Tlehhema'aá ya/Abuuse 17 - Biblía Axweesantá Hhohho' ar Mungú 2004

Tlaahhír baraá Tesalonike

¹ Paulo nee Sila tari waaraáhh ar tla/ángw Amfipoli nee Apolonia, tari hardáh ay Tesalonike. Didaádae do'ko saalíngw múk Yahudi i deer.

² Paulo iri baraadí dáh adoodá' /iisí i tlehhahhiti. Deelo tám ar Sabaáto gari baraadá' wa hhe'eés, tiwa tlaampa'aamisiya' nee múk Yahudi daanduú Gooír axweesantá Munguhe.

³ Axweesantá Mungú gari dir'ín i gwa/atimís nee gari alki/iít adór Kristo gár kuwa hariím aqo kun slahh'eemiis, nee niri waslee/ baraá múk aa qaátl wa ale. Iri oó', «Yésuuwí kaangós án ni alki/iit, inós an Kristo.»

⁴ Bahh'alé baraá tla/angw'ine tari ya/án, tari haragwaá' nee Paulo nee Sila. Nee múk Yunani sleeme oo yaariír baraá kudá' Munguú ilaiwawa/a'a, tari ya/án, tam /ameenár hhaawaaká ar uren sleeme iri ya/aán.

⁵ Múk Yahudi da/i guri ót. Múk kuri tawo wa/angwsíng wa sleemiís, kuri burumbuúr as boo/aay kuwa slay. Tlaahhi kari qaás baraá gixsár wa ale. Tari haratláy dír doó Yasoni, as Paulo nee Sila kiwa leelehhiiti nee kiwa huwi dír geeraá boo/oó muu.

⁶ Ala kiwa slayká, Yasoni kuri óh, nee hhae bahh'alé, kiri huúw dír geeraá múk urén oo gixsa, tari tsimaahhuús, ta kaahi, «Mukdá' yaamu gaa halelee' naa ayaawí hardáh sleeme,

⁷ nee Yasoni mukwí gwa dahi'ís baraá do'ós i alé. Inooín sleémeero muruú ta tlehhahhiti a kudá' nee hara'ayár waawutmoó múk Roma ti slaslawa'aaká. Asma inooín ta kaahi waawutmoó hatlá' i deer, ku bay a Yesu!»

⁸ Gawaá adoorihe boo/aydá' nee múk urén oo gixsa tari kwisliít axweesanaydá' kuwa axaás.

⁹ Ala Yasoni nee mukós doohhisaro kiwa hhe'eés, kiri geemáy as tawa quutli.

Ya/abuuse i baraá Berea

¹⁰ Hamtidár kilae hhae Paulo nee Sila ngiri bayé', «Tlawsé' xweeraaká' alé ay Berea.» Tawa hardáh tari dáh baraá doó saalíngw múk Yahudi.

¹¹ Múk Berea a múk hhó' ta ak múk Tesalonikero, nee inooín Ya/abtór hho' ngina ilaaohiyé' ar muunuú hhoó'. Gooi ngiri soomuusiyé', nee ngiri aldakuutiyé' umuúqo daqto, as ngiwa tsaahhiya' áx kaangwí taa alki/iiti oo lóe.

¹² Múk yaariír baraá tla/angw'ine iri haratlintií', /ameenár uren ar yaariir ar múk Yunani sleeme iri haratlintí', tam hhawaataá hhaawa'aaká.

¹³ Ala múk Yahudi oo yaamaá Tesalonike kangw kuri axaás adór axweesantá Mungú Paulo ngira alki/iít baraá yaamaá Berearo sleeme. Tari tláy, tari amoodí hardáh, tlaahhi kari qaás, muu kuri amoqwaareés.

¹⁴ Hamtidár kilae hhaeedá' Paulo nguri ádbayé' iwa gayuú hatlá' oo tláwtí waaraahhi. Ala Sila nee Timoteo niri Berearí meetiyé'.

¹⁵ Ala mukdá' Paulo gwa haydohiis, guri huúw ay Athene. Aluuwo Paulo giri ya/aáw iwa kaahi, «Sila nee Timoteo mindiwa ak tligiyé' aluueene.» Mukdá' iri kií/.

Paulo iwa baraá Athene

¹⁶ Paulo Sila nee Timoteo giri Athénér wa dán. Gixsadá' gari ár naxés aa háts slaqsa'aá munguaá hatlae, iri ló'wa gurhaamuút baraá muunaáwose.

¹⁷ Qoomár iwa baraá doó saalíngw i dirii'i nee múk Yahudi tiri tlaampa'aamisiyé' nee mukdá' Munguú ilaiwawaá/. Nee umuúqo deelooro tiri tlaampa'aamisiyé' nee mukdá' nee inós ti dogagita' didá' mura' kuwa weerimamisi.

