Tlehhema'aá ya/Abuuse 27 - Biblía Axweesantá Hhohho' ar Mungú 2004

Paulo iwa Romár káy

¹ Qoomár hara'aya kawa oó' tawa aa'aá kawaan ar baraá tlawi ay Italia. Paulo kunguri duúx, nee mukduú hatlá' taa tsegiít, kiri qaás dabaá heeko ta bay Yulio. Inós a geeraharusmoó daqtá askaárír múk Roma, daqtadá' ta bay «Daqtá Agusto.»

² Ana tsa/amán baraá miringamooko ta bay Adiramito. Miringamoodá' amór i kay a baraá gixsadaá afaá tlawi awa yaamaá Asia. Tari tlawaán. Aristarko, heé gixsár Tesalonike ar baraá yaamaá Makedonia, nee atén ti koomaán.

³ Looaytleérós ana hardahaán Sidoni. Yulio Paulo guri hhooeemaá i tleéhh, iri ya/án iwa mulqeerós artá ay, as inooín kuwa alee/iisi.

⁴ Tari didá' wa tlawaán, tari waarahhaán ar baraá tlawi bihhaá doó /iyáy awa Kipro, as fur'a kawa ilaguwaan, asma fur'a ka ló' wa ur baraá tlawto.

⁵ Tlawi kari waarahhaán, tawa nakaa/aán dír yaamaá Kilikiaro nee Pamfilia, tlawi kari waarahhaán ay dír gixsár Mira ar baraá yaamaá Likia.

⁶ Didaádae geeraharusmoó askaari miringamo nguri sláy oo Aleksandriár daáhh. Miringamoodá' i Italiár káy. Atén tiri gawaadií tsa/aás

⁷ Ana tseegimamiisaán aaiiwo. Deelór yaariir kay hhe'eesaán, tari hardahaán gixsár Nido ar qitla. Fur'a tina ak il/aán, tari bihhaá yaamaá Krete oohaán, tawa waarahhaan ar Salmone.

⁸ Tari kumiitaán afaá tlawtár alé. Tari hardahaán ar slahha'amaayér yaariir dirka ta bay «Afaá tlawi awa Hhoohhoá'.» Diirí ka saweeká dír gixsár Lasearo.

⁹ Tari didá' wa hootaán deelór yaariire. Gawaá adoorihe a tsaxwá ur bar aga kumiitaán aaiikae. Asma hamí tam deelór Gwaawito aa waaráhh. Paulo axweesantí kari káh,

¹⁰ iri oó', «Án ngi slaá' aaiirén kukaáká' diirí wa tleemu i tsaxwaá koná'. Xooslár yaariir a qwaareesaán, nee miringamo, ala tam slafingwrén oo kilá'.»

¹¹ Ala geeraharusmoó askaári axweesanoó heé miringamoó madiít, nee daqaarmoó miringamo, guna axaamiís ta oo Paulowo.

¹² Ala didaádá' ta i dirii'i i hariindaaká hotaango qoomár tsaaqwaro. Gawaá adoorihe múk yaariír iri oó', «Gusé', waarahhamu bura aleeslawaán a waarahhaán ay Foiniki, as tawa hootaan qoomár tsaaqwaro.» Didá' an afaá tlawi awa yaamaá Krete. Diirí ina ganá' baskwá al /uwa, nee slám ina ganá' /iikwá al /uwa.

Bambaaór baraá tlawi

¹³ Qoomár fur'ár baskú daahh iwa iimu/uún fukukueeliingo ar tseegamis, tay ooaán daxta hardahamu u aleeslawaán as fur'aarí. Miringamo kuri gweér, tari tláy, tari kumiít ar afaá yaamaá Krete ar adoodá' taa aleesláy.

¹⁴ Deelór niina iwa waaráhh, fur'ár bambaao iri /uurúr fukukueeliín, niri amór yaamaá kaahaár wa tleér ar /uuru. Bambaaodá' a tidá' ta babay «Bambaaór /iikwá al da/aáw.»

