Tlehhema'aá ya/Abuuse 22 - Biblía Axweesantá Hhohho' ar Mungú 2004

¹ «Hhaee'eé' nee baabi'iieene, án iiárií qaasaré', tiwa dír geeraahúng wa aleekal/aam.»

² Kawa axaás i amor'ín axwees ar tsifrír Ebrania, tari xasliita hhe'eés. Aluuwo giri báy,

³ «Aníng a heé Yahudi. Tina laqwaál Tarsór wa ale, gixsár yaamaá Kilikia. Ala ana baraá gixsarír Yerusalemúr wa uráw, baraá dabaá Gamalieli, án ina intsaahhatimís daanduú hara'ayár baabi'iirene. Tari heé ilakaahaár daanduú Munguhe adoorí kuungá' sleémeero ti diria' laarí.

⁴ Múk loohír Aako ga eeharahár nguri slahh'eemiís, nee sleeme nguri tsuú/, ina tsegiít, ngiri dahamiís baraá doó tseegamo, hhawaate nee /ameenaaro.

⁵ Adoorí kaahamusmoó úr oo Mungú nee bariisér doó kwasleema sleémeero ngi xuiyá' sleeme. Slám inooín awa kilá' tiri barwaduú i hanmiís awa ni huuw amór hhaeerén awa múk Yahudi, kudá' Damaskórí diriiá'. Niri Damaskór káw, as mukdá' amoodií dirií' oo loohír Aakoó eeharahár nguwa ohiim, nee nguwa tsegiit, nee nguwa huwahuuw ay Yerusalemu as kuwa sakwasleemuuti.»

Paulo iwa hhu'u'uungós alki/iiti

⁶ «Qoomár niwa aa'aá kaw, niwa nakaá/ Damasko, qoomár looár lahhoó' gwa/aateemaá ur awa gawaá dooraá dahhá' niri gwa/aatiyé' ar gaanslaay bihhe sleémeero.

⁷ Aníng niri yaamií huú'. Afo ngiri axaás ar i babaw, ‹Saúlo, Saúlo, ahaá waáy, án mis slahh'eemís?›

⁸ Aníng niri oó', ‹Kuúng a heemá, Aáko?› Iri báy, ‹Aníng a Yesuú Nasareti, kudá' kuúng ta slahh'eemis.›

⁹ Mukdá' nee aníng ti al koomá', gwa/aateema kilooín kina ár, ala afór heedá' naa amor'eéní axwees kaa axaasiiká.

¹⁰ Niri oó', ‹Adór ni laaq, Aáko?› Aako iri báy, ‹Tláw, sihhiít, dáh baraá gixsár Damasko. Nee baraadae kaangw sleémeero oo kuúng wa hariím kungu oo'.›

¹¹ Aníng xumso ngiri harslaaqaát as miraa/ór gwa/aateemaadá'. Mukdá' nee aníng ti al koomá' iri dawa óh, iri geerahaár ay Damasko.

¹² «Heeko wák ta bay Anania i deer. Inós a heé ilaiwa/amér koóm gawaá hara'ayaro, heé ta hhoár i xui nee múk Yahudi sleémeero oo amoodá' i dirií'.

¹³ Aníng iri i daqáy, iri sihhiít dír bihhieé', iri oó', ‹Hhiyaeé' Saulo, ilaawók i qaytsitiye'.› Ilaaeé' niri qaytsitiyé' hamtidár kilae, inós nguri ár.

¹⁴ Aluuwo iri oó', ‹Munguú baabi'iirén kuúng ugwa tsawaár as sla'aarirós kawa tsahh, nee Kudá' Ganaá' kuwa aan, nee afoorós ar kilá' kawa axas.

¹⁵ Asma kuúng a lamabu'usmoowós tleehhít dír muu sleémeerowo daanduú muruuwí sleémeero taa aán, nee taa axamisi.

¹⁶ Slám mas dóts? Sihhiít tu baatisi, tlakweemaawók ki hamaatli umuú Aako ateeteek.› »

Ateetamór Paulo as xoordaá hatlá' ngiwa i dahareemisi

¹⁷ «Aníng niwa kií/ Yerusalemu, looarka wake niwa baraá Doó Mungú wa fiririim, iigu'utu una ár.

¹⁸ Yesu una ár, i aníng babay, ‹Goów ar gaanslaay, baraá Yerusalemu geexaweek, asma lamabu'uungók daanduueene ku ya/anaká nee múk baraaká'.›

¹⁹ Aníng niri oó', ‹Aáko, inooíná kilá' ngi xuiyá' adór kudá' kuúng ugwa haratlintii'iye', aníng ngira tsegiít nee ngira muúx baraá maraá saaliingo.

²⁰ Qoomár tseerér Stefano, lamabu'usmoowók, kawa ku'uús, aníng a didií dirií', nee ana qwalalaá/. Tlabaá mukdá' inós gwa gaas ina xuúm.›

²¹ Aluuwo aníng iri báy, ‹Tláw, aníng kuúng u amór saáwí ya/aáw, amór múk xoordaá hatlá'.› »

²² Paulo kuna iiárií qaás ay dír /aymuuwí. Alaá /aymuuwí ooaro nguwa hhe'eés, muu iri tseeamín ar afór ló' wa ur, ta kaahi, «Heewí hingeesaak baraá yaamuwo! I harinká iwa hooti!»

²³ Qoomár tawa tseeamin, nee tawa tlabaá kwakwahhi, nee tawa teerír tleemisi,

²⁴ geeraharusmoodá' úr askaári gari ádbáy Paulo kuwa dahaasi baraá boóma, nee kangós kuwa yaahamiisi, kuwa hara muxi ay dír gaarí kuwa i tseeamin ngay ooi.»

²⁵ Ala qoomár kuwa him'eérár tseék as kuwa muxi, Paulo geeraharusmoó askaári kudá' aa bihhaawósí sihhiit guri báy, «Ahaá, adoorí a dáko ar yaamuloousmoó Roma kuwa muxi, bur kwa sakwasleemuutiiká?»

²⁶ Geeraharusmoodá' adoorí ngiwa axaás, iri tláy, geeraharusmoodá' úr guri ádbeemuú áy kaangwihe, iri oó', «Adór ta tleehhamór wa sla' a adoomá? Baré heewí a heé Roma.»

²⁷ Geeraharusmoodá' úr oo askaári niri hardáh, guri yaahaás, iri oó', «Kuúng a heé Romáro?» Paulo iri oó', «Ee.»

²⁸ Geeraharusmoodá' úr iri oó', «Aníng yaamulooarí ana sláw ar tlaxór ur.» Paulo iri oó', «Ala aníng a yaamuloousmoó Roma oo laqwalama.»

²⁹ Mukdá' taa amohhe'eés as Paulo kuwa yaahaasi tari tláy, kuri geexáy. Nee geeraharusmoodá' úr oo askaári sleeme iri da'ayuút ngiwa tsaáhh Paulo tawa heé Roma, nee inós gwa tseék.

Paulo i dír geeraá kwasleema

³⁰ Geeraharusmoodá' úr gár Paulo kusa sakwasleemuút nee múk Yahudi gari xu'utír wa slaá'. Gawaá adoorihe looaytleérós Paulo guri gweér. Kaahamuusér uren ar Mungú nee bariisér doó kwasleema sleémeero gari ateét. Paulo guri leéhh, guri dír geeraaíní huúw.