¹⁸ Mukko intsaahhasár Epikuro nee ar Stoiki tiri tlaampa'aamisiyé' nee Paulo. Bahh'alé tari oó', «Daktantí gár i ooár wa sla' a milá?» Bahh'alé tari oó', «Baré a adór heé ya/abtór munguaá xuawaslen ga alki/iít.» Adoorí kana oó' asma inós kángw Yesu guna alki/iít, nee kángw waasle/uuwós.

¹⁹ Kuri óh, kuri huúw ay Areopago. Tari oó', «Xáy, intsaahhatisasíng /aben kuúng ta intsaahhatimis, atén xu'utiro a aleeslawaána?

²⁰ Asma muruú kuúng ta axwes ku xuaawaslén baraá iiaarene. Atén muruusíng u sla'aán xu'utiro.»

²¹ Asma múk Athene sleémeero nee dahaayér baraadá' wa hoota, pa/ángw gár hatlá' i kaahh, aqo har kángw /abén kuwa kaahi nee kuwa axamiisi.

²² Paulo iri sihhiít tla/ángw doó kwasleema oo ta bay Areopago, iri oó', «Kuúngá' múk Athene, baraá mura' sleémeero aníng naa tsaáhh adór kuungá' tar múk diínír aldakuút kángw kilá' wa ale.

²³ Asma aníng ana hi'iimiít baraá gixsarí wa ale, nee qoomár niwa hi'iimiit, kitángw ilahhooa una ár oo taa gooín /aymi'iiká' i alé, ‹Dír munguúdá' xu'utiitaaká.› Ala aníng kángw ni alki/iit an kángw Munguúdá' kuungá' ta sluufmisa', kudá' kuungá' ta xua'aaká.

²⁴ Munguúdá' yaamu gaa tleehh, nee umuúqo gaaro ar baraawós i dirii', inós i hootiiká baraá maraá taa dabaá múk ar tleéhh. Inós a Aakoó doori nee yaamu.

²⁵ Laqaá inós gár i slai i káhh, tidá' inós kura sagadiyuús ar dabaá muu. Asma inós an kudá' muu sleémeero gu slafíngw i hanmiís, nee hiinsla nee mura' sleémeero.

²⁶ Inós xoordu sleémeero gina iihhaáf baraá heé wák wa aleeró, giri qaás baraá yaamu sleémeero. Inósuú kilá' iimír aange qom'i gina qaás, nee harki/isoó hotangw'ine.

²⁷ Mungú adoorí gana tleéhh as inooín inós kuwa leelehhiiti tam handá' ngu slaslay'aakáhe as kuwa slay. Ala tam adoorihe inós ku saaweeká dír umuúqo heerene.

²⁸ Asma, ‹Baraawose atén an hootaán, nee an hi'imiitaán, nee an slafaán.› Tam daauuserhúng bahh'alé adoorí gaa kát, ‹Asma atén sleeme a xwaylarós›.

²⁹ Ala atén barnaxes a na/aá Mungú, a hariímarooká atén tawa kaahaan Mungú a slaqás nee sahaábu, laqaá peésa, laqaá tlaa/ano. Asma muruuwí a muruú taa tleéhh ar aleesleemuú muu nee sagalooa.

³⁰ Qoomaadá' iimi kawa boó/, Mungú muruuwí guna al qiqtlín, asma tawa adór muruú i ga/ayká. Ala hamí muu sleémeero umuúqo diiro gun ádbabáy tawa hhu'u'un.

³¹ Asma Mungú deelo gaa qaroó qaás, tidár múk baraaká' yaamu nguwa sakwasleemuuti ar gan'amu. Kwasleema dír heé ngay haniís a kudá' inós aa tsawaár. Nee Mungú gaarí gana geehhoatís ló'wa ale dír muu sleémeero, qoomár heedaádá' kuwa waasle/atís baraá múk aa qaátl wa ale.»

³² Kángw waasle/ kuwa axaás, bahh'alé tari niqimís. Bahh'alé tari oó', «Atén kangwsíng u malé axaasaán looár hatlae.»

³³ Gawaá adoorihe Paulo iri quútl, mukdá' guri didií geexáy.

³⁴ Muu bahh'alé iri haragwaá' amór Paulo, tari haratlintií'. Baraá tla/ángw mukwihe heeko a Dionisio. Inós a heé doó kwasleema oo Areopago. Heé hatlá' a /ameenirka wák, umuuwós ta bay Damari, nee mukko hatlá' sleeme i deer.