¹⁵ Bambaaodá' miringamo guna dalá/. Kari tsaahhaán adór miringamo nee fur'a tlaampa'aamisuwo tir aleeslay'aaká. Miringamo sa daawimituwo kuri mawaán as kuwa harahuwahuwi nee fur'a.

¹⁶ Tari hardahaán amór yaamuukaari niina awa tla/ángw tlawi, awa ta babay Kauda. Tari bihhaá baskuú ar oohaán, amoodá' fur'a kawa ilaá/. Miringamoodá' niiná ta huwahuwi nee kudá' úr, kuri aleeslawaán kuwa tsa/aasaan gawaá miringamoodá' úr, ala ar ma/iís.

¹⁷ Miringamoodá' niiná kuwa hhe'eés tsa/aasaro, him'e kari waarahhaás ar baraá guruú miringamoodá' úr, kuri tseega hhe'eés as kuwa /aatleesi. Tari da'ayuút fur'a ngiwa huwahup ay dír afaá yaamaá Libya, ay dirka ma'aay kiwa niiná, didá' ta bay Sirti. Warqamaá uren awa fur'a baqamiingw kiri /aareés, as miringamo kuwa tseegisi nee fur'a.

¹⁸ Ala fur'a tina ló'wa daawitimís, looár na tleeri huwa kari kwakwaahhaán baraá tlawi as huwa kawa /aareesaan.

¹⁹ Bál tám xooslár miringamo kari kwakwaáhh baraá tlawi ar dabaaín awa kilá'.

²⁰ Deelór yaariir iri waaráhh, tsee/amá nee tsatse/ ugwa araaniiká, nee fur'a iri lówa kumít ar /uuru. Tam alhhe'eesaywo harahhifór tawa ba/aman iri fák.

²¹ Deelór yaariire tawa iwiiwiít ar qwari, Paulo iri tla/angw'íní sihhiít, iri oó', «Hhawaáte, qoomár aníng niwa oó' a tlawanaaká yaamaá Kretero alók ina iiárií qasé'. Muruuwí yaariír geera alók aa hhitiruutiiká nee aa qwaariiká.

²² Ala hamí nu baw, gur'e gawdeesaak. Asma tam heé wák i qwaariiká dirhunge, ala a har miringamo kilós.

²³ Asma xweeraaká' laarí malaykamoó Munguúdá' aníng naa haratlintií', slám ni sluufmiis, nina bihhieé' i sihhiít,

²⁴ iri báy, ‹Paulo, ma da'ayumitaar. Kuúng gár tuwa hariím an sihhít geeraá waawutmoó múk Roma. Nee qaytsiít, slafíngw mukwí sleémeero baraá miringamií dirií' oo aa'aá kaw dinkwa nee kuúng, Mungú gu ba/amis as kuúng.›

²⁵ Gawaá adoorihe, hhawaáte, gur'e gawdesaak, asma án Mungú ugwa haratlintií' adoodá' tinda dir'eé' oó' adór ir tleehharút.

²⁶ Ala miringamoorén aqo kun huuw nee fur'a ay dír yaamuukaari kaahaar awa baraá tla/ángw tlawi, iri iisi'ín gawaadií alé.»

²⁷ Xweeraá bál mibaá nee tsiyáhh ti qo ar harweriirín badu sleémeero baraá tlawtá Mediteraneár wa ale, qoomár dakiingo, múk baraá miringamoó wa gadiyuús, kawa xui geeraawo taa tseewúy yaamaá kaahaar.

²⁸ Tlaa/ano kuri tseék gawaá ságw hhutlmo, kuri /aytiís baraá tlawi, as saweemaá tlawi kiwa tsaahhi. Kari tsaáhh ar har afi qoomoó miíta mibeeri tsiyáhh. Siiwár niina iwa waaráhh, tay malé tlaa/anoó /aytiís, saweema kiri tsaáhh a miíta mibeeri tám.

