Tlehhema'aá ya/Abuuse 5 - Biblía Axweesantá Hhohho' ar Mungú 2004

Anania nee Safira

¹ Ala heeko wák umuuwós ta babay Anania, nee hareerós Safira, muruuín kudá' sleémeero ta kon kuri weeriís.

² Ala Anania nee hareerós tari al'axweés peésaadá' kawa bahh lu/i nee tidá' aa met gari huúw dír geeraá ya/abuuse.

³ Petro iri oó', «Ananía, ahaá, Neetlaangw muunaáwók musungwa hatsiís, tam Qeeruú hhoohhoó' oo Mungú kuri lamtá beér, nee hariímadá' taa sleér yaamu kiwa weerís kari bahh ilá/.

⁴ Ahaá, qoomár iwa baraá dabaawók i diri' a togekáhe? Nee qoomár weerisaro kawa hhe'és, i baraá aleesleemuuwogekáhe? Ahaá, adór /aymuuwí pa/aangw ngura sláy baraá muunaáwoge a adoomá? Heé kuúng taa al/ák a heewooká, ala a Mungú.»

⁵ Anania /aymi'iiká' ngiwa axaás, iri yaamií huú', iri gwaá'. Muu sleémeero oo adoodá' gaa axaamiis, daér yaariir guri eér.

⁶ Daaqaay iri tláy, Anania kuri qaás baraá inqwaarír /awaak, kuri tsee/áy gagaár, kuri foolár áy.

⁷ Alaá deelór hhawaaká iwa gwá', harér Anania niri hardát. Inós kaangwí aa tleehharuut daanduú hhawaatuuwose gu xu'uká.

⁸ Petro gari yaahaás, gari báy, «Hariímadá' taa sleeré' dír yaamuudá' taa weerisi'i a tíhe?» Inós iri ó', «Eeít.»

⁹ Petro iri oó', «Kiíng nee hhawaatuuwók Qeeruú Aako adór al/aymaaro kura qitlé' a adoomá? Qaytsiít mukdá' aakoowók gwa foolár áy hanoos i dír afkú do'. Nee hám kiíng sleeme ti tsee/áy huuw.»

¹⁰ Hamtidár kilá' iri hú' dír ya'aá Petro, iri gwá'. Daaqaydá' niwa dáh, naxés kawa ár aa gwá', kari gagaár tsee/áy alé, kari foól dinkwa nee hhawaatuuwós.

¹¹ Haratlintaauuse daér yaariir gari eér, nee múk hatlá' sleémeero oo axweesanaywí gwa axamiis.

Layu nee muruú waa/oo/amór koóm

¹² Ya/abuuse layu nee muruú yaariír oo waa/oo/amór koóm guna tlehhít baraá tla/ángw muko, nee mukdá' aa haratlintii' sleémeero tana burumburimiít baraá matla/ángw Solomon.

¹³ Ala dír mukdá' aa haratlinti'iikahe heé aa qiitl i kaahh iwa haragwaai dír haratlintauuse, ala a haratlintauuse kana xirfayeemiís.

¹⁴ Múk Aako gwa haratlintii' iri ló'wa tlaáhh, hhawaate nee /ameenaaro.

¹⁵ Tam tiqtuuse sleeme kari huwahuúw ar falo nee ar hhafeeto afaá loohír i ale, as geehhaantamoó Petro ngiwa slay qoomár inós bir waaraahh.

¹⁶ Muu sleémeero kudá' baraá gixsadaá bihhaá Yerusalemúr i tsewen, tari burumburiít, tiqtuuser'ín kingiri huwahuúw, nee múk neetlaame aa eér, tiqtuuseedá' sleémeero kari hungu/umiís.

Ya/abuuse kawa slahh'eemiís

¹⁷ Aluuwo kaahamusmoó úr oo Mungú nee mukdá' nee inós ti alkoomá', kuduú bartá múk Sadukayo tari sihhiít, gur'e giri ohiín,

¹⁸ ya/abuuse kari ohín, kari dahaás baraá doó tseegamo.

¹⁹ Ala malaykamoó Aako xweeraawo afér doó tseegamo gari gweér, giri tsee/ií duúx, giri báy,

²⁰ «Tlawsé', sihhiité' baraá Doó Mungú, muu ádbawaak kángw axweesanaywí sleémeero oo slafiingo.»

²¹ Inooín axweesanaywí axaasaro kuwa hhe'eés, tari tláy matlaatlér boo/e, tari baraá Doó Mungú wa intsaahhatimís. Kaahamusmoó úr oo Mungú niri hardáh dinkwa nee mukós. Múk doó kwasleema nee bariise sleémeero nee múk Israeliwo, kuri burumbuúr, muu kuri ya/aáw baraá doó tseegamo as mukdá' kunguwa huwi.

²² Sagadiyuuseedá' taa ya/aáw tawa hardáh baraá doó tseegamo, naxés mukdá' taa tsegiít kwa ariiká, kaangw kuri ooár áy.

²³ Tari oó', «Tawa hardahaán, doó tseegamo i tseegamór i dirii', nee askaári i afkú dó' wa sihhimít, ala afkú do' kuwa gweeraán, heé taa baraá dóí awaán i kaahh.»

²⁴ Xuumusmoó úr oo Doó Mungú nee kaahamuusér uren ar Mungú kaangwí kuwa axaás, xure giri eér, as ya/abuuseerí aa baraá doó tseegamór wa ti'it. Tari oó', «Adoorí a adoomá daqaní?»

²⁵ Siiwadár kilá' heeko wák nay hardáh, iri oó', «Mukdaádá' /isá' taa baraá doó tseegamór i dahasé', haandá' baraá Doó Mungú, ta múk intsaahhatimis.»

²⁶ Xuumusmoodá' úr nee xuumuusér hatlae tari tláy, ya/abuuseedá' kingiri huúw, ala ar /uuruuwooká, asma inooín ta múk da'ayumiit, as mikiwa tlaquút ar tlaa/e.

²⁷ Kingay huúw kiri qaás tla/ángw múk kwasleema. Kaahamusmoó úr oo Mungú giri yaahaás, iri oó',

²⁸ «Atén kuungá' naa ló'wa hara'ayiimániíke niwa kaahaan kuungá' ma intsaahhatimisara' ar umuuwí. Ala hám qaytsité', intsaahhatimisuuhúng Yerusalemu gaa dalaá/, nee kuungá' tseerér heehúng kudá' ngi gawaarén i huwtá wa sla'á'.»

²⁹ Petro nee ya/abuuse tari oó', «Gár atén tiwa hariím a Mungú un iialooeemisaán ta múk aleesleemuú kooma.

³⁰ Munguú baabi'iirén Yesu guna waaslee/atís, kudá' kuungá' taa gasé' ar loohír kikiár gawaá msalaába.

³¹ Mungú heewí guri xirfayeés ar dakós oo doó /iyáy, as tawa heé úr nee ba/amusmo, as múk Israeli nguwa hhu'u'úngw i huwi nee hingeemisuú tlakweema nguwa slaya'.

³² Nee atén a lamabu'uusér muruuwí, dinkwa nee Qeeruú hhoohhoó', kudá' Mungú aa haniís dír mukdá' sleémeero inós gu iialooeemiís.»

³³ Inooín adoorí kawa axaás, mune giri farkiín, kiri tsu/utár wa slaá'.

³⁴ Ala heeko wák, oo Farisayo, umuuwós ta bay Gamalieli, slám inós a intsaahhatusmoó hara'ayár Mose, a heé ta ilaiwawa/i nee muu sleémeero. Inós ina sihhiít dír tla/ángw múk kwasleema, hara'aya gari oó' as ya/abuuse kawa tsee/áy duuxi qoomár niinawe.

³⁵ Heewí iri oó', «Aá múk Israeli, gár ta mukwí tleehhamór wa sla'a' ala alqaytsitaak.

³⁶ Asma deelór hhaawaaká ar aa waarahhi, heeko ina ti'iít, umuuwós ta bay Teuda. Inós ngiwa xui, inós a heé ló'wa úr, nee múk tsiirér tsiyáhh guri eehár. Looaytleér inós kuri gaás, nee mukdá' sleémeero inós gwa eehar iri diya/aát, iri qwaár.

³⁷ Alaá heewihe heeko hatlá' ta bay Yuda, heé Galilaya, nina hardáh. Deeloodá' a tidá' umér muu kawa gooii'in. Heewí múk yaariír guri amoorós i uuruúx. Inós iwa gwaá', mukdá' sleémeero inós gwa eehar iri diya/aát sleeme.

³⁸ Gawaá adoorihe aníng kuungá' nun baw, ma gaanslimaara' daanduú muksinge. Muksíng geemawaak, asma kaangwí laqaá gadiyeérí barnaxes ar dákw hee, i hhitirút.

³⁹ Ala barnaxes amór i dahh a amór Mungú, hhitimaro a aleesleera'aaká. As adoorí kuungá' mutunduwa tsaáhh tawa adór múk nee Mungú slaqwá'.» Axweesanaywós kuri ya/án.

⁴⁰ Ya/abuuse kari ateét, kari muúx, kari hara'ayín matawa axweés ar umuú Yesu. Kiri geemáy, tari tláy.

⁴¹ Ya/abuuseedá' iri ti'ít baraá do'duú kwasleemaro, ta qwalalaa/ asma kiwa harafaár tawa múk hariím mureekeemisuwo as daanduú Yesu.

⁴² Nee umuúqo daqto baraá Doó Munguhe, nee dír maray'ine, axweesantá Mungú kaa mayká intsaahhatimisuwo, nee alki/ituú Ya/abtór hho' ar Yesu adór inós tar Kristo.