Tlehhema'aá ya/Abuuse 4 - Biblía Axweesantá Hhohho' ar Mungú 2004

Petro nee Yohane dír geeraá kwasleema

¹ Qoomár Petro nee Yohane tawa dír múkwí axweesi, kaahamuusér Mungú, nee geeraharusmoó xuumuusér Doó Mungú, nee múk Sadukayo tari didaádií hardáh.

² Tari ló'wa buúhh, asma muu kuwa intsaahhatimís nee kángw waasle/uú Yesu kuwa alki/iít.

³ Petro nee Yohane kiri ohín, kiri dahaás baraá doó tseegamo ay matlaatle, asma siiwadá' a tsiindo.

⁴ Ala baraá mukdá' axweesantadá' gaa axaasi awa yaariir ngay haratlinti'iyé', nee hhawaate a har afi qoomoó kume kooán.

⁵ Matlaatleero looa niwa tleér, geeraharuuse nee bariise nee intsaahhatuusér hara'ayár Mosewo tari burumburiít baraá Yerusalemu,

⁶ dinkwa nee kaahamusmoó úr oo Mungú kudá' ta bay Anasi, nee Kayafa sleeme, nee Yohane nee Aleksanda nee muu sleémeero kudá' doó kaahamusmoó úr oo Mungú hoót.

⁷ Petro nee Yohane kiri tla/angw'ín i sihhitís, kiri yaahamiís, kiri báy, «Kuungá' muruuwí /uuruú kur tlehhita' a /uuruú heemá, nee ar umuú heemá?»

⁸ Petro i haats Qeeruú hhoohhoó' oo Munguhe, iri oó', «Kuungaásingaá geeraharuusér muu nee bariise,

⁹ laarí atén ti yaahamiis daanduú tlehhmuú hhoó', kudá' taa tleéhh dír heedaáda' taa hungu/uús, tawa kaahi /uuruú ira hunguú/ a /uuruú heemá.

¹⁰ Ala dír kuungá' sleémeero i xu'utit nee dír múk Israeliwo adór heewí dír geerahúng wa sihhmiít ar slaqwa hhooa gár ira hunguú/ tar umuú Yesu Kristo oo Nasareti, kudá' kuungá' taa kikié', nee Mungú guri baraá gi'ií wa waasle/atís.

¹¹ Inós an tlaa/adá' taa sií' nee kuungaásingaá qwatsiiruuse, ala laatí an tlaa/adá' ur ar do' ir gawduy.

¹² Asma ba/ama i káhh dír heé hatlae, slám umuú hatlá' i kaahh baraaká' yaamuwo oo taa múk i haniís, oo atén tar ba/aman.»

¹³ Mukdaádá' urén oo doó kwasleema pihh'uumár Petro nee Yohane kawa ár, nee kawa tsaáhh tawa múk aa soomuusiiká, tari waa/oó/. Kari tsaáhh adór mukwí nee Yesu tar dinkwa.

¹⁴ Qoomár heedaádá' taa hungu/uús kuwa ár, iwa bihhaá ín Petro wa sihhimiiti inooín gár ta ooi iri qwát.

¹⁵ Kiri ádbáy tawa tsee/ií ti'iiti baraá doó kwasleemaro, as inooín kilooín tawa axweesi.

¹⁶ Tari oó', «Adór mukwí ku laqaan a adoomá? Asma ka geehhoo' muu sleémeero oo baraaká' Yerusalemúr hoót, layuuká' inooín taa tlehhiít kaa xuú', nee atén tlaankuwo i aleeslawanaaká.

¹⁷ Ala /aymi'iiká' mindiwa xu'utitiyé' dír muko, nee inooín in iigahhaataán as mindiwa malé axweesiyé' dír muko ar umuuwí.»

¹⁸ Petro nee Yohane kiri ateét, kiri hara'ayín matawa axweés, laqaá matawa baloó intsaahhatimís ar umuú Yesu.

¹⁹ Ala Petro nee Yohane tari oó', «A hariimáro dír geeraá Munguhe, kuungá' nuwa iiárií qaasaan ta Munguhe, kangwsíng kuungá' kiloohúng tsataak.

