Tlehhema'aá ya/Abuuse 19 - Biblía Axweesantá Hhohho' ar Mungú 2004

Paulo iwa baraá Efeso

¹ Qoomár Apolo iwa baraá Korintórií dirii'i, Paulo iri waaraáhh ar baraá yaamaá kaahaar, iri hardáh ay Efeso, amoodae tiri doogiyé' nee eeharuuserka,

² giri yaahaás giri báy, «Kuungá' Qeeruú hhoohhoó' oo Mungú ugwa ilaotí'i qoomár tawa haratlintié'?» Tari oó', «Aasla'áy, adór Qeeruú hhoohhoó' ir deér tam axaasaro una qo axaasaniiká.»

³ Aluuwo giri yaahaás, «Baatiísmoó tundura baatiís a baatísmoó heemá?» Tari oó', «A baatísmoó Yohane.»

⁴ Paulo iri oó', «Yohane ina baatimiís ar baatiísmoó hhu'u'uungw, muu guri ádbabáy as kudá' aluuwós wa hardáh kuwa haratlinti'i, inós an Yesu.»

⁵ Inooín adoorí kawa axaás, kiri baatimiís ar umuú Aako Yesu.

⁶ Qoomár Paulo dabaawós ngiwa gawaaíní qaás Qeeruú hhoohhoó' oo Mungú giri i aweér. Tari axweés ar tsifrír xuawaslen, nee ya/abtór amór Mungú daahh kari axweés.

⁷ Mukdá' sleémeero a har afi mibaá nee tsár.

⁸ Paulo ina daráh baraá doó saaliingw, har afi qoomár slahheeri tame kángw waawuti'iimár Mungú guri baraadá' wa alki/iít ar pihh'uuma. Paulo nee muu tina tlaampa'aamisiyé', nee muu guri harakeemiís.

⁹ Muu bahh'alé ku sage gawdén, tari sií' haratlintaaooro, loohír Aako kari /ooslislín geeraá boo/oó múk wa ale. Paulo inooín giri geexáy, eeharuuse gari paraátl. Gari ar tláy. Nee umuúqo deelooro iri intsaahhatimís baraá doó shuúlér heeko ta babay Tirano.

¹⁰ Tari kumiít ar adoorí ay kureeri tsár, tam múk Yahudi sleémeero nee oo Yunaniro kudá' Asiár i dirií', Ya/abtór Aako gari axaás.

Daaqoó Skewa

¹¹ Mungú muruú waa/oo/amo guri ak tlehhaahhiít ar dabaá Paulo.

¹² Tam warqama' nee inqwar kudá' inós aa tsiít geeraawo, kiri huúw amór tiqtuuse, tiqtir'ín tidá' iri hungú/, tam neetlaame sleeme giri geemeér.

¹³ Mukko Yahudi i deer oo harweerariím. Inooín a múk neetlaamér gusaasiím. Neetlaame kari iiár guusaro, ar umuú Aako Yesu kuwa kaahi daanduú mukdá' neetlaame aa eeri. Ta kaahi, «Aníng kuúng u guús ar umuú Yesu, kudá' Paulo i alki/iiti.»

¹⁴ Daaqayko faanqw oo Skewa adoorí gan laqaqán. Skewa a kaahamusmoó úr oo Mungú.

¹⁵ Neetlaameedá' iri ó', «Yesu u xuú', nee Paulo u xuú' sleeme, ala kuungá' a ín heemá?»

¹⁶ Heedaádá' neetlaame aa eér, inooín giri hara/akumiít, giri aleesláy giri ar baá/. Niri baraá do'dá' wa /akumiitiyé' ar /aankwets, amorqaáqae kaa tseeru'umaamiís.

¹⁷ Múk Yahudi sleémeero nee oo Yunani, kudá' baraá gixsár Efesór i diriiá' kaangwí kuri xuú'. Muu sleémeero iri ló'wa da'ayuút, nee umuú Aako Yesu iri ak xirfuút.

¹⁸ Sleeme múk yaariír oo aa haratlintii', tlehhemi'ii'ín kiri hhu'u'ún kiri geehhoatís.

¹⁹ Nee muu bahh'alé kuduú qwaslaare kitaabi'ii'ín kiri burumbuúr, kiri dír geeraá muu sleémeeró wa daá/. Nee faaro kari tleéhh, naxés tlaxór kitaabi'iidá' a shiliíngi kume mibeeri kooán.

²⁰ Adoorí an adoodá' Ya/abtór Aako ira geerií kumít, nee iri baaliín ar /uuru.

Tlaahhír baraá Efeso

²¹ Alaá kaangwí sleémeero iwa tleehharuút, Paulo isa gari tsaát iwa waaraahhi ar Makedonia nee Akaya, nee iwa kumiiti ay Yerusalemu.» Iri oó', «Aníng bara amorqí hardáh, gár iwa hariím an Romár káw sleeme.»

²² Múk tsár baraá mukdá' inós gu alee/iimamisa guri ya/aáw ay Makedonia. Mukwí a Timoteo nee Erasto. Ala inósuú kilá' iri Asiár wa hoót deelór hhaawaakahe.

