Tlehhema'aá ya/Abuuse 15 - Biblía Axweesantá Hhohho' ar Mungú 2004

Dinkwár ur ar ya/abuuse baraá Yerusalemu

¹ Mukko nina Yudeár wa hardáh, hhae kiri intsaahhatimís tawa kaahi, «Kuungá' bartunda al/utliniká, adoodá' hara'ayár Mose i kat, a baloó ba/aanda'aaká.»

² Paulo nee Barnaba tiri ló'wa tlaampa'amisiyé' nee mukwí, tari kaangaanuús. Hhae kwasleema ngiri tsatiyé' Paulo nee Barnaba nee múk hatlá' baraá tla/angw'ine ta tsa/an ay Yerusalemu, amór ya/abuuse nee amór bariise, as daanduú yaahastí.

³ Mukwí kuri haydohiís nee múk kríshaanáy. Tari waaraáhh ar tla/ángw yaamaá Foinike nee Samaria, kángw múk xoordaá hatlá' adór ira hhu'u'ún kuri alki/iít, hhae sleémeero niri ló'wa qwalaa/iyé'.

⁴ Qoomár tawa hardáh Yerusalemu, kiri dahi'ís nee kríshaanáy nee ya/abuuse nee bariise. Nee muruudá' sleémeero Mungú aa tleéhh ar inooín, kuri alki/iít.

⁵ Ala múk Farisayo bahh'alé, kudá' aa haratlintii', tari sihhiít tari oó', «A gár hariim múk xoordaá hatlá' kuwa al/uutli nee kuwa hara'ayin, hara'ayár Mose kawa eehari.»

⁶ Ya/abuuse nee bariise tari burumburiít as kaangwí kuwa aldakuuti.

⁷ Tari ló'wa kaa/uús. Aluuwo Petro iri sihhiít, iri oó', «Hhaee'eé', kuungá' a xuá' adór iimír aange Mungú aníng ira tsawaár tla/angwhúng wa ale as Ya/abtór hho' ngiwa alki/iit dír múk xoordaá hatlá', as inooín kawa haratlintii'i.

⁸ Mungú munér muu ga xuu'. Nee inós Qeeruú hhoohhoó' guna dir'íní haniís adoodá' ngura dirén i haniís sleeme. Gawaá adoorihe gan laqaqán adór mukdá' ngura ya/án.

⁹ Mungú barqaanti gaa tleehhiiká dír tla/angwrén nee inooine. Tlakweemaaín gina gurtláy asma inooín sleeme taa haratlintií'.

¹⁰ Gawaá adoorihe kuungá' mas Mungú iiara'adá' ar huwár iiloo' kawa tsa/amisa' gawaá sum'aá eeharuuse? Huwaarí baabi'iirén laqaá tam atén awa kilá' aga aleeslawaaniiká gagaararo.

¹¹ Ala gár ta haratlintatiaan a tí, atén a ba/amán ar gurtleemuú Yesu Kristo, adoodá' inooín sleeme tara ba/án.»

¹² Múk baraá dinkwadá' sleémeero iri xasliít, Barnaba nee Paulo kiri iiárií qamín. Inooín kángw layu nee muruú waa/oo/amo kuri alki/iít, kudá' Mungú aa tleéhh ar inooín tla/ángw xoordaá hatlá' wa ale.

¹³ Barnaba nee Paulo tawa hhe'eés axweesanto. Yakobo iri iimu/ún iri oó', «Hhaee'eé', aníng iiárií qaasaré'.

¹⁴ Simeon ngaa alki/iít dirén i alé adór Mungú iimír iimu/uungo múk xoordu ngura sa daawimiít, as mukko nguwa tsawaár baraá tla/angw'ine as tawa mukós.

¹⁵ Tam axweesanoó aaruuse nee kaangwí ti slaslayá', adoodá' kara gooín,

¹⁶ ‹Aluuwo aníng ni kií/, nee doó Daudi ngway malé tleéhh, kudá' aa huu'. Nee wa/aameedá' aa met ngiri inkií/ tleehhamooro, ngway /abeemaá i ki/ís.

¹⁷ Gawaá adoorihe múk hatlá' sleémeero Aako ngu leeleehhi, múk xoordu sleémeero kudá' naa ateét tawa muk'eé'. Tí Aako gana oó', kudá' muruuwí gwaa tleehh,

¹⁸ aa xu'utiít iimír aange.› »

¹⁹ Yakobo iri kumiít iri oó', «Gár án ni slaa' a tí, ‹Mukdaáduú xoordu Mungú gwa haratlintii' muwa slahh'eemisaán.

²⁰ Ala barwá masók an amor'íní gooiimaán as tiwa harmagaahhiya' nee muruudá' taa ilahhooár munguaá hatlá' wa haniís, nee tsaatu'uuma, nee fu'unaydá' makiito'ór taa af'óh, nee tseere.

²¹ Asma iimír aange hara'ayár Mose ka soomamuus baraá maraá saaliingo umuúqo deelór Sabaátoro, nee axweesanaywós kudá' ku alki/aa/iit umuúqo gixsaro.› »

Barwár Ya/abuuse

²² Aluuwo ya/abuuse nee bariise nee kríshaanáy sleémeero oo didií dirií', axweesani kari tsaát tawa kaahi, «Muu un tsawaaraán baraá tla/angwrén wa ale, kuri ya/aawaán nee Paulo nee Barnaba ay Antiokia.» Nee múk taa tsawaár a kwí: Yuda, kudá' ta bay Barsaba, nee Sila. Mukwí an geeraharuuse baraá hhaeewo.

²³ Barwá kari gooín kari ya/aáw ar mukdá'. Barwaádá' gár i kat a tí, «Intsihhiisarí amór i dahh a amór ya/abuuse nee bariise. Kana gooín amór hhaeerén kudá' awa xoordaá hatlá', awa baraá Antiokiár i diriiá', nee Siria nee Kilikia.

²⁴ Atén aga axaasaán adór, mukko amoorén daáhh kuungá' nura daawitimiís ar axweesanay'ín, nee munerhúng ngaa xurér i qaasiyé'. Ala atén inooín ngaa ya/aawaniiká.

²⁵ Gawaá adoorihe atén aga al'axweesaán ar muunuú wák, muu un tsawaaraán nee nguri ya/aawaán amorhúng dinkwa nee sla'aruuseerén Barnaba nee Paulo.

²⁶ Inooín a múk slafingw'ín gwa haniis as gadiyér Aakoorén Yesu Kristo.

²⁷ Gawaá adoorihe Yuda nee Sila ngin ya/aawaán. Inooín axweesanaywí ngun ooiyá' ar afer'ín ar kilá'.

²⁸ Asma Qeeruú hhoohhoó' oo Mungú nee atén axweesani aga tsataán as huwár hatlá' makawa daandeemoohúng i qaás, ala a har tidá' kuungá' wa hariim.

²⁹ Ti harmagahhe' nee muruudá' sleémeero taa ilahhooár wa tsuú/ dír munguaá hatlá', nee tseere, nee fu'unaá makiito'ór taa af'óh, nee tsaatu'uuma. Birta harmagahhé' baraá muruuwihe, daqaní adór hhoo' aga tlehhé'. Deeloosé'. »

³⁰ Mukwí kuri ya/aáw, tari aweér ay Antiokia. Tawa hardáh, múk alqaati sleémeero kuri burumbuúr, barwaádá' kari haniís.

³¹ Qoomár soómaro kawa hhe'eés, mukduú alqaati iri qwalalaá/ as gurkwa/asadá'.

³² Yuda nee Sila inooín a aaruuse. Gawaá adoorihe niri alqadidiné' dír hhae ar axweesanoó yaariír, hhae ngiri gurkwa/amiisiyé', nee /uuru nguwa slaya' baraá haratlintaaooro.

³³ Tari hoót amoodá' wa ale deelór niinawe. Aluuwo hhae niri ya/ané' niwa watliya' ar wayda amór mukdá' inooín ngaa ya/aaw. [

³⁴ Ala Sila iri amoodá' i meét, adoodá' inós ngira slaá'.]

³⁵ Paulo nee Barnaba tari hoót Antiokiár wa ale. Ya/abtór hho' ar Aako kari intsaahhatimís nee kari alki/iít dinkwa nee múk hatlá' oo yaariír.

Paulo nee Barnaba tiwa partliitiyé'

³⁶ Deelór niina iwa waaráhh, Paulo iri oó' dír Barnaba, «Qwaláng, daxta a ki/aán amór gixsaduudá' sleémeero awa axweesantá Aako kawa alki/iitaán. Xáda xáy, hhaeedá' adór i dirii'iya' a adoomá.»

³⁷ Barnaba gana slaá' tiwa kona' nee Yohane, kudá' ta babay Marko.

³⁸ Ala Paulo gaa slaiiká kuwa huwi, asma adoodá' aáng ngiwa geexáy Pamfiliár i aleeró, baraá gadiyeé.

³⁹ Gawaá adoorihe Paulo nee Barnaba tari ló'wa kaa/uús, tam tiri paraatliyé'. Barnaba Marko gurir tláy, tari waaraáhh ar baraá tlawi ay Kipro.

⁴⁰ Ala Paulo Sila guri tsawaár, kuri aleefirín nee hhae as tsuuqaá Aako ngiwa slay, iri tláy.

⁴¹ Iri waaraáhh ar baraá yaamaá Siria nee Kilikia, múk kríshaanáy guri alee/imiís /uuru nguwa slaya' baraá haratlintaaooro.