Tlehhema'aá ya/Abuuse 14 - Biblía Axweesantá Hhohho' ar Mungú 2004

Paulo nee Barnaba ta baraá Ikonio

¹ Paulo nee Barnaba tawa Ikoníór i hardáh, tari dáh baraá doó saaliingw oo múk Yahudi, adoodá' taa tleéhh baraá Antiokiaro. Axweesantá Mungú kawa alki/iít, múk yaariír iri haratlintií', múk Yahudi nee oo Yunaniro.

² Ala múk Yahudi kudaá haratlinti'iiká múk xoordu guri dukún as hhae kiwa aahhi.

³ Inooín tari amoodá' wa hoót deelór yaariire. Kángw Aako kuri axweés ar pihh'uuma. Aako aleesleemu guri dir'íní haniís oo layu nee muruú waa/oo/amo kuwa tlehhiiti, Aako axweesantadár daanduú gurtleemuuwós gari laqán adór tar ló'.

⁴ Múk baraá gixsadá' tiri partliít, bahh'alé ta bartá múk Yahudi, nee bahh'alé bartá ya/abuuse.

⁵ Múk xoordu nee múk Yahudi nee geeraharuuser'ín adór ya/abuuse kar slahh'eemisi nee kar tlaquuti ar tlaa/e kari al'axweés.

⁶ Ya/abuuse kaangwí guri axás, tari goów ay Listra nee Derbe, gixsadaá yaamaá Likaonia, nee yaamuudaá iisaapaydá'.

⁷ Ya/abtór hho' kari alki/iít amoodae.

Paulo nee Barnaba i baraá Listra nee Derbe

⁸ Baraá Listraro heeko wák i deer oo diqoó ya'aawós wananaá'. Heewí a taqoormo iimír kuwa laqwaali, inós digir gwa baloó tu/iiká.

⁹ Heewí Paulo guna iiárií qamín qoomár iwa axweesi. Paulo heedaádá' guri ilií duxún, guri tsaáhh adór haratlintaaór gu hungu/uus ngir kón.

¹⁰ Paulo iri tseé' ar afór ur, guri báy «Sihhiita hhe'eés ar ya'aawók.» Heedaádá' iri sihhiít ar gaanslaay, iri hi'iimiít.

¹¹ Boo/aydá' adoodá' Paulo aa tleéhh ngiwa ár, tari tseeamín ar afór ur, tari oó' ar tsifrír Likaonia, «Mungui taa hara aweeriyé' ar slaqsa'aá muu.»

¹² Barnaba kuri báy Seu, nee Paulo kuri báy Herme, asma inós an heé aa ak axwees.

¹³ Kaahamusmoó Seu, kudá' do'ós geeraá gixsár i dirií', awe ngiri huúw, nee slamángw /ayo, ay dír afkú gixsa, asma inós nee muko ilahhooár muruú ta tsu/i kana haniisár wa slaá'.

¹⁴ Qoomár Barnaba nee Paulo kaangwí kuwa axaás, inqwaruuín kuri feehhamiís, tari ta'aaín, tari dáh baraá tla/ángw boo/aydá', ta tsimahhuus, ta kaahi,

¹⁵ «Múlqe, kuungá' gár adoorí kas tlehhita' a milá? Atén a múk adór kuungá'. Atén kuungá' nuna Ya/abtór hhó' ií huwaán, as kuungá' tawa warqeera' baraá muruuwí tlakwe, Munguúdá' slaáf kuwa i warqeera', kudá' doori nee yaamu nee tlawi gaa tleehh, nee muruudá' baraadií diriia sleémeero.

¹⁶ Inós aáng baraá qartá aa waarahhi, xoordu sleémeero gina máy as lohuduuín kiwa eehari.

¹⁷ Ala muu gwa tawó mayká, ala adór muu inós ngur tsaahhi i deer. Inós hhooeemaawós gaa dirhúngí laqán ar tluwaydá' ni gawaá doorí wa hanmamisi, nee bu'uungw nguwa hanmamisi ar qoomaarós. Slám gur'erhúng ga aaxamiis muruú /aymaro, nee munerhúng ga qwal/atimis.»

¹⁸ Ala /aymi'iiká' tam kaa axweesi, boo/aydá' kwaa lak ilaa/iiká as mikiwa ilahhooárií tsuú/.

¹⁹ Mukko Yahudi niri hardáh, i Antiokiár daahh nee Ikonio. Mukwí boo/aay guri harakeemiís. Aluuwo inooín Paulo kuri tlaquút ar tlaa/e, kuri duuruxún ar yaamu ay tsee/aá gixsa. Inooín geeraawo ka xui aa qaroó gwaá'.

²⁰ Ala eeharuuse Paulo nguwa harwét bihhe sleémeero, iri sihhiít, iri dáh baraá gixsa. Nee bál tsár iri tláy baraadá' wa ale dinkwa nee Barnaba ay Derbe.

Tari kií/ Antiokiár yaamaá Siria

²¹ Alaá Paulo nee Barnaba Ya/abtór hho' kawa baraá gixsadá' wa alki/iít, eeharuusér yaariir kari sláy. Tari kií/ ay Listra, nee Ikonio nee Antiokia.

²² Inooín eeharuuse kari gurkwa/amís nee /uuru nguwa sleer baraá haratlintaaooro. Nee tari oó', «Atén gár tiwa hariím an dahaán baraá waawuti'iimár Mungú ar slahha'amaayér yaariir.»

²³ Dír umuúqo kríshaanáy iwa deero bariise kari qamín. Tari firín nee tari gwaawín. Inooín kiri geexáy baraá dabaá Aako, kudá' taa haratlintií'.

²⁴ Tari waaraáhh ar tla/ángw Pisidia tari hardáh ay Pamfilia.

²⁵ Qoomár axweesantá Mungú kawa Pergár wa alki/iít, tari aweér ay Atalia.

²⁶ Tawa didá' wa tláy tari waaraáhh baraá tláwtár alé ay Antiokia. Diirí an didár múk kríshaanáy inooín ngiwa aleefirín /uuruú Mungú ku slay as gadiyeérí kawa tleehhi, tí hám taa hhe'eés.

²⁷ Qoomár tawa hardáh Antiokia, múk kríshaanáy kuri dinkwárí ateét, muruudá' sleémeero Mungú aa tleéhh ar inooín, kuri dir'íní alki/iít. Kiri ádbáy adór Mungú pa/aangw ngura haniís as múk xoordaá hatlá' sleeme iwa haratlintii'i.

²⁸ Tari didá' wa hoót nee eeharuuse deelór yaariire.