Tlehhema'aá ya/Abuuse 2 - Biblía Axweesantá Hhohho' ar Mungú 2004

Qeeruú hhoohhoó' oo Mungú niwa hardáh

¹ Bál deelór Pentekoste iwa xeér, mukdá' haratlintii' sleémeero ta dír wák i dirii'.

² Naxés fur'ár dooraá daahh niri gaanslár hardát, a adór bambaaór fukukuu' ar /uuru. Fur'adá' do'dá' inooín i dirii'iya' guri hatsís sleémeero.

³ Tsángw asla niri ti'iít, tiri partliít, iri dír umuúqo heéwí iwiwiít, oo dir'ín tidá' i dirií'.

⁴ Sleémeero kiri hatsiís Qeeruú hhoohhoó' oo Munguhe. Tari axweés ar tsifrír dimbadimbé, adoodá' Qeeru ngira aleesleemuú i haniís ilawatsto.

⁵ Baraá gixsár Yerusalemuwo múk Yahudi i deer oo Mungú gwa haratlintii', múk amór yaamaá dimbadimbé daraáhh awa baraakaá' yaamu.

⁶ Afoodá' kawa axaás, múk yaariír iri burumburiít, tari ló'wa da'ayuút, asma umuúqo heewo mukdá' guna axamiís iwa axweesi ar tsifrirós ar kilá'.

⁷ Sleémeero tari da'ayuút tari waa/oo/amín tari oó', «Ahaá, mukwí sleémeero axweés a múk Galilayarookáhe?

⁸ Ahaá, baré umuúqo heewo bura iiárií qaasaán, in axwees ar tsifrirén ar kilá'?

⁹ Atén a múk Parti nee oo Medi, nee oo Elami, nee múk Mesopotamiár wa hoót, múk Yudea nee Kapadokia, nee Ponto nee Asia,

¹⁰ nee múk Frigiár daáhh nee Pamfilia, oo Misri nee oo Libya, múk inslaawoó bihhaá Kirene, nee dahaayér yaamaá Romár daahh,

¹¹ múk Yahudi, nee múk hatlá' oo diínír Yahudi gaa eehar, múk Krete nee múk yaamaá Ma/arabu. Adoorí a adoomá kiwa axamiisaan tlehhma'aá waa/oo/amo awa Mungú kiwa axweesi ar tsifrirén.»

¹² Tari waa/oo/amín, tari amoqwaqwadín sleémeero, tiri kilooín babayé', «Kángw adór kwí kureeriiwo a milá?»

¹³ Muu bahh'alé tari niqimís tawa kaahi, «Difaáír /aben gaa oonitimís.»

Alki/ituú Petro deelór Pentekosteero

¹⁴ Petro iri sihhiít dinkwa nee ya/abuuseedá' mibaá nee wak, iri tseé' ar afór ur iri oó', «Kuungá' múk Yahudi, nee kuungaásingaá sleémeero baraaká' Yerusalemúr hootá', axweesanay'eé' kwí iiárií qaasaak. /Aymuuwí xuaak,

¹⁵ mukwí aa oonimiitiiká adoosíng kuungá' kar kata', asma qoomaarí a looár tám ar matlaatle.

¹⁶ Ala kaangwí a kudá' aarusmo Yoeli aa axweés baraá kitaábuuwose iwa oó',

¹⁷ ‹Mungú ina oó', Adoorí an adoodá' ni tleehh bál deelór alhhe'eesaywo, aníng muu sleémeero un Qeeruueé' i haniís, daaqayhúng nee dasuuhúng tari aariirín, masoombarhúng iigu'utu guri aán, nee bariiserhúng iri tlatitiín.

¹⁸ Ala deeloodae án Qeeruueé' u haniís sleeme dír sagadiyuuser'eé' ar hhawaate nee ar /ameena, nee inooín tari aarirín.

¹⁹ Aníng muruú waa/oo/amór koóm ngu gawaá doorí wa laqaám, nee baraaká' yaamuwo layu ngiri laqaám, tseere nee asla, nee ququamó.

²⁰ Tsee/amá iri giiw, nee slahhaangw iri tseere tleehhiit, dír deelór Aako, tidá' ak ur nee ar xiríf nira xeeriiká.

²¹ Nee umuúqo heewo oo umuú Aako gwa ateeti ku ba/amis.›

²² «Kuungá' múk Israeli, axweesanaywí iiárií qaasaak, Yesu, heé yaamaá Nasareti, Mungú nguna dirhúng i laqaqán ar loohír muruú xuawaslén, nee layu nee muruú waa/oo/amór koóm. Muruuwí Mungú guna tleéhh ar dákw Yesu tla/angwhúng wa ale, adoodá' kuungá' kar xua'.

²³ Heewí kunguna haniís dirhúng, adór Mungú baraá xu'utirose ngira qoomeés iimír iimu/úngw wa ale. Kuungá' kuri kikié' ar dabaá múk tlákw, kuri gasé'.