²³ Qoomaadae tlaahhír yaariir niri ti'ít baraá yaamaá Efesoro, as daanduú loohír Aako.

²⁴ Asma heeko wák i deer, umuuwós ku bay Demetrio. Heewí a kareermo. Inós slaqsa'aá maraá Artemi gin tlehhahhiit. Artemi a munguú /ameeni oo múk Efeso. Gadiyeérós tí múk gadiyuús slaasláwár yaariir gan slaasláy.

²⁵ Demetrio mukwí guri burumbuúr dinkwa nee múk hatlá' sleémeero oo gadiyér adór tidá' ga tlehhiít. Iri oó', «Kuungá' hhawaáte, kuungá' a xuá' adór daqaari'iimarén dír kawa slaaslawaan tar baraá gadiyeérí.

²⁶ Kuungá' aga aandé' nee aga axasé' adór heewí ta bay Paulo i tlehhiiti. I kaahi, ‹Munguaá ta tlehhiiti ar dabaá muu a munguiwooká.› Inós múk yaariír gwa harakeemiís guri warqeés, ala a diirír gixsár Efeso kiloseeká, ala tam baraá yaamaá Asia sleémeero.

²⁷ Gawaá adoorihe gadiyeérén tí i baraá tsaxwá úr i dirí', muu ngiwa waaqaai. Ala a har tí kiloseeká, ala doó hhoohhoó' oo munguúrén kwí úr oo /ameeni Artemi, kuri gaárií xuiiká sleeme. Slám tsaxwa i dayá' awa munguúwí oo Artemi xirfuuwós kuwa hhitin, inósuudá' ta sluufmamiisi nee muu sleémeero oo baraá yaamaá Asia, tam múk baraá yaamu sleémeerowo.»

²⁸ Axweesanaywí kuwa axaás tari ló'wa buúhh, tari tsimahhuús, ta kaahi, «Artemi, munguú múk Efeso, ku úr!»

²⁹ Tlaahhidá' iri kumít baraá gixsa sleémeero. Boo/oó muu Gayo nee Aristarko kiri ohín. Inooín a múk Makedoniár daáhh, tina al koné' nee Paulo. Mukwí kurir tláy ay dír neeto.

³⁰ Paulo inósuú kilá' iri dahamaá slaá' amoodár geeraá muu. Ala haratlintaauuse aa ya/aandiiká.

³¹ Ala mukdá' urén oo yaamuudá' bahh'alé a mulqér Paulo. Inooín muu kuri ya/aáw amór Paulo. Kuri harhheehhe'eés as miwa dáh baraá doó kwasleema.

³² Qoomaadae dinkwadá' sleémeero i baraá tlaahhír i dirí'. Mukwí gár i tsimahhuusi a tí, kuqá' gár i tsimahhuusi a hatlá'. Asma múk yaariír gár ta sa burumburiít ga xuiiká.

³³ Muu bahh'alé iri káh heé tlaahhirí gaa qaas a Aleksanda, asma múk Yahudi Aleksanda guna huúw dír geeraá boo/aay, ala Aleksanda muu guri kuútl ar dawa as iwa xasliiti. Gari slaá' tiwa aleekal/an geeraá múk wa ale.

³⁴ Qoomár kawa tsaáhh adór inós tar heé Yahudi, sleémeero tari tseeamín ar afór wák ar har qoomár hhaawakahe, ta kaahi, «Artemi, munguú múk Efeso, ku úr!»

³⁵ Alhhe'eesaywo goousmoó gixsa muu guri xasltís, iri oó', «Kuungá' múk Efeso, umuúqo heewo ga xuu' adór múk doó munguúdá' úr oo Artemi gu xumxaxuúm, an múk gixsár Efeso nee tlaa/anoodá' hhoohhoó' naa gawaá doorí wa huu' sleeme.

³⁶ Kaangwí heé gu sií' i kaahh. Gawaá adoorihe, kuungá' xasliité', ma gaansluutara' gaa tleehhamooro.

³⁷ Kuungá' mukwí nguna diirí hubé', ala inooín gár taa fiís ar baraá doó mungú i káhh, slám /aymuú tlaákw oo taa oó' i kaahh daanduú munguúrene.

³⁸ Ala bar Demetrio nee mukwí nee inós algadiyuusá' gaa ka kón ar hee kuwa sakwasleemuuti, maraá kwasleema i dayá', nee mukdá' urén oo kwasleema i deer. Ti amorqá' wa sakwasleemuutiye'.

³⁹ Ala bar gár hatlá' ta koondá' ar dimbé i deer, gaasíng ka amohhe'ees didár dinkwadá' kawa hariím ar muu sleémeero.

⁴⁰ Asma atén a baraá tsaxwá i diriiaán tiwa sakwasleemuuti as kaangwí laarí aa tleehharuut, asma tawa adór tlaahhi. Slám gár muruuwí sleémeero isa tleehharuút i káhh. Nee atén birta yaahaás dír kwasleemaro, gár tir aleekala/aan a koomanaaká.»

⁴¹ Adoorí ooaro ngiwa hhe'eés, dinkwadá' gari gaás.