Tlehhema'aá ya/Abuuse 24 - Biblía Axweesantá Hhohho' ar Mungú 2004

Paulo kuwa sakwasleemuút

¹ Deelo kooán iwa waaráhh, Anania, kaahamusmoó úr oo Mungú, bariiserka ngina ar /eét, nee heé wák oo kwasleemár baál, umuuwós a Tertulo. Kwasleemadá' Paulo kuwa sakwasleemuút kari alki/iít dír ga/aawusmo.

² Paulo kuri ateét. Tertulo kwasleema gari iimu/ún iri oó', «Ga/aawusmoó xiríf. Baraá waawuti'iimaroge wayda unar hootaán. Yaamu niri warqayé', nee muruú hhó' ku tlehhiit baraá xooroorihe.

³ Nee tí sleémeero an slaaslawaán umuúqo daqto nee umuúqo diiro ar sluufoó yaariír.

⁴ Ala án kuúng muwa slaaqatís ar axweesanoó yaariír. Axweesanayrén kwí niiná iiárií qaaseek ar gurhhooarók.

⁵ Asma heewí ugwa tsaahhaán adór tar heé ló'wa tlaákw. A heé tlaahhír huwahuúw baraá múk Yahudi sleémeero baraá yaamuwo. Nee hamí a geeraharusmoó mukdá' ta bay Nasarayo.

⁶ Nee Doó Mungú nguwa meetagaamiís, kuri oohaán. [Atén geeraawo una sakwasleemár wa sla'aán ar dabeerén.

⁷ Ala Lisia, geeraharusmoó úr oo askaári niri hardáh, guri dabaarén wa hayóh ar /uuru.

⁸ Mukdá' inós gwa sakwasleemuut, guri hara'ayín, nguwa amoorók i sakwasleemár aya'.] Inós kuúng bura yaahamís, kaangwí sleémeero nguwa sakwasleemutaan uqo tsáhh.»

⁹ Múk Yahudi sleeme sakwasleemadá' gari ya/án, tari oó', «Kangwsíng sleémeero oo ló'.»

Paulo tiwa dír geeraá Felisi wa aleekal/án

¹⁰ Ga/aawusmo Paulo guri dákw i laqán as Paulo iwa ilawatsi. Paulo iri oó', «Aníng an axweés ar qwala/, asma ngiwa xuú' adór kuúng tara tlík kwasleema tlaquwo baraá xooroorihe.

¹¹ A gár inslaahh diroge, looeemaá kaangwí kiwa leelehh, kari xú' adór iimír niwa Yerusalémúr i tsa/ám as saaliingw deelo mibaá nee tsár gaa waarahhiká.

¹² Mukwí aníng iga ariiká baraá Doó Munguhe niwa kaangaanuus, laqaá niwa tlaahhír qamiim baraá boo/aywo, tam baraá doó saaliingo, laqaá tam baraá gixsaro.

¹³ Tam kangwqá' aníng iwa sakwasleemuutiya' looeemaawós laqaamaro ngi aleeslay'aaká.

¹⁴ Aníng aga dír geeraawók wa ya/aám, Munguúduú baabi'iirén un haratlintatií' ar loohidá' ngiwa eeharahar, tidá' inooín tawa kaahi a loohír lama. Nee tidá' sleémeero nee hara'ayár Mose ti slaslaawá' an haratlintatií', nee tidá' taa gooín baraá kitaaba'aá aaruuse.

¹⁵ Aníng a haraxu'utír koóm dír Munguhe, ar múk hhó' nee oo tlakwe tawa waaslee/i. Haraxu'utirí inooín sleeme ngi koná'.

¹⁶ Gawaá adoorihe muunaáeé' un harmagagaáhh daqisleém, as kahhó' ku hhoohhoó' geeraá Munguhe nee geeraá muko.

¹⁷ «Aníng kureeraá yaariire a kaáhh Yerusalemuwo, aluuwo niri kií/, as xooror'eé' ngiwa alee/iisáy i huuw, nee as ilahhooar'eé' ngiwa haniisár aw.

¹⁸ Qoomár aníng niwa baraá kaangwí i dirii', inooín iri baraá Doó Mungú i ayé', nee aníng taa qaroó hhoohhooeés. Tam boo/oó nee aníng ti koomá' i kaahh, laqaá tlaahhír ni qamiim i káhh.

¹⁹ Ala múk Yahudi oo Asiár daáhh i deer didaádae. Inooín masók gár kiwa hariím in diirí, as aníng iwa geeraawók wa sakwasleemuutiya', /aymuú i kona' bir deer daanduueene.

²⁰ Laqaá tam mukwí diirí dirií' ngi ooi, gár naa tlakweés a milá, ar inooín taa ár, qoomaadá' niwa sihhiít geeraá kwasleema.

²¹ Ala gár tindi ooi bir deer, aqo har /aymuudá' aníng naa tla/angw'ín wa tseé' ar afór ur, niwa oó', ‹Aníng laarí in sakwasleemutá' asma ngiwa haratlintatii' adór, múk aa qaatl ir waasleé/.› »

²² Felisi kángw Mungú gu xu'uti hhe'ees. Gawaá adoorihe deelór kwasleema gari surkuús, iri oó', «Lisia, geeraharusmoó úr oo askaári birna amoorí /eét, aníng kangwhúng ngu tsaát.»

²³ Aluuwo Felisi geeraharusmooduú askaári guri báy, «Paulo xuumaak, ala mu ak xuumara', tam mulqeerós ma ila/aamara' bar ngu sagadiyús.»

Paulo kuwa huúwdír geeraá Felisi nee Drusila

²⁴ Deelór hhaawaaká iwa waaráhh, Felisi nee hareerós Drusila tidár Yahudito'o nina hardihiyé'. Paulo kuri ateét. Kángw haratlintaaór baraá Yesu Kristo kuri dír Paulo wa iiárií qamín.

²⁵ Paulo kángw hotaá ganaa'á' nguwa alki/iít, nee kángw harqoomaay, nee sakwasleemár hi'iit, Felisi iri da'ayuút guri báy, «Kuúng ala tláw, án pa/aangw bura sláw, án kuúng uqo ateét.»

²⁶ Felisi Paulo guri ateetín daqtá yaariire tawa axweesi, asma iwa slukumár slai.

²⁷ Kureeraá tsár niwa waarahhiyé', Porkio Festo waawuti'iima gana kitángw Felísí wa óh. Felíki Paulo guri geexáy baraá tseegamo, as múk Yahudi nguwa ilaá hhó' i tleehhi.