Tlehhema'aá ya/Abuuse 26 - Biblía Axweesantá Hhohho' ar Mungú 2004

Paulo tiwa dír geeraá Agripá wa aleekal/án

¹ Agripa Paulo guri báy, «Pa/aangw ngwa haniís oo axweesanaywók kuwa o'.» Paulo dakós guri tleés, tiri aleekal/án ar /aymi'iiká',

² «Kuúng waawutmo Agrípa! Dir'eene a gitse/aá ur asma án tiwa dír geeraawók wa aleekal/aam laarí baraá muruudá' sleémeero múk Yahudi aníng iwa sakwasleemuuti.

³ Asma tlehhma'aá yaariir nee yaahamisuú yaariír oo múk Yahudi kuúng u ló' wa xú'. Gawaá adoorihe án kuúng u firiím, án iiárií qaasáng ar qitla.

⁴ «Múk Yahudi sleémeero ga xuu' aníng adór nira hoót iimír masoombi'iimar'eene. Ka xuu' iimír iimu/uungo adór nira baraá tla/ángw muk'ín wa hoót, nee baraá Yerusalemu.

⁵ Inooín barka lamabu'úngw wa slaa', lamabu'uungo ka aleesláy asma iimír iimu/uungo aníng ana hoót adór heé Farisayo, kudá' hara'ayár diínirén gaa ló' wa eehar.

⁶ Qaytsiít, án hamí a sihhimiít as tiwa sakwasleemuuti, asma al'axweesantadá' Mungú aa dír baabi'iiréní oó' ana harahhiíf.

⁷ Al'axweesantí tlahhi'iirén kudá' mibaá nee tsár sleémeero ngin daamaraná' ngiwa i hardihiya', tawa Munguú sluufmamiisi ar inkihhimu tlaatla/aangw nee xweeraawo. Waawutámo! Aníng gár tiwa sakwasleemuuti nee múk Yahudi a daanduú haraxu'utirí.

⁸ Asma milá kuungá' mas haratlintatia'aaká gídaabá Mungú muu waasle/atisaro gu aleesláy?

⁹ «Anuú kilá' geera ana haraxuú' adór tar gár aníng wa hariim mura' sleémeero nguwa tleehh, kudaádá' Yesu Kristoó Nasareti gu baáq.

¹⁰ Adoorí an adoodá' naa tleéhh baraá Yerusalemuro, kaahamuusér uren ar Mungú ina aleesleemií hanís, múk hhohhó' oo Mungú nguri tsegiít. Nee qoomár kwasleema kawa tsaát ar kiwa tsu/i, aníng sleeme ana ya/aám.

¹¹ Baraá maraá saaliingo daqtá yaariire múk Mungú una dae tlaáq ar muxta, as Yesu kuwa /ooslislin. Baraá buhhtaaeé' kudaá dakti'iimaro, inooín ina gusiisiím tam ay baraá gixsadaá ayeemaá hatlá'.»

Paulo iwa hhu'u'uungós alki/iiti

¹² «Aníng baraá kaangwihe ana Damaskór káw sleeme. Niwa daqaw, kaahamuusér uren ar Mungú aleesleemu nee hara'ayaro kingina haniís.

¹³ Waawutámo, qoomár tlaatla/aango án niwa loohír i dirii', gwa/aateemaá ur awa tsee/amá ba/a ina ár, i gawaá dooraá dahhiyá'. Gwa/aateemaaká' aníng ina i gwa/aatiyé' bihhe sleémeero, dinkwa nee mukdá' nee aníng ti alkoomá'.

¹⁴ Sleémeero tari yaamií huhu'uumaán. Aníng afo ngiri axaás ar amor'eéní axwees ar tsifrír Ebrania, i kat, ‹Saúlo, Saúlo, ahaá waáy, án mihar slahh'eemís? A gár gawít diroge tawa slaqw nee aníng a adór heé laqwáy gu kal/aám.›

¹⁵ Aníng niri oó', ‹Kuúng a heemá, Aáko?› Aako iri oó', ‹Aníng a Yesu, kudá' kuúng ta slahh'eemis.

¹⁶ Ala tláw, sihhiít ar ya'aawók. Gaarí an gár aníng kuúng usa harati'iít, as uwa qaas tawa sagadiyusmo, nee lamabu'usmoó muruuwí taa aán nee muruudá' ta aan aluuwo.

¹⁷ Án kuúng u tuú/ baraá dabaá múk Israeliwo, nee dabaá múk xoordaá hatlá', asma aníng kuúng un amor'íní ya/aáw.

¹⁸ Kuúng ilaaín in qaytsitís, nee inooín in warqés baraá giwtír wa aleeró, tari dah baraá gwa/aateema, nee in baraá /uuruú Neetlángw wa dúx, nee kiri húp amór Mungú. As kahhó' tlakweemaaín kiwa gurtlay, nee niwa aaluusér Mungú tleehhiitiya' baraá tla/ángw kudá' taa hhoohhoeés, asma aníng iwa haratlinti'iiyé'.› »

Paulo iwa gadiyeérós kaahi

¹⁹ «Gawaá adoorihe, waawutmo Agrípa, aníng iigu'utuudá' gawaá dooraá daáhh ugwa si'iiká.

²⁰ Án kángw Mungú una alki/iít har geeraawo dír múk Damasko. Aluuwo baraá Yerusalemu tin wa alki/iít, nee baraá yaamu sleémeero awa Yudea, nee dír múk xoordu sleeme, as tawa hhu'u'un nee Mungú kuwa i warqay, nee tlehhma'aá nee hhu'u'ungw'ín ti slawá' kiwa tleehhi.

²¹ Gaarí an gár múk Yahudi aníng isa óh, qoomár aníng niwa baraá Doó Mungú i dirii', tiri gaasár wa slaá'.

²² Ala án Mungú ina alee/iís ay laarí. An gár nis sihhimiit diirí wa aleeró, múk urén nee oo ninakwe nguwa i lamabu'uum. Nee aníng /aymuú hatlá' oo ni oo' i kaahh, aqo har kudá' aaruuse nee Mosewo taa káh as iwa tleehharuuti.

²³ Nee kangwdá' a kwí, Kristo gár kuwa hariím a kun slahh'eemiis, nee tari heé baraá múk aa qaátl wa geerií waasleé/. Nee kángw gwa/aateema guri alki/iit dír múk Israeli nee dír múk xoordaá hatlae.»

²⁴ Paulo qoomár tiwa aleekal/an, Festo iri tseé' ar afór ur, iri oó', «Paúlo, kuúng aga slarhhamút, soómarók tisíng yaariir ugwa slarhhamuúr.»

²⁵ Ala Paulo iri oó', «Waawutmoó xiríf, aníng aga slarhhamuutiiká, ala án axweesanoó ló' un káh, nee oo ganaá'.

²⁶ Waawutmo Agrípa muruuwí gu xuu', nee aníng un axweés dír geeraawós wa aleeró ar pihh'uuma. Asma aníng a xu'uti hhe'eés adór gár waawutmo i xuiiká ir káhh baraá muruuwí sleémeerowo. Asma kaangwí aa baraá lu/aaráy wa tleehharuutiiká.

²⁷ Waawutmo Agrípa, kuúng aaruuse a haratlintía? Aníng a xuú' adór kar haratlintaatí'.»

²⁸ Agripa Paulo guri báy, «Ar /aymi'iiwók kwisíng niinawe aníng inqo Krishaanmo tléhha?»

²⁹ Paulo iri oó', «Tam ar /ayma'aá yaariir laqaá tam awa niinawe, ala gár ni fiririim dír Munguhe, kuúng masók an adór aníng tleehhít, ala mutuwa adór aníng wa tseék. Slám a kuúng kilogeeká, ala tam mukwí sleémeero oo aníng i iiárií qamiím diirihe.»

³⁰ Waawutmo nee ga/aawusmo nee Bernike nee mukdá' aa didií iwiit tari sihhiít.

³¹ Tawa ti'imiiti tari kilooín axweés tawa kaahi, «Heewí gár gwa'arár wa hariim gaa tleehhiiká, laqaá tam ar tseegamo.»

³² Agripa Festo guri báy, «Bar heewí geera waarahhamá amór waawutmoó múk Roma ngaa firiniká, alók a gweera.»