Tlehhema'aá ya/Abuuse 21 - Biblía Axweesantá Hhohho' ar Mungú 2004

Aa'aá Paulo ay Yerusalemu

¹ Alaá deelo ooaro kawa hhe'eesaán, tay tlawaán ar baraá tlawi, tari waarahhaán ay Kosi baalaadár kilae. Looaytleérós tay hardahaán Rodo, nee tawa didá' wa tlawaán tay hardahaán Patara.

² Miringamoó waaraáhh ay Foinike kuri araán, tay tsa/amán gawaadá', tay tlawaán.

³ Nee Kipro kawa araán, kari bihhaá dákw doó basáy geexawaán, tay hi'iitaán ay Siria, tari aweeraán Tiro. Asma didá' a dír miringamoorén huwaawós ngay aweerisi.

⁴ Eeharuuse kari slawaán amoodae, tari dir'ín wa hootaán deelo faanqw. Inooín Paulo ar /uuruú Qeeruú hhoohhoó' oo Munguhe kuri ádbabáy as Yerusalemu mingiwa káy.

⁵ Qoomár deelór tawa amoodií diriaan iwa fák, tay tlawaán. Inooín sleémeero nee tlaaway'ine nee na/iiwo tay haydohisiyé' ay afaá gixsa. Tay tumbarara'ataán afaá tlawi, tari firimaán.

⁶ Tiri deelór babawaán. Naagáy atén tay tsa/amán gawaá miringamo, nee inooín niri watliyé'.

⁷ Tawa tlawaán Tiroro tari kumiitaán aaiirene ay Tilemai. Diirí an alhhe'eesoó aaiirén awa baraá tlawi. Hhaeerén awa ayaadá' kay laaw'eesaán, nee tay amoodií tlaatla/iitaán looár wake.

⁸ Looaytleérós tay tlawaán, tay Kaisaréár i hardahaán, tay dahaán baraá doó Filipo, alki/itusmoó Ya/abtór hho'. Inós a heé wák baraá kudá' faanqwe. Tay do'ós wa hootaán.

⁹ Heewí dasuú tsiyáhh oo /amaatliite gu kón, inooín qeemuú aaru'uuma ngu koná'.

¹⁰ Nee tawa hootaán amoodá' wa ale deelór hhaawakahe, aarusmooko wák, umuuwós ta bay Agabo, nina yaamaá Yudeár wa aweér.

¹¹ Niwa hardáh, himuú Paulo guri taataáhh, inós tiri kilós ya'a' tseék nee dabaawo, iri oó', «Qeeruú hhoohhoó' oo Mungú i kaahi, ‹Adoorí an adór heé himuuwí kur tseegi nee múk Yahudi oo Yerusalemu nee kuri qaas baraá dabaá múk xoordu.› »

¹² Qoomár adoorí kawa axaasaán, atén nee mukduú didií dirií' Paulo kuri harhheehhe'eemisaán, as miwa Yerusalemúrí tsa/án.

¹³ Paulo atén tiri báy, «Gár ta tlehhita' a umós? /Aa/e nee diqay'eé' qwaareemisúwo? Mas tseegamo kilós an katá'? Án aga ya/aám tam tiwa gaasi baraá Yerusalemúr i alé as umuú Aako Yesu.»

¹⁴ Gurbu'utarén ngiwa sií', tari xasliitaán, tari ooaán, «Sla'aarír Aako i tleehharut.»

¹⁵ Deelór niina iwa waaráhh, xosluurén kiri amohhe'eesaán, tari tlawaán, tari tsa/amán Yerusalemu.

¹⁶ Eeharuusér baraá Kaisarea bahh'alé tari alkoomaán nee atén, tiri hardahás ay doó Mnasoni, heé yaamaá Kipro. Inós a eeharusmo iimír aange. Asma atén dír ti hotaá awaan an dír do'ós.

Paulo iwa dír Yakóbór óh

¹⁷ Qoomár tawa hardahaán Yerusalemu, hhae tiri ilaoohiyé' ar qwala/.

¹⁸ Looaytleérós Paulo nee atene tari amór doó Yakobo kawaán, nee bariise sleémeero i didaádií dirí'.

¹⁹ Paulo laawa'eesaro ngiwa hhe'eés, kaangw sleémeero oo Mungú aa tlehhiít dír múk xoordu ar gadiyeérós guri dir'íní wakeetín alki/ituuwo.

²⁰ Inooín kaangwí kuwa axaás, Mungú kuri xirfayeés, Paulo kuri báy, «Hhiyaarén, a ga/eéraáke múk Yahudi oo aa haratlintii' adór tar kumér yaariir. Inooín hara'ayár Mose ngi ló'wa ohiná'.

²¹ Inooín kaa kangók báy adór kuúng mukduú Yahudi oo baraá tla/ángw xoorduú i dirií', kura intsaahhatimís as hara'ayár Mose makawa eehár. Slám na/ii'ín mikiwa al/utlín, laqaá uunu mingiwa harmagaahhiyé'.

²² Ala hám adór ta laq? Baré kaaqo axaás adór kuúng nira hardát.

