Tlehhema'aá ya/Abuuse 3 - Biblía Axweesantá Hhohho' ar Mungú 2004

Heé taqoormo kuwa hungu/uús

¹ Looarka wake Petro nee Yohane tana tsa/án amór Doó Mungú qoomár looár gwaleél siiwadár saaliingw.

² Heeko taqoormo iimír kuwa laqwaali kuri afkú Doó Mungú i áy, afkú do'dá' ta bay oo Hhoohhoó'. Heewí umuúqo deelooro kun gagaraarín didií ale, as ilahhooa ngiwa firirin dír mukdá' baraá Doó Mungú i daráh.

³ Heewí Petro nee Yohane ngiwa ár tawa darahi baraá Doó Mungú, giri firín ilahhooaro.

⁴ Petro nee Yohane kuri ilií duxún, tari oó', «Amoorén i qaytsitang.»

⁵ Inós giri ilií duxún, gari haraxuú' gaa ngiwa dir'ín wa slay.

⁶ Ala Petro iri oó', «Aníng peésa a koomaaká, laqaá sahaábu, ala tidá' aníng ni koom an tidá' ni haniis. Ar umuú Yesu Kristo oo Nasareti, sihhiít, tláw.»

⁷ Dákw doó /iyáy guri óh, guri sihhitís. Hamtidár kilae tsa/a'aá ya'aawós niri kwa/iyé' nee diqoó ya'aawose.

⁸ Heedaádá' niri yaamuú wa /akuút ar gaanslaay, iri sihhiít, iri hi'imiít. Tari aldáh baraá Doó Mungú nee Petro nee Yohane, iri hi'iimiít iri ni/ín, Mungú guri diidi'iimiís.

⁹ Muu sleémeero heedaádá' guri ár adór ira hi'imiít, nee Mungú kuri diidi'iimiís.

¹⁰ Kuri tsaáhh tawa heedaádá' ilahhooár firaariím, kudá' ta qamaamin dír Afkú do'dá' ta bay oo Hhoohhoó'. Tari ló'wa waa/oó/, tari da'ayuút as kangwdá' aa tleehharuut.

Alki/ituú Petro baraá Doó Munguhe

¹¹ Heedaádá' taa hungu/uús, tari al dinku'uús nee Petro nee Yohane. Muu sleémeero giri i burumburiít didár islangwdá' ta bay islángw Solomon, muu iri ló' wa waa/oo/amín.

¹² Qoomár Petro adoorí ngiwa ár, mukdá' guri báy, «Aá múk Israeli, tlehhmuuwí mus waa/oo/amiindá'? Asma milá atén mista tawó ilaá i duxuundé', baré kwaáo' a atén heewí una hungu/uusaán ar /uureemoorén, laqaá ar hhooeemaarén.

¹³ Munguú Abrahamu nee oo Isaka nee oo Yakobo, Mungú baabi'iirén, sagadiyusmoowós Yesu guna xirfayeés, ala kuungá' sagadiyusmoowí kuri saki/é', kuri geeraá Pilató wa sié', qoomár Pilato iwa inós gweerár wa slai.

¹⁴ Ala kuungá' Kudá' hhoohhoó', nee gan'amuú koóm kuri sié'. Nee kudá' aa tsu/uut kuri firiindé' kuwa gweeri.

¹⁵ Kudá' úr oo slafiingw kuri gasé', ala Mungú guri waasle/atís baraá múk aa qaátl wa ale, nee atén a lamabu'uusér waasle/uuwí.

¹⁶ Heewí kuungá' ta ga/eera' nee oo ta xua', heé inós gwa /uurií haniis a Yesu, asma haratlintaao. Heewí kuri hungu/uús ar /uuruú haratlintaaoorí amór Yésú daahh, adoorí kuungá' sleémeero kur ga/eera'.

¹⁷ «Ala hám daxta, hhaee'eé', aníng a xuú' adór tidá' kara tlehhé' as xuawaslerhúng, adoodá' geeraharuuserhúng aa tléhh sleeme.

¹⁸ Ar tlehhmuuwihe Mungú adoodá' aa geerií axweés ar loohír aaruuseerós sleémeero, tidá' iwa káh, Kristowós gár kuwa hariím a kun slahh'eemiís.

¹⁹ Gawaá adoorihe kuungá' hhu'u'uumé', nee ki/é' amór Mungú, as tlakweemaahúng kiwa fiitsi. As kahhó' qooma niwa hardat ar Aako nuwa qwal/asi dír geeraawose,

²⁰ nee Kristo Yesu nguwa ya/aawi, kudá' taa iimír aáng wa amohhe'eés as kuungá'.

²¹ Kristo Yesu an kudá' aa gawaá doorí kii/, ay dír qoomaadá' i xeer, ar mura' sleémeero kuwa /abeemií ki/isi, adoodá' Mungú ngira qaroó oó' ar loohír aaruuseerós ar hhohho'.

²² Asma Mose ina oó', ‹Aako Munguúhúng aarusmoó adór aníng ngu baraá tla/angwhúng wa sláy. Ala muruudá' sleémeero ni kuungá' bay na iiárií qaasaak.

²³ Umuúqo heewo oo aarusmoowí gu iiárií qaasaaká, ku qwaarees.›

²⁴ Nee aaruuse sleémeero iimír aarusmo Samueli, nee kudá' sleémeero aluuwós nga hariye', inooín kángw qoomaarí nguna alki/iitiyé' sleeme.

²⁵ Kuungá' a na/aá aaruuse, nee slám a na/aá alqadoodá' Mungú aa qaroó alqadín dír baabi'iihúng, tidá' aa oó' dír Abrahamu iwa kaahi, ‹Baraá xwaylaroge xoordu sleémeero awa baraá yaamu ki tsuuq.›

²⁶ Qoomár Mungú sagadiyusmoowós kwí nguwa hhe'eés waasle/atisaro, nguri amorhúngí geerií ya/aáw, as umuúqo heewo tlakweema ngiwa may as tsuuqaawós.»