²⁴ Ala Mungú guri gweér baraá slahha'amaayér gwa'araaro, guri waasle/atís, asma gwa'ara ar /uuruuwose gwa aleesleeriiká ilaa/aro.

²⁵ Asma Daudi kangós gwa oó', iwa kaahi, ‹Án Aako una ar'a'ár daqisleém dír geeraaeé', asma inós i bartá dakw'eé' oo doó /iyáy, as aníng mitiwa dingitís.

²⁶ Gawaá adoorihe muunaáeé' iri qwalalaá/, aníng niri baraá/, slám niri hoót ar harahhifo.

²⁷ Asma kuúng qeeruueé' u baraá gi'ií meeraaká, laqaá Heewók oo hhoohhoó' u meeraaká iwa hhitiruuti.

²⁸ Loohír amór slafíngw kaw nga aníng i xu'utís. Aníng a haáts qwal/uwo, asma kuúng a dir'eé' dirí'.› »

²⁹ «Hhaee'eé', án iiárií qaasaré', /ayma'aá niina ngi dirhúng i oó' ar pihh'uuma, kángw baabuúrén kudá' úr Daudi. Inós ina gwaá', kuri foól, nee /aantarós i diirír ayaarén i dirí' tam ay laarí.

³⁰ Slám inós a aarusmo, nee lo'oodá' Mungú aa /aáy inós ga xuu', tidá' kah, ‹Baraá xwaylaroge heé wák u waawutmoó wa qaás.›

³¹ Inós kángw waasle/uú Kristo guna ár ar baraá aaru'uuma, guri alki/iít iri oó', ‹Qeeruuwós gu baraá gi'ií mayká, nee tam slaqwtós aa hhitirutiká.›

³² Yésuuwí kuna waasle/atís nee Mungú, nee atén sleémeero a lamabu'uusér waasle/uuwós.

³³ Gawaá adoorihe kuri xirfayeés, guri tsa/aás ay dákw /iyáy oo Mungú, nee al'axweesantadár Qeeruú hhoohhoó' oo Mungú gari dír Baabá wa ilaaóh. Nee nguri amooréní haniís. Nee hám an kaangwí kuungá' ta ga/eera' nee ta axamisa'.

³⁴ Asma Daudi inósuú kilá' aa tsa/aniká gawaá doori, ala inósuú kilá' ina oó', ‹Aako Aakooeé' guna báy, bihhaá dakw'eé' oo doó /iyáy nay iwiiteek,

³⁵ ay dír wakuuseerók ngay gawaá dabaawók i qaas.› »

³⁶ «Gawaá adoorihe kuungá' múk Israeli, kángw kilá' wa xuaak, adór Yésuuwí kuungá' taa kikié' Mungú ngura qaás tawa Aako nee Kristo.»

³⁷ /Aymi'iiká' kiwa axaamiís, muner'ín kari kwatiít ló'wa ale, Petro nee ya/abuusér hatlá' kay yaahamiís tari oó', «Hhaeerén atén adór ta laqaan?»

³⁸ Petro iri oó', «Hhu'u'uumé', tundu baatimiisi ar umuú Yesu Kristo, as tlakweemaahúng kiwa gurtlay, nee daqaní kuungá' Qeeruú hhoohhoó' oo Mungú u sleerá'.

³⁹ Asma al'axweesantí a toohúng, nee ar na/iihúng, nee ar muu sleémeero oo sawén, kudá' sleémeero Aakoó Munguúrén i ateeti as nguwa i hardihiya'.»

⁴⁰ Petro giri ló'wa lamabu'ún ar /ayma'aá hatlá' awa yaariir, nee giri gurbu'ún iri oó', «Tundu ba/amisi dír qartír múk tlakwe.»

⁴¹ Nee mukdá' axweesantadá' gaa haratlintii', kuri baatimiís, múk baldá' aa doogin a har afi qoomoó kume tám.

⁴² Tari kumiít baraá intsaahhasár ya/abuusér wa ale, nee baraá dinkwár kríshaanáy, nee tam baraá muruú /aymár Aakoowo sleeme, nee baraá firooro.

Hotaá haratlintaauuse

⁴³ Umuúqo heewo dae guri eér, asma muruú xuawaslén oo yaariír nee layu kiri tleehhiít nee ya/abuuse.

⁴⁴ Mukdá' sleémeero aa haratlintii' tari dír wák wa hoót, muruuín sleémeero a dinkwa.

⁴⁵ Daqaari'iimar'ín kari weeramiís, nee muruuín kudá' i kon'a kuri qasmiís dír umuúqo heewo ar hariímadá' qoom.

⁴⁶ Umuúqo deelooro tari baraá Doó Mungú i dogiitiyé' ar muunuú wák. Muruú /aymár Aako kuna /aáy dír umuúqo dó' wa ale, muruú /aymar'ín kuri /aáy ar qwala/, nee ar muunuú /awaák.

⁴⁷ Mungú kuri sluufmiís, nee muu sleémeero kuri sla'atimís, Nee umuúqo baalaaro Aako faarór mukós kudá' ba/aa/ám gana dogiít.