²⁰ Asma atén muruudá' taa araán nee kudá' taa axaasaán, kuwa mawaan axweesanto u aleeslawanaaká.»

²¹ Alaá kiwa malé iigahhaata hhe'eés, kiri gweér asma pa/aangw kwa ariiká oo kiwa sakwasleemuuti as muu. Asma muu sleémeero Mungú guna xirfayeemiís as tidá' sleémeero aa tleehharut.

²² Asma heedaádá' taa muruú xuawaslén i tleéhh, kudá' taa hungu/uús, kureeriiwós mibeeraá tsiyahhe naa waarahhiyé'.

Haratlintaauuse pihh'uuma ngiwa firiín

²³ Qoomár Petro nee Yohane kiwa gweér, tari tláy amór muk'ín, kángw muruudá' sleémeero kaa báy nee kaahamuusér uren ar Mungú nee bariiseero, kuri alki/iít.

²⁴ Adoorí kawa axaás, Mungú kuri firín ar muunuú wák, tari oó', «Aáko, kuúng a Mungú, kuúng an kudá' doori nee yaamu nee tlawto iga tlehh, nee umuúqo gár dawa.

²⁵ Kuúng ana axwés ar Qeeruú hhoohhoó' oo Mungú ar afkú baabuúrén, sagadiyusmoowók Daudi, tawa kát, ‹Ahaá, asma milá xoordu mis tsimahhuusiyá'? Nee slám muu mis muruú tlákw aldakuut?

²⁶ Waawituú baraakaá yaamu taa amohhe'eés, nee slám geeraharuuse aa burumburít as daanduú Aako nee Kristowós.›

²⁷ Asma tí a ló', Herode nee Pontio Pilato, nee múk xoordu nee múk Israeli, tana baraá gixsárí burumburiít, as sagadiyusmoowók Kudá' hhoohhoó', Yesu, kudá' kuúng taa iimbalaáx ar di/i.

²⁸ As kawa tleehhi tidá' kuúng taa slá' nee taa tsabiín kawa tlehh ar /uuruuwók, iimír iimu/uungo iwa bo/.

²⁹ Ala Aáko, ham daxta de'e tlaquuín ga/aaweek, nee sagadiyuuseerók aleesleemu ti hanis as axweesantók kawa axweesi ar pihh'uuma sleémeero.

³⁰ Dakók tleeseek iwa hungu/umiisi, nee layu nee muruú xuawaslén nguwa tlehhiiti ar umuú sagadiyusmoowók Kudá' hhoohhoó', Yesu.»

³¹ Mungú firooro kuwa hhe'eés, didaádá' tay burumburiít iri daaraxát, sleémeero tari haáts Qeeruú hhoohhoó' oo Munguhe. Axweesantá Mungú kari alki/iít ar pihh'uuma.

Dinku'uuma

³² Nee mukdá' aa haratlintii', muner'ín nee inslaway'ín tari wákleelí. Tam heé aa oo', «Gaarí a te'eé', ar aníng kilooeé',» i kaahh, asma muruuín sleémeero a alqaati.

³³ Ya/abuuse kángw waasle/uú Yesu guri lamabu'uún ar /uuru, nee Mungú tsuuqaá yaariir giri haniís dír muu sleémeero.

³⁴ Ala mukdá' aa haratlintii'i, heé aa gaa slaa' i kaahh. Asma mukdá' sleémeero oo yaamaá koóm, laqaá maraay, muruuín kudá' kuna weerimiís, hariímaadá' tinda sláy baraá weerimisuwo kingiri huúw,

³⁵ kari qaás dír geeraá ya/abuuse. Peésaadá' kari qasmiís ar hariímadá' hee aa slaá'.

³⁶ Nee Yosefu kudá' ya/abuuse aa beér Barnaba (gídaabárós a heé gurkwa/asa ga xuú'), inós a heé tlahhoó Laáwi, nee yaamaá i dahhi a yaamaá Kipro.

³⁷ Inós qaymo ga kón, gari weeriís, peésaadá' ngari huúw, gari qaás dír geeraá ya/abuuse.