Tlehhema'aá ya/Abuuse 28 - Biblía Axweesantá Hhohho' ar Mungú 2004

Taa hardáh yaamaá Malta

¹ Tawa saxareemár hardahaán, kari tsaahhaán adór yaamuudá' kaahaar umuuwós tar Malta.

² Múk yaamuudá' tiri wa hhooáy. Qoomaadae tluwaay i tluuw nee tsaaqwa i ló'wa deer, inooín asla kari oohiís, atén tiri dahi'isiyé'.

³ Paulo buhhaá migír giri buruumbuúr, giri qamín baraá asla. Dayshamo iri baraadá' wa ti'iít asma asla, dákw Paulo guri kiíhh, iri gawaá dákwí hambaleleiít.

⁴ Múk yaamuudá' dayshamoodá' nguwa ár iwa hambaleele'miti, tiri kilooín babayé', «Heewí ánga/áw a tsu/utusmo, ala tim aa /uyi baraá tlawto, ala lo'o gu gáwtí geexeeraaká.»

⁵ Ala Paulo dayshamoodá' guri kuukuú' baraá asla, ala inós adór aa laáq i káhh.

⁶ Inooín geera ka xui in xir'iit, laqaá i yaamií huu' nee iri gwaa' ar gaanslaay. Kuri ló'wa daamarán naxés gár gwa eer iwa káhh, inslawoó muner'ín iri warqáy, tari káh, «Inós a mungú.»

⁷ Didá' tseewe qamukaari i dayá' awa heé úr oo yaamuudá', umuuwós a Publio. Heewí tina dahi'ís ar mulqi'iima, har deelo tame atén tari dahaayeerós.

⁸ Qoomaadae baabuú Publio i tiiq ga/atanto, nee i tseerdaá gusín. Paulo iri amoorós i dáh, iri firín, guri dabaawós i qaás, guri hungu/uús.

⁹ Tí sleémeero iwa tleehharút, múk hatlá' oo tiqtuuse oo baraá yaamuudá', niri didií hardaráh, kuri hungu/uumiís.

¹⁰ Inooín atén tiri ilaiwawa/iyé'. Qoomár tleemuurén iwa xáy, tiri muruú yaariír i hanmiís oo taqo sla'aana.

Paulo iwa Maltár wa tláy ay Roma

¹¹ Alaá slahheeraá tám niwa waaraahhiyé', tari tlawaán ar miringamooko amór Aleksandriár daáhh. Qoomár tsaaqwaro miringamoowí ina dír yaamuudá' wa hoót. Miringamoodá' umuuwós ku bay «Munguaá danga.»

¹² Tari hardahaán dír gixsár ta bay Sirakusa, tay didá' wa hootaán deelo tám.

¹³ Tawa didá' wa tlawaán, tay hardahaán dír gixsár ta bay Regio. Looaytleérós fur'ár baskwá daahh iri fukukueeliín, nee bál tsár tari hardahaán dír gixsár ta bay Puteoli.

¹⁴ Hhae kay amoodá' i awaán. Atén tiri ló'wa firiné' tawa al iwiwiitaan nee inooín deelo faanqwe. Nee aluudae tari hardahaán baraá yaamaá Roma.

¹⁵ Amoodae hhae kangwrén nguna axaasiyé', atén tiri al'ayé' dirka mura' kuwa weerimaamisi ar ta bay Apio, nee dirka ta bay «Maraá tám awa /ayma.» Paulo hhae ngiwa ár, Mungú guri sluufiís, iri gurkwaá/.

Paulo iwa baraá yaamaá Roma

¹⁶ Tawa dahaán baraá yaamaá Roma, Paulo pa/aangw guri sláy oo iwa hooti dír doó inós tawa kilós, inós nee askaarmoodá' gu xuúm.

¹⁷ Alaá deelór tám iwa waaráhh, Paulo geeraharuusér múk Yahudi gari ateét as tiwa doogiya'. Tawa burumburiít, giri báy, «Hhaee'eé', aníng gár naa tleéhh i káhh, ar hariimaaká dír mukrene, nee tam uunuú baabi'iirén iga si'iiká. Ala tam adoorihe tina tseék Yerusalemú wa ale, tiri qaás baraá dabaá múk Roma.

¹⁸ Nee inooín aníng yaahamisuuwo tiwa hhe'eés, tina slaá' tiwa gweeri, asma gár naa tleéhh i káhh ar tis gaasi.

¹⁹ Ala múk Yahudi adoodá' ngiwa sií', aníng adór hatlá' ar ni laaq iri qwát, aqo har kwasleemar'eé' ngiwa waarahhaas amór waawutmoó múk Roma. Ala aníng /aymuú múk xooror'eé' nguwa sakwasleemuut i kaahh.

²⁰ Ala gawaá adoorihe án kuungá' nuna ateét, iwa artá eera' nee tawa al'axweesaan. Asma aníng taa tseék ar pínguuwí as haraxu'utír múk Israeli.»

²¹ Inós kuri báy, «Atén barwár kangók koom aga slawaaniiká, ar amór yaamaá Yudeár daahh. Ala tam hhiyoó wák oo naa amoorí hardah i kaahh, oo kangók ngwa oo', laqaá oo /aymuú tlaákw ngwa oo' daanduuwoge.

²² Ala hamí a dirók wa sla'aán axaasaro adór kuúng ta ara'aan. Asma atén gár taa axaasaán a diínisíng kuúng taa eehát, kan afo tlakweemiis umuúqo diiro.»

²³ Deelo kari al'axweés ar kuwa iiárií qaasár ay. Múk ló'wa yaariír guri i daqáy dír do'dá' inós i hooti. Iimír matlaatle ay tsiindo Paulo kángw waawuti'iimár Mungú guri dir'íní alki/iít ar axweesanoó aleesleemuú koóm, gari laqaqán ar gooír Mose nee aaruuse adór Yesu tar Kristo.

²⁴ Bahh'alé axweesantadá' ngiri haratlinti'iyé', ala bahh'alé ngaa haratlinti'ii'iiká.

²⁵ Ala inooín awa kilá' ti slaslay'aaká, qoomár tawa tlatlay Paulo /aymi'iiká' ngina oó', «Qeeruú hhoohhoó' oo Mungú looeema gaa káh qoomár iwa axweés dír baabi'iihúng ar afkú aarusmo Isaya.

²⁶ Asma gár aa oó' a tí, ‹Tláw amór mukwí, ku beer, kuungá' a mak axamisá', ala a tsahha'aaká. A mak xumisá', ala a aanda'aaká.

²⁷ Asma fuqurángw mukwí aa daktu'uút, nee iaaín ki ilo' gaa axaasaro. Slám ilaaín kaa gumamaá', gaa makawa ár ilaaine, nee makawa axaás iaaine, nee makawa tsaáhh fuqurangw'ine, nee muner'ín makawa warqeés án ngiri hungu/uús.›

²⁸ «Ala kuungá' xuaak adór ba/amár Mungú kara huúw amór xoordaá hatlá', nee inooín ka iiárií qaas.» [

²⁹ Adoodá' ooaro ngiwa hhe'eés, múk Yahudi iri diya/aát, muruú yaariire tiri kilooín yaahamisiyé'.]

³⁰ Paulo do'dá' aa hoót, inósuú kilá' guna bu'ún, iri hoót didá' wa ale kureeri tsár. Muu sleémeero kudá' aa amoorós kakay guri dahi'imís.

³¹ Kángw waawuti'iimár Mungú guri alki/iít, nee kángw Aako Yesu Kristo guri intsaahhatimís ar pihh'uuma, nee heé inós gwa ilaa/ i kaahh.