nee /ameenaaro giri duuruxún, giri dahamiís baraá doó tseegamo.

Alki/ituú Ya/abtór hho' baraá Samaria

⁴ Ala eeharuuseedá' aa diyaa/at iri tleér umuúqo amooro, Ya/abtór hho' kari alki/iít.

⁵ Filipo iri aweér ay baraá gixsár Samaria, kángw Kristo guri alki/iít dír múk i alé.

⁶ Filipo axweesantá Mungú ngiwa alki/iít nee layu ngiwa tlehhiít, boo/oó muu axweesanayduú Filipo kuri ló'wa slaá' iiárií qamingo.

⁷ Asma múk yaariír neetlaame aa eér, neetlaameedá' iri /aa/amiín ar afór ur, iri ti'imít. Nee múk yaariír oo tiqtír sol'omit nee taqooraay kuri hungu/umiís sleeme.

⁸ Múk gixsadá' qwal/uú yaariír guri sláy.

⁹ Heeko umuuwós ta bay Simon i deer baraá gixsadae. Inós a qwaslaarmo. Múk yaariír baraá gixsár Samariaro tana ló'wa waa/oó/, asma inós i kaahi, «Aníng a heé úr.»

¹⁰ Heewí kuna slaá' kuwa iiárií qamin nee muu sleémeero, iimír na/áy wa tleemu ay heé úr, ta kaahi, «Heewí an aleesleemuuduú Mungú, kudá' ta bay aleesleemuudá' úr.»

¹¹ Heewí kun iiárií qamín asma de'emaá yaariire waa/oo/amo gana tlehhiít ar qwaslaari'iimarós.

¹² Ala daxta mukdaádá' axweesantá Filipo gari haratlintií', daanduú Ya/abtór hho' ar Mungú nee Yesu Kristo, hhawaate nee /ameenaaro kiri baatimiís.

¹³ Simoni inósuú kilá' sleeme iri haratlintií', kuri baatiís, tiri alkoomakoné' nee Filipo. Slám iri waa/oo/amín qoomár layu nee muruú waa/oo/amo kudá' Filipo aa tlehhiít ngiwa ár.

¹⁴ Ya/abuuseedá' Yerusalemúr i dirii' gari axás adór múk Samaria axweesantá Mungú ngira ilaaóh. Petro nee Yohane kiri amoodií ya/aáw.

¹⁵ Ya/abuuseedá' tsár iwa amoodií hardát, mukdá' aa haratlintii' kuri aleefirín as Qeeruú hhoohhoó' oo Mungú kuwa ilaaoohi.

¹⁶ Asma tam heé wák oo Qeeruú hhoohhoó' oo Mungú gwa ilaaoh i kaahh, aqo kina tawó baatimiís ar umuú Aako Yesu.

¹⁷ Petro nee Yohane daber'ín kari qaás gawaaín i alé, nee Qeeruú hhoohhoó' oo Mungú kuri ilaaóh.

¹⁸ Símonuduú qwaslaarmo adoodá' ngiwa ár, adór muu Qeeruú hhoohhoó' oo Mungú ngur slasláy ar dabér ya/abuuse, peésa gari haniisár wa slaá',

¹⁹ iri oó', «Aleesleemuuwí aníng i haniisare' sleeme, as daqaní umuúqo heewo oo aníng ni dákwií qaas, masók Qeeruú hhoohhoó' oo Mungú gu sláy.»

²⁰ Ala Petro iri oó', «Kuúng nee peésaroge, tsarere'eét, asma kuúng kawa xu', qeemuú Mungú ku slasláy ar peésa!

²¹ Dinku'uumár kuúng nee atén i káhh gawaá kaangwihe, asma muunaáwók ku hhoohhooeeká dír geeraá Munguhe.

²² Gawaá adoorihe tlakweemaawók kwisingá' hhu'u'umeek, Aako na firiimeek, doóqa inslawaysuú baraá muunaáwók gu gurtláy.

²³ Asma án kuúng u ga/áw, da/tá baraá guruuwók i qarqát adór saaxí. Slám kuúng tlakweema ugwa oohiyé'.»

²⁴ uduú qwaslaarmo iri oó', «Án aleefiriimaaré' dír Aakoowo as muruusíng sleémeero naa aníng i katé' iwa pa/i.»

²⁵ Petro nee Yohane Ya/abtór Aako kawa hhe'eés lamabu'uungo nee alki/ituuwo, tari kií/ ay Yerusalemu. Loohiro Ya/abtór hho' kari alki/iít baraá gixsadaá ninakw awa yaariir baraá yaamaá Samariaro.

Filipo nee heé yaamaá Kushi

²⁶ Malaykamoó Aako iri axweés dír Filipo, iri oó', «Sihhiít tláw bihhaá basa, ay amór loohidá' naa Yerusalémúr wa tleer ay Gasa.» Loohidá' a loohír xaanxaay.

²⁷ Filipo iri tláy, hamtidár kilae heeko taa karmúy oo Kushír daáhh guri ár. Inós a heé wák oo daqaari'iimár amohhe'eemiís ar waawuto'o Kandake ar yaamaá Kushi. Inós ina Yerusalémúr káy, as Mungú nguwa sluufmisuú ay.

²⁸ Nee niwa kií/, aa iwiít gawaá gaárirós, i kitaábuú aarusmo Isayá soomuus.

²⁹ Qeeruú hhoohhoó' oo Mungú Filipo guri báy, «Tseewúw dír bihhaá gaárirí, ti alkoonde'.»

³⁰ Filipo iri tláy ar ti'iingw, heedaádá' guri iiárií qaás, naxés i kitaábuú aarusmo Isayá soomuus. Guri báy, «Tisíng ta soomus a tsatsahhaánda?»

³¹ Heedaádá' iri oó', «Aníng adór ngir tsaahh a adoomá, heé i geeraharahaár bir kaahh.» Filipo kuri firín iwa tsa/an gawaá gaáridá' nee iri dír bihhiwósí iwiít.

³² Nee gooidá' i soomuusi a tí, «Inós kuna huúw didár mura' kuwa tsu/aa/in adór bee/ír wa ale. Nee adoodár deelmoó bee/i ir xaslmaamiti dír geeraá heedaádá' gu se'eengw tlaaqa, nee inós sleeme ina xasliít adoodár alé, afkós gwa waatleesiiká.

³³ Inós tiwa niinaweés, sakwasleemarós kari hingeés. Heé qartós alki/ituwo ga aleesláw a heemá? Asma slafiingós kuna hingeés baraaká' yaamuwo.»

³⁴ Heedaáduú Kushi Filipo guri báy, «Aníng i ooang, aarusmoowí axweesanaywí i kaahi a daanduú heemá? A daanduuwósuú kiláe, laqaá a daanduú heé hatlá'?»

³⁵ Filipo Ya/abtór hho' ar Yesu gari iimu/ún dirósí alki/ituuwo. Dír ngiwa iimu/ún a dír axweesantadaádá' heedaádá' aa soomuús.

³⁶ Tari kumiít loohiro, tari hardáh dír ma'aay i dirii'iya'. Heedaádá' iri oó', «Qaytsiít, ma'aay diirihe i dayá'. Gár aníng i il/aam a milá, ar tis baatisiiká?» [

³⁷ Filipo iri oó', «Kuúng bar aga haratlintí' ar muunaáwók sleémeero, tu baatiis.» Heé aáng iri oó', «Aníng aga haratlintií', adór Yesu Kristo tar Garmoó Mungú.»]

³⁸ Hara'aya gari oó' ar gaári iwa sihhit. Filipo nee heedaádá' tari al'aweér baraá ma'aay. Heedaádá' kuri baatiís.

³⁹ Qoomár tindiwa tsa/a/an baraá yaaér wa ale, Qeeruú Aako Filipo guri ar tláy. Filipo kwaa sangw malé ariiká nee heedaádá'. Heedaádá' iri kumiít aaiiwose, i hara qwalalaa/.

⁴⁰ Ala Filipo kuri malé ár baraá gixsár Asótór wa ale, qoomár iwa waaraahhi Ya/abtór hho' gari alki/iít baraá gixsadu sleémeerowo, tam garwa hardáh ay Kaisarea.