²⁹ Tari da'ayuút as miringamo iwa iisi'in gawaá tlaa/ár baraá tlawi. Tlaa/aá tsiyáhh awa miringamo ilaa/aro ngu aleeslaawá', kiri /aytiís baraá tlawi, awa taa tseék alaá miringamo. Tari firirín as looa niwa tleer.

³⁰ Ala mukdá' baraá miringamoó wa gadiyuús iri guwoó slaá' as baraá miringamoó úr kiwa geexay. Miringamoodá' niiná kuri aweeriís baraá tlawi, adór múk tlaa/aá /aytisár slaá', kudá' miringamoó ilaa/aamá' amór ságw miringamoó wa ale.

³¹ Paulo geeraharusmoó askaári guri báy, «Mukwí bir baraá miringamoó wa iwiwiitiiká, kuungá' a ba/aanda'aaká.»

³² Naagáy askaári him'eedá' miringamoodá' niiná kura tseék, gari tsát, miringamo iri huú'.

³³ Qoomár iimi iwa piinsli'iimit, Paulo muu sleémeero guri harhheehhe'eés iwa /ayin, iri oó', «Ay laarí deelo a mibaá nee tsiyáhh tawa daamaraandé' nee tawa gwaawiwiindé', tam aga gaa /agi'iiká.

³⁴ Gawaá adoorihe án kuungá' nun harhhheehhe'eés, muruú /ayma /ayaak, asma an gár tar slafa'. Asma tam oo wák baraá tla/angwhunge, se'eemír sagós i qwatká.»

³⁵ Adoorí ooaro ngiwa hhe'eés, mukatmo guri taataáhh, Mungú guri dír geeraá muu sleémeeró wa sluufiís. Mukaatmo guri parhhamiís, /aymaro guri iimu/ún.

³⁶ Sleémeero tari gur'e kwaá/, nee inooín sleeme tari /ayín.

³⁷ Nee ateédá' baraá miringamoó i diriiá' a har tsiirér tsár nee mibeeraá faanqw nee lahhoó'.

³⁸ Tawa aáx, angaáno kuri kwaáhh baraá tlawi, as iiloeema kiwa /aareesi baraá miringamoowo.

Miringamo iwa qeqtín

³⁹ Looa ina tleér mukdá' miringamoó madiít yaamuudá' taa i hardáh kaa tsaahhiiká. Ala gár taa ár a qul/ír ma'aá taa doogiye' nee yaamaá kaahaar awa naa tlapiitiye'. Tari al'axweés as miringamo kuwa amoodií hardahaasi bira ya/aán.

⁴⁰ Him'eedá' tlaa/aá koom kari tsaát, kari máy baraá tlawi. Nee him'eedá' miringamo kur madiiti kari slakwekwe'eés. Warqamooduú fur'ár ila/aám kuri tleés amór ságw miringamoó wa ale, as fur'a miringamo nguwa geerií surkus, tari tseewúy afaá tlawi.

⁴¹ Ala tawa hardáh dirka ma'aá tlawi ti dogiitiya', miringamo iri iisi'ín gawaá hhasaangwduú baraá tlawi. Ságw miringamo iri iisi'ín, iri ló'wa nag'aát. Bartá alu kari tuu'uút nee /uuruú gwaanduú ma'aay, iri fee/ít.

⁴² Nee askaári gár aa slá', a mukdá' sleémeero taa tsegiít kuwa tsu/i, as tam oo wák dir'ine miwa waaraáhh ar baraá ma'aay ar qumburu/umit, iri goow.

⁴³ Ala geeraharusmoó askaári Paulo guna ba/amisár wa slaá', askaáridá' gari ilaá/, adoodá' ta slai makawa tleéhh. Ala iri hara'ayín as mukdá' qumburu/umit gu aleesláw, tawa geerií /akumiiti baraá tlawi, nee ta yaamaá kaahaárí hardihi.

⁴⁴ Nee mukdá' aa meet, bahh'alé i tsa/an gawaá peehháy nee bahh'alé gawaá parhheemaá hatlá' awa miringamo. Gawaá adoorihe sleémeero tari yaamaá kaahaárí hardahaán ar saxareema.