²³ Gimáy, adoorí atén ni kuúng bawaan tleehheek. Múk tsiyáhh u koomaán diirihe oo al'axweesantá lo'o gaa qaas dír Mungú.

²⁴ Mukwí ar tlaweek, ti alhhohhoese', nee kuúng deeqomór sager'ín ka bú'. Adoorí bara tléhh, muu sleémeero daqaní ga tsaahh adór kangwdá' kaa báy gawaá daanduuwoge tar lama, nee adór kuúng tar kumít hara'ayár Mose eeharahaduuwo.

²⁵ Ala gawaá daanduú múk xoorduuwo, kudá' aa haratlintii', atén ana gooimaán, tidá' taa al'axweesaán tawa ooaán, ‹Ti harmagahhe' nee muruudá' sleémeero taa ilahhooár wa tsuú/ dír munguaá hatlá', nee tseere nee fu'unaá gár taa af'óh, nee tsaatu'uuma.› »

²⁶ Aluuwo Paulo mukdá' gurir tláy, looaytleérose tiri alhhohhoeemisiyé'. Inós nee mukdae tari dáh baraá Doó Mungú, kaangw guri xu'utís oo deeloodár hhohhoeemisuuín iwa boo/i, nee kángw ilahhooár umuúqo heewo i haniisi.

Paulo kuwa baraá Doó Mungú wa óh

²⁷ Deeloodá' faanqw iwa naká/ faakmawo, mukko Yahudi oo Asiár daáhh Paulo kuri baraá Doó Mungú wa ár. Mukwí tlaahhi gari qaás dír muu sleémeero, Paulo kuri óh.

²⁸ Tari tseeamín, ta kaahi, «Gimsé', múk Israeli, ti alee/ise'! Heewí an heedá' muu sleémeero gu intsaahhatimaamís umuúqo diiro as tlahhayrén kuwa waaqaai, nee hara'ayár Mosewo, nee do'wí hhoohhoó' sleeme. Nee slám a tí kiloseeká, inós hamí múk Yunani ngwa dahaás baraá Doó Mungú, diirí hhoohhoo' gay meetagaás.»

²⁹ Inooín adoorí kana oó', asma Trofimo kuna ár, heé Efeso, nee Paulo ti koná' baraá gixsaro. Inooín geera ka xui Paulo heewí guna dahaás baraá Doó Mungú.

³⁰ Gixsa sleémeero iri amoqwát, múk baraá gixsa sleémeero iri amoodií ta'aaín, Paulo kuri óh, kuri duuruxún, kuri duúx baraá Doó Munguhe, hamtidár kilae afér do' kari tseék.

³¹ Qoomár tawa loohír leelehhiiti ar Paulo kur gaasi, kaangw iri hardáh dír geeraharusmoó úr oo askaári adór gixsár Yerusalemu sleémeero ira amoqwát.

³² Hamtidár kilae inós askaári gari ar tláy, nee geeraharuuser'ín, giri hara'aweér ar gaanslaay. Qoomár geeraharusmoodá' nguwa ariyé' nee askaári, Paulo kuri máy muxtaaro.

³³ Geeraharusmoodá' iwa hardáh Paulo guri óh, hara'aya gari oó' kuwa tseegi ar pínguú tsár, giri yaahaás, «Heewí a heemá? Nee gár aa tleéhh a milá?»

³⁴ Bahh'alé baraá boo/aydae tari tseeamín, kookari i tí kaahiyá', kookari tiqá'. Iwa xumiís naxés gár axaasaro i aleeslay i káhh tsimaahhiro, hara'aya gari oó' Paulo kuwa dahaasi baraá boóma.

³⁵ Paulo kuwa hardahaás dír gaangeefír do', askaári guri gagát, as kuwa xun muko.

³⁶ Asma boo/oó muu guna eeharahár ta tsimahhuus, ta kaahi, «Heewí gaasaak!»

Paulo ti aleekal/án

³⁷ Qoomár Paulo kuwa dahaasár wa slai baraá boóma, geeraharusmoó askaári guri báy, «Án pa/aangw u sláwa oo /aymuú wák nguwa dirógí oo'.» Inós iri oó', «Kuúng tsifrír múk Yunani a xúa?

³⁸ Bar adoosíng kuúng baré a heedaáduú Misrirooká, kudá' gawaá deeloorí aa waarahhi múk kume tsiyáhh gwa hara'awis, kudá' aa tsu/uut, guri ar tláy baraá xaanxaay.»

³⁹ Paulo iri oó', «Aníng a heé Yahudi. Gixsár Tarso tina wa laqwaál, baraá yaamaá Kilikia, a yaamuloousmoó gixsár liitlakweeká. U fiririím, pa/aangw hanisang, oo nir ilawaats nee yaamuloouuseerí.»

⁴⁰ Qoomár kuwa pa/aángwí haniís, Paulo iri sihhiít gawaá gaangeefír do', yaamuloouuseedá' gari kuútl ar dawa. Tawa xaslmiít, iri amor'íní axweés ar tsifrír Ebrania